បង្ក្រាបបទល្មើសព្រៃឈើ ដើម្បីឲ្យមតិជាតិ-អន្តរជាតិជឿជាក់លើរដ្ឋាភិបាល

ជាតិ

សង្គមជាតិ

បង្ក្រាបបទល្មើសព្រៃឈើ ដើម្បីឲ្យមតិជាតិ-អន្តរជាតិជឿជាក់លើរដ្ឋាភិបាល

18, Jan 2016 , 3:47 pm

រូបភាព

ដោយ: ថ្មីៗ

ប្រធានគណៈកម្មការទប់ស្កាត់ និងបង្ក្រាបបទល្មើសព្រៃឈើ លោក សៅ សុខា ដែលទើបតែងតាំង នៅថ្ងៃនេះបានបើកកិច្ចប្រជុំជាមួយក្រុមការងារខ្លួន ដើម្បីដាក់ផែនការទប់ស្កាត់ និងបង្ក្រាបបទល្មើសព្រៃឈើនៅកម្ពុជា។

គោលដៅសំខាន់ដែលគណៈកម្មការទប់ស្កាត់ និងបង្ក្រាបបទល្មើសព្រៃឈើ បានកំណត់នៅថ្ងៃនេះ គឺត្រូវស្រាវជ្រាវទប់ស្កាត់ការកាប់បំផ្លាញព្រៃឈើ ហើយការពារឲ្យបាននូវសម្បត្តិធនធានធម្មជាតិ។ ជាងនេះទៅទៀត គណៈកម្មការនេះ ក៏ត្រូវកសាងទំនុកចិត្ត ធ្វើឲ្យមានជំនឿលើការដឹកនាំរបស់រាជរដ្ឋាភិបាល ក្នុងការបង្ក្រាបបទល្មើសព្រៃឈើ ថើម្បីធ្វើឲ្យមតិជាតិ អន្តរជាតិមានការជឿជាក់។ នេះបើតាមលោក អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស ដែលបានថ្លែងប្រាប់អ្នកកាសែតក្រោយពីកិច្ចប្រជុំគណៈកម្មការទប់ស្កាត់ និងបង្ក្រាបបទល្មើសព្រៃឈើនៅថ្ងៃចន្ទទី ១៨ ខែមករា។

អ្នកនាំពាក្យរូបនេះ បន្តថា តាមផែនការ ប្រតិបត្តិការទប់ស្តាត់បទល្មើសព្រៃឈើ និងល្បាត ត្រូវប្រើប្រាស់កម្លាំងសរុបរបស់ខេត្ត។ ចំណែកឯកម្លាំងអន្តរាគមន៍បទល្មើសព្រៃឈើ ប្រើកងកម្លាំងថ្នាក់ជាតិ ពីកងរាជអាវុធហត្ថលើផ្ទៃប្រទេសចំនួន ១២០ នាក់ កម្លាំងអគ្គស្នងការដ្ឋាននគរបាលជាតិចំនួន ១២០ និងកម្លាំងនៅតាមស្ថាប័នមួយចំនួនទៀត។

បើតាមផែនការគណៈកម្មការទប់ស្កាត់ និងបង្ក្រាបបទល្មើសព្រៃឈើ រាល់ការងារដឹកនាំបញ្ជាទាំងឡាយនៃការទប់ស្កាត់ និងបង្ក្រាបបទល្មើសព្រៃឈើថ្នាក់ជាតិ ស្ថិតនៅក្រោមការដឹកនាំរបស់លោក សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស រីឯថ្នាក់ខេត្តដឹកនាំដោយគណៈមេបញ្ជាការឯកភាពខេត្ត។

នៅក្នុងកិច្ចប្រជុំដែលដឹកនាំដោយលោក សៅ សុខា កាលពីព្រឹកមិញ ក៏បានលើកឡើងពីបញ្ហាប្រឈមមួយចំនួន ជាពិសេសតំបន់ជួបបញ្ហាប្រឈមដែលគណៈកម្មការទប់ស្កាត់ និងបង្ក្រាបបទល្មើសព្រៃឈើនៅកម្ពុជានឹងជួប គឺស្ថិតនៅតំបន់ភូមិភាគឦសាន ដែលសម្បូរទៅដោយភ្នំ ជ្រោះ ជ្រលង ដងអូរ ហើយផ្លូវពិបាកក្នុងការចល័តកម្លាំង ព្រមទាំងការកាប់ឈើលាក់ទុកមានច្រើនកន្លែង។ នៅល្ងាចនេះ លោកឧត្តមសេនីយ៍ សៅ សុខា ក៏បានជិះឧទ្ធម្ភាគចក្ររបស់កងទ័ពអាកាសពិនិត្យមើលទីតាំងទុកឈើនៅខេត្តក្រចេះ និងខេត្តត្បូងឃ្មុំ៕