ក្រោយបរាជ័យនាំអង្ករចេញ១លានតោន សហព័ន្ធស្រូវអង្ករកម្ពុជារកយុទ្ធសាស្ត្រថ្មី

ជាតិ

សេដ្ឋកិច្ច

ក្រោយបរាជ័យនាំអង្ករចេញ១លានតោន សហព័ន្ធស្រូវអង្ករកម្ពុជារកយុទ្ធសាស្ត្រថ្មី

12, Jan 2016 , 9:39 pm

រូបភាព

ដោយ:

ភ្នំពេញ៖ ប្រធានសហព័ន្ធស្រូវអង្ករកម្ពុជាលោក សុខ ពុទ្ធីវុធ ចង់ជំរុញឲ្យភាគីពាក់ព័ន្ធនឹងវិស័យស្រូវអង្ករ គិតគូរលើផែនការបីសំខាន់ៗគឺពូជស្រូវ ឃ្លាំងស្តុក និងទីផ្សារ ដើម្បីសម្រេចផែនការនាំចេញអង្ករចេញចំនួន១លានតោនរបស់រាជរដ្ឋាភិបាល។ លោក សុខ ពុទ្ធីវុធ រំពឹងថា កម្ពុជានឹងអាចនាំអង្ករចេញ១លានតោននៅក្នុងអំឡុង៥ឆ្នាំខាងមុខនេះ។

ថ្លែងក្នុងសន្និសីទសារព័ត៌មានស្តីពីវេទិកាស្រូវអង្ករកម្ពុជា នៅថ្ងៃទី១២ខែមករា នាសណ្ឋាគាសុខាភ្នំពេញ លោក សុខ ពុទ្ធីវុធ ចង់ឲ្យភាគីពាក់ព័ន្ធក្នុងវិស័យស្រូវអង្ករទាំងអស់រួមមាន៖ ម្ចាស់រោងម៉ាស៊ីនកិនស្រូវ ក្រុមហ៊ុននាំចេញអង្ករ សហគមន៍កសិករ ក្រុមហ៊ុនដឹកជញ្ជូន និងក្រសួងពាក់ព័ន្ធ ឲ្យរួមគ្នាគិតគូរលើពូជស្រូវ ឃ្លាំងស្តុក និងទីផ្សារ ដើម្បីរកការឯកភាពគ្នាលើចំណុចទាំងអស់នេះ។ លោក សុខ ពុទ្ធីវុធ មានប្រសាសន៍ថា៖«យើងចង់ឲ្យភាគីទាំងអស់ឯកភាពលើម៉ូដែលរួមមួយ ដើម្បីឲ្យយើងសហការគ្នា កុំឲ្យសហព័ន្ធស្រូវអង្ករកម្ពុជាទៅតែម្នាក់ឯង»។ លោក សុខ ពុទ្ធីវុធ រំពឹងថា កម្ពុជានឹងអាចនាំអង្ករចេញ១លានតោននៅក្នុងអំឡុង៥ឆ្នាំខាងមុខនេះ។

កាលពីឆ្នាំ២០១០កន្លងមក រាជរដ្ឋាភិបាលបានដាក់ចេញផែនការនាំអង្ករចេញចំនួន ១លានតោនសម្រាប់ឆ្នាំ២០១៥ តែផែនការនេះមិនអាចសម្រេចបាននោះទេ គឺកម្ពុជាបាននាំអង្ករចេញបានតែចំនួន៥៣ម៉ឺនតោនប៉ុណ្ណោះ។

សូមបញ្ជាក់ថា កម្ពុជានឹងរៀបចំវេទិកាស្រូវអង្ករលើកទី៥ នៅថ្ងៃទី២៤ដល់២៦ខែមករាឆ្នាំ២០១៦ នៅសណ្ឋាគាសុខាភ្នំពេញ ដែលវេទិកានោះ នឹងជជែកពិភាក្សាលើបញ្ហាស្រូវអង្ករដែលមានទំនាក់ទំនងជាមួយនឹងការធ្វើពាណិជ្ជកម្មអង្ករទៅកាន់ទីផ្សារពិភពលោក និងផែនការយុទ្ធសាស្ត្រសម្រាប់វិស័យស្រូវអង្ករកម្ពុជាទាំងមូល៕