អន្តរជាតិ
នយោបាយអន្តរជាតិ
អូស្រា្តលីបដិសេធសំណើអាមេរិកសុំជំនួយយោធាបន្ថែម
×
រដ្ឋាភិបាលអូស្ត្រាលីបានបដិសេធសំណើរបស់អាមេរិក ដែលសុំបន្ថែមជំនួយយោធាក្នុង ប្រតិបត្តិការកម្ទេចក្រុមរដ្ឋឥស្លាមឬដែស្ហ (Daesh) ។ អូស្ត្រាលីអះអាងថា ជំនួយរបស់ខ្លួននាពេលកន្លងមកគឺដូចជាគ្រប់គ្រាន់ហើយសម្រាប់ប្រតិបត្តិការនោះ ។ នេះបើយោងតាម Bangkok Post ។
អូស្ត្រាលីនឹងមិនផ្ដល់ជំនួយបន្ថែមទៀតដល់កងទ័ពអាមេរិកដែលកំពុងប្រយុទ្ធនឹងក្រុមជ្រុលនិយមដែស្ហនោះទេ ។ ការបដិសេធនេះធ្វើឡើងក្រោយរដ្ឋមន្ត្រីការពារជាតិអាមេរិកលោក Ash Carter ប្រកាសស្នើរកជំនួយពីប្រទេសម្ព័ន្ធមិត្តរបស់ខ្លួន បន្ទាប់ពីហេតុការណ៍វាយប្រហារភេរវកម្មនៅទីក្រុងប៉ារីស ។
នាយករដ្ឋមន្ត្រីអូស្ត្រាលីលោក Malcolm Turnbull បានបញ្ជាក់ហើយថា នឹងគ្មានការផ្ដល់ជំនួយបន្ថែមនោះទេ។ ចំណែកឯរដ្ឋមន្ត្រីការពារជាតិអូស្ត្រាលីលោកស្រី Marise Payne និយាយថា ជំនួយរបស់រដ្ឋាភិបាលអូស្ត្រាលីសព្វថ្ងៃនេះគឺគ្រប់គ្រាន់ហើយ ។ លោកស្រី Marise បន្ថែមថា អូស្ត្រាលីពិចារណាយ៉ាងដិតដល់លើសំណើអាមេរិក ដោយបានប្រៀបធៀបនិងជំនួយយោធាដែលកំពុងផ្ដល់ក្នុងការហ្វឹកហាត់ទាហានអ៊ីរ៉ាក់ ។
ការសម្រេចចិត្តនេះទៀតសោត គឺមានតែរយៈពេលប៉ុន្មានថ្ងៃប៉ុណ្ណោះ មុនដំណើររបស់លោក Malcolm Turnbull ទៅកាន់សហរដ្ឋអាមេរិក ។ ដំណើរទស្សនកិច្ចលើកនេះនឹងត្រូវផ្ដោតសំខាន់លើប្រធានបទភេរវកម្មនិងជម្លោះដែនដី ។
គួររម្លឹកថា អូស្ត្រាលីមានកងទ័ព៧៨០នាក់ កំពុងតែប្រតិបត្តិការប្រយុទ្ធនឹងក្រុមដែស្ហនៅតំបន់មជ្ឈិមបូព៌ា ។ ក្នុងចំណោមនោះ ទាហាន៤០០នាក់ជាសមាជិកក្រុម Air Task Group
ដែលទទួលបន្ទុកទម្លាក់គ្រាប់បែក។ ចំណែក កងកម្លាំងជាង៣០០នាក់ផ្សេងទៀត តាំងនៅរដ្ឋធានី បាក់ដាដ និងមានតួនាទីហ្វឹកហាត់កងកម្លាំងអ៊ីរ៉ាក់ ខណៈ៨០នាក់ទៀត ជួយពង្រឹងសមត្ថភាពប្រឆាំងភេរវកម្មដល់ទ័ពអ៊ីរ៉ាក់ ។
លើសពីនេះ ទ័ពអាកាសអូស្ត្រាលី ក៏បានចូលរួមក្នុងប្រតិបត្តិការទម្លាក់គ្រាប់បែកលើក្រុមជ្រុលនិយមនៅស៊ីរី ។ ប្រតិបត្តិការនេះជាផ្នែកនៃយុទ្ធនាការ៦០ប្រទេសរបស់សម្ព័ន្ធមិត្តដែលដឹកនាំដោយអាមេរិក ៕
Tag:
អាមេរិក
អូស្ត្រាលី
© រក្សាសិទ្ធិដោយ thmeythmey.com