ដល់ពេលអាមេរិក-កូរ៉េខាងត្បូង-ជប៉ុន រៀបយុទ្ធសាស្ត្រថ្មី ប្រឆាំងកូរ៉េខាងជើង

អន្តរជាតិ

ដល់ពេលអាមេរិក-កូរ៉េខាងត្បូង-ជប៉ុន រៀបយុទ្ធសាស្ត្រថ្មី ប្រឆាំងកូរ៉េខាងជើង

11, Jan 2016 , 9:39 pm

រូបភាព

ដោយ:

ស្ទើរតែក្លាយជាតែទម្លាប់មួយទៅហើយដែលបងប្អូនកូរ៉េដែលមានសាច់ឈាមតែមួយ បានប្រឈមមុខ គ្នាទាំងពាក្យសម្តី និងការសម្ញែងអាវុធដាក់គ្នានៅតាមព្រំដែននោះ។ តែចុងក្រោយនេះក្រុងព្យុងយ៉ាង បានបាញ់គ្រាប់បែកអ៊ីដ្រូសែនដែលជាប្រភេទគ្រាប់បែកបរមាណូថ្មីដ៏មានឥទ្ធិពល ដែលកំពុងតែក្លាយជា គំរាមកំហែងថ្មីមួយនៅឧបទ្វីបកូរ៉េ និងក្នុងតំបន់ផងដែរនោះ។ បច្ចុប្បន្ន ក្រុងសេអ៊ូល និងក្រុងវ៉ាស៊ិនតោន កំពុងតែបន្តជជែកគ្នាក្នុងការរៀបចំយុទ្ធសាស្ត្រថ្មីបន្ថែមទៀតដើម្បីឆ្លើយតបទៅនឹងការគំរាមកំហែងថ្មី មួយនេះ ។

ការបាញ់សាកល្បងអាវុធនុយក្លេអ៊ែររបស់កូរ៉េខាងជើងកាលពីថ្ងៃទី០៦ ខែមករាកន្លងទៅ ក្លាយជាក្តីបារម្ភថ្មីមួយរបស់សហគមន៍អន្តរជាតិ។ នេះក៏ដោយសារ រដ្ឋឯកោ កូរ៉េខាងជើងអាចមានលទ្ធភាពគំរាមកំហែង ប្រទេសមហាអំណាចធំដូចជាអាមេរិកជាដើម និងបំផ្លាញសន្តិភាពពិភពលោក។ អាវុធអ៊ីដ្រូសែនដែលកូរ៉េខាងជើងទើបបាញ់សាកល្បងថ្មីនេះ មានឥទ្ធិពលខ្លាំងជាងគ្រាប់បែកអាតូមិកដែលអាមេរិកធ្លាប់ប្រើប្រាស់កន្លងមកច្រើនរយដង។ ការផ្គើនពិភពលោកច្រើនលើកច្រើនសារនេះធ្វើឲ្យ សហរដ្ឋអាមេរិក ជប៉ុន កូរ៉េខាងត្បូង រួមទាំងចិនជាសម្ព័ន្ធមិត្តខ្លួនផងនោះខឹងសម្បារខ្លាំងដែរ។

ដើម្បីឆ្លើយតបទៅនឹងសកម្មភាពនេះ កូរ៉េខាងត្បូង បានតំឡើងឧបករណ៍ចាក់សំឡេងជាច្រើនកន្លែង នៅតាមបណ្តោយព្រំដែនជាលើកដំបូង។ ហើយ ការចាក់សំឡេងនោះ រួមបញ្ចូលការប្រគុំតន្ត្រី និងការ ចាក់សំឡេងរិះគន់ពីរបបព្យុងយ៉ាងទាក់ទងទៅនឹងការរំលោភសិទ្ធិមនុស្សជាដើម។ បន្ថែមពីនេះ រដ្ឋាភិបាលក្រុងសេអ៊ូល ក៏បានប្រកាសរឹតបន្តឹងបន្ថែមនៅក្នុងតំបន់ពាណិជ្ជកម្មពិសេស ហ្គេសុង (Kaesong) ដែលជាតំបន់ពាណិជ្ជកម្មរួមរវាងកូរ៉េខាងជើង និងកូរ៉េខាងត្បូងផងដែរ។ តែយុទ្ធសាស្ត្រនេះ គ្មានឥទ្ធិពលអ្វីខ្លាំងទៅលើកូរ៉េខាងជើងនោះទេ ដ្បិតនេះ គឺជាបញ្ហានៃការគំរាមកំហែងផ្នែកអាវុធ ពោលគឺ វាត្រូវការការឆ្លើយតបផ្នែកសព្វាវុធវិញទើបអាចគំរាមរដ្ឋឯកោកូរ៉េខាងជើងបាន។

១. អាមេរិក ត្រៀមបញ្ជូនសព្វាវុធបន្ថែមដើម្បីការពារកូរ៉េខាងត្បូង
បន្ទាប់ពីអាមេរិក បានប្រតិបត្តិការយន្តហោះទម្លាក់គ្រាប់នុយក្លេអ៊ែរប្រភេទ B-52 ដោយអបជាមួយនឹង យន្តប្រមាញ់កូរ៉េខាងត្បូងកាលពីថ្ងៃម្សិលមិញ ដើម្បីជាការឆ្លើយតបលើកដំបូងទៅនឹងសកម្មភាពកូរ៉េ ខាងជើង នៅថ្ងៃច័ន្ទទី១១ មករា អាមេរិក និងកូរ៉េខាងត្បូង ក៏កំពុងតែជជែកបន្តក្នុងការចាត់វិធានការ បន្ថែម។ អ្នកនាំពាក្យក្រសួងការពារជាតិកូរ៉េខាងត្បូងលោក គីម មិនសឹក (Kim Min Seok) អះអាង កូរ៉េខាងត្បូងនិងអាមេរិក កំពុងតែធ្វើការជាមួយគ្នាយ៉ាងជិតស្និទបំផុតក្នុងការពង្រាយ និងបំពាក់អាវុធយុទ្ធសាស្ត្របន្ថែមនៅក្នុងឧបទ្វីបកូរ៉េ។ បើទោះជាលោក គីម មិនសឹក មិនបានបញ្ជាក់ពីអាវុធដែលនឹង ត្រូវពង្រាយបន្ថែមក៏ដោយ សារព័ត៌មានក្រុងសេអ៊ូលមួយចំនួន បានចុះផ្សាយថា អាវុធយុទ្ធសាស្ត្រ ដែលក្រុងវ៉ាស៊ិនតោន ត្រូវបញ្ជូនបន្ថែមអាចរួមមានយន្តហោះទម្លាក់គ្រាប់ប្រភេទ B-2 នាវាមុជទឹកថាម ពលនុយក្លេអ៊ែរ និងយន្តហោះប្រដេញ F-22។

២.ចិន បានត្រឹមប្រតិកម្ម តែជប៉ុនចាប់ដៃកូរ៉េខាងត្បូងលើកដំបូងប្រឆាំងកូរ៉េខាងជើង
ការបាញ់គ្រាប់បែកអ៊ីដ្រូសែន បានធ្វើឲ្យចិនដែលធ្លាប់ជាសម្ព័ន្ធមិត្តយ៉ាងជិតស្និទរបស់កូរ៉េខាងជើងមិនសប្បាយចិត្តប៉ុន្មាននោះទេ តែ ចិន មិនមានប្រតិកម្មតាមរយៈយោធាដូចរដ្ឋមួយចំនួននៅក្នុងតំបន់ នោះទេ។ ក្នុងនោះ លោក រដ្ឋមន្ត្រីការបរទេសចិន លោក វ៉ាង យី បានត្រឹមកោះឲ្យមានការដំណើរការ ឡើងនូវកិច្ចពិភាក្សាភាគី៦ (Six Parties Talk) ដែលផ្អាកតាំងពីឆ្នាំ២០០៩ មកម្ល៉េះ។ ភាគីប្រាំមួយមាន ដូចជា អាមេរិក រុស្ស៊ី ជប៉ុន ចិន កូរ៉េខាងជើង និងកូរ៉េខាងត្បូង។

ដោយសារការគំរាមថ្មីរបស់កូរ៉េខាងជើង គឹភាគច្រើនផ្តោតក្នុងតំបន់អាស៊ីបូព៌ា បញ្ហានេះ បានធ្វើឲ្យ កូរ៉េខាងត្បូង និងជប៉ុន ដែលរដ្ឋមិនខាងតែមិនសូវមើលមុខគ្នាចំដ្បិតបញ្ហាប្រវត្តិសាស្ត្រ បែរមកចាប់គ្នា ដើម្បីប្រឆាំងនឹងកូរ៉េខាងជើង។ បើយោងតាមសារព័ត៌មាន Strait Time កូរ៉េខាងត្បូង និងជប៉ុន សហការគ្នាជាលើកដំបូងក្នុងកិច្ចសហការយោធាក្នុងការជូនដំណឹងបន្ទាន់ទាក់ទងនឹងបញ្ហាសន្តិសុខ នៅក្នុងតំបន់ដែលសំដៅលើសកម្មភាពរបស់កូរ៉េខាងជើងនោះឯង។ កិច្ចសហការនេះ ក៏ស្របជាមួយ នឹងការប្រកាសរបស់លោកនាយករដ្ឋមន្ត្រីជប៉ុន ស៊ិនហ្សូ អាបេ ប្រតិកម្មជាមួយនឹងការគំរាមកំហែងថ្មី របស់កូរ៉េខាងជើង។ លោក អាបេ បានសង្កត់ធ្ងន់ថា ជប៉ុនមិនអាចអត់ឱន ចំពោះសកម្មភាពរបស់រដ្ឋាភិបាលកូរ៉េខាងជើង ក្នុងការបាញ់គ្រាប់បែកអ៊ីដ្រូសែនដែលជាប្រភេទអាវុធដ៏មានឥទ្ធិពល និងគ្រោះថ្នាក់បំផុត៕