ជាតិ
រដ្ឋមន្ត្រីក្រសួងមហាផ្ទៃសម្រេចរៀបចំវេទិកាអប់រំផ្សព្វផ្សាយច្បាប់ស្តីពី ចរាចរណ៍ផ្លូវគោក
×
ភ្នំពេញ៖ ទន្ទឹមនឹងសមត្ថកិច្ចចុះអនុវត្តពង្រឹងច្បាប់ស្តីពី ចរាចរណ៍ផ្លូវគោកថ្មី ចាប់ពីថ្ងៃទី១ មករា ឆ្នាំ២០១៦រហូតមក រដ្ឋមន្ត្រីក្រសួងមហាផ្ទៃសម្តេច ស ខេង បានចេញសម្រេចបង្កើតក្រុមការងារវេទិកាអប់រំផ្សព្វផ្សាយច្បាប់ចរាចរណ៍ផ្លូវគោក ដល់សាធារណជនបន្ថែមទៀត ដើម្បី បង្កើនការយល់ដឹងពីច្បាប់ចរាចរណ៍ផ្លូវ និងរក្សាសណ្តាប់ធ្នាប់ ក៏ដូចជាលើកកម្ពស់សុវត្ថិភាព ចរាចរណ៍ផ្លូវគោកថ្មី។
រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក សម្តេច ស ខេង បានចេញសេចក្តីសម្រេចបង្កើតក្រុមការងារអប់រំផ្សព្វផ្សាយច្បាប់ចរាចរណ៍ផ្លូវគោក ដែលសមាសភាពមន្ត្រីចំនួន ១១រូប មកពីក្រសួងពាក់ព័ន្ធ។ សម្តេច បានណែនាំក្រុមការងារនេះ ឲ្យចាត់ចែងការងារបង្កើនយុទ្ធនាការផ្សព្វផ្សាយ និងបង្រៀន ច្បាប់ស្តីពី ចរាចរណ៍ផ្លូវគោកឲ្យបានទូលំទូលាយជូនដល់សាធារណជន តាមគ្រប់មធ្យោបាយ រួមទាំង តាមរយៈស្ថានីយ៍វិទ្យុ ទូរទស្សន៍ និងផ្ទាំងប៉ាណូរូបភាពតាមទីសាធារណៈ ដើម្បីបង្កើន ការយល់ដឹងពីច្បាប់ស្តីពី ចរាចរណ៍ផ្លូវគោក ដើម្បីធានារក្សាសណ្តាប់ធ្នាប់ និងលើកកម្ពស់ សុវត្ថិភាពចរាចរណ៍ផ្លូវគោកទូទាំងប្រទេស។
បើតាមសេចក្តីសម្រេច ចុះថ្ងៃទី១០ មករានេះ ក្រុមការងារអប់រំផ្សព្វផ្សាយច្បាប់ចរាចរណ៍ ផ្លូវគោក ដែលសមាសភាពចំនួន ១១រូប រួមមាន ១,លោក អ៊ីវ ផល្លី អនុរដ្ឋលេខាធិការក្រសួង ព័ត៌មាន (ជាប្រធាន) ២,លោក គឹម សន្តិភាព អនុរដ្ឋលេខាធិការក្រសួងយុត្តិធម៌ (អនុប្រធាន) ៣,លោក ចាន់ តារា អគ្គនាយកនៃអគ្គនាយកដ្នានដឹកជញ្ជូន (អនុប្រធាន) ៤,លោក ហ៊ឹម យ៉ាន អគ្គស្នងការរងនគរបាលជាតិ (សមាជិក) ៥,លោក សេក ភូមី ប្រធាននាយកដ្ឋានកណ្តាល សណ្តាប់ធ្នាប់សាធារណៈ (សមាជិក) ៦,លោក ឈួន វ៉ន់ អគ្គនាយករងនៃអគ្គនាយកដ្ឋានដឹក ជញ្ជូន (សមាជិក) ៧,លោក អែល សំនាង ទីប្រឹក្សាក្រសួងមហាផ្ទៃ (សមាជិក) ៨, លោក ព្រាប ច័ន្ទវិបុល ប្រធាននាយកដ្ឋានដឹកជញ្ជូនផ្លូវគោក (សមាជិក) ៩, លោក សូ ពីសី អនុប្រធាននាយកដ្ឋានដឹកជញ្ជូនផ្លូវគោក (សមាជិក) ១០, លោក ទី ឡុង អនុប្រធាននាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ (សមាជិក) និង លោកស្រី ម៉ែន ច័ន្ទសុកុល អនុប្រធាននាយកដ្ឋានដឹកជញ្ជូនផ្លូវគោក (សមាជិក)៕
© រក្សាសិទ្ធិដោយ thmeythmey.com