អន្តរជាតិ
អាមេរិកត្រូវសងបំណុលអ៊ីរ៉ង់ទាំងដើមទាំងការ១.៧ពាន់លានដុល្លារ សហរដ្ឋអាមេរិកបានប្រកាសថាខ្លួននឹងសងបំណុលអ៊ីរ៉ង់ ៤០០លានដុល្លារអាមេរិក រួមទាំងការប្រាក់ ១.៣ពាន់លានដុល្លារផ្សេងទៀត កាលពីថ្ងៃ១៧ខែមករាម្សិលមិញនេះ។ ការប្រកាសបែបនេះ កើតឡើងក្រោយអាមេរិកសម្រេចដកទណ្ឌកម្មប្រឆាំងអ៊ីរ៉ង់ ក្រោយប្រទេសឥស្លាមមួយនេះបានអនុវត្តតាមកិច្ចព្រមព្រៀងនុយក្លេអ៊ែរខ្ជាប់ខ្ជួន។ នេះបើយោងតាមទីភ្នាក់ងារព័ត៌មាន AFP។
សូមស្ដាប់ព័ត៌មានលម្អិតដោយលោក មុំ ពិទូរ្យ៖
ប្រមុខការទូតអាមេរិកលោក ចន ឃឺរី បានប្រកាសថា សហរដ្ឋអាមេរិកនឹងសងបំណុងអ៊ីរ៉ង់ក្នុងទំហំទឹកប្រាក់ ៤០០លានដុល្លារអាមេរិក រួមទាំងការប្រាក់ចំនួន ១.៣ពាន់លានដុល្លារផង។ អាមេរិកសម្រេចសងលុយទាំងអស់នេះទៅអ៊ីរ៉ង់ ក្រោយពេលដែលទណ្ឌកម្មសេដ្ឋកិច្ចប្រឆាំងអ៊ីរ៉ង់ត្រូវបានគេដកចេញ ជាថ្នូរនឹងការអនុវត្តកិច្ចព្រមព្រៀងនុយក្លេអ៊ែរកន្លងមក។
ចាប់ពីថ្ងៃ ១៧មករា តទៅទណ្ឌកម្មនានាទាំងផ្នែកហិរញ្ញវត្ថុ និងសេដ្ឋកិច្ចពាក់ព័ន្ធនឹងកម្មវិធីនុយក្លេអ៊ែរត្រូវដកចេញអស់។ ហើយក្នុងចំណោមទណ្ឌកម្មទាំងនោះមានការដកទណ្ឌកម្មលើការនាំចេញប្រេងទៅបរទេស និង បញ្ចប់ការហ៊ុំព័ទ្ធសេដ្ឋកិច្ចអ៊ីរ៉ង់ ដែលវាជួយឲ្យអ៊ីរ៉ង់អាចបើកទ្វារស្វាគមន៍វិនិយោគបរទេសបាន។
ទឹកប្រាក់ដែលរដ្ឋាភិបាលអាមេរិកជំពាក់នេះ គឺជាប្រាក់ដែលអ៊ីរ៉ង់បានចំណាយលើការទិញអាវុធតាំងពី មុនពេលដែលបដិវត្តន៍ឥស្លាមនៅអ៊ីរ៉ង់កើតឡើងនៅឆ្នាំ ១៩៧៩ មកម្ល៉េះ។ ក្រោយបដិវត្តន៍នេះ អ៊ីរ៉ង់ និងសហរដ្ឋអាមេរិកក៏ចាប់ផ្តើមផ្តាច់ចំណងការទូតតែម្តង ព្រោះអាមេរិកគាំទ្ររបបរាជានិយមនៅអ៊ីរ៉ង់។ ដូច្នេះហើយទើបបានជាការប្រាក់កើនឡើងដល់ ១.៣ពាន់លានដុល្លារអាមេរិក។
នៅក្នុងឆ្នាំ ១៩៨១ មជ្ឈត្តការមួយត្រូវបានបង្កើតឡើងនៅទីក្រុងឡាអេដើម្បីដោះស្រាយរឿងបំណុលរវាងអាមេរិកនិងអ៊ីរ៉ង់។ អ៊ីរ៉ង់បានដាក់ពាក្យបណ្តឹងទាមទារប្រាក់ដែលខ្លួនបានបង់ឲ្យអាមេរិកដើម្បីទិញអាវុធនេះ។
បើយោងតាមការលើកឡើងរបស់លោក ចន ឃឺរី ទាំងដើមទាំងការដែលត្រូវសងរដ្ឋាភិបាលក្រុងតេហេរ៉ង់នេះ ជាដំណោះស្រាយដ៏ត្រឹមត្រូវ ហើយអាមេរិកបានធ្វើសម្បទានច្រើនទៅកាន់ភាគីអ៊ីរ៉ង់ដើម្បីរក្សានូវកិច្ចព្រមព្រៀងនុយក្លេអ៊ែរចេញជារូបរាងកាលពីខែកក្កដាឆ្នាំមុន។
តាមពិតទៅ បំណុលទាំងអស់ដដែលត្រូវសងអ៊ីរ៉ង់នេះ ដាច់ដោយឡែកពីកញ្ចប់ថវិការាប់ពាន់ដុល្លារផ្សេងទៀតរបស់អ៊ីរ៉ង់ដែលស្ថិតក្នុងគណនីបរទេសដែលត្រូវក្រុងវ៉ាស៊ីនតោនបង្កកកន្លងមក។ ក្រោយការដកទណ្ឌកម្មសេដ្ឋកិច្ច រដ្ឋាភិបាលអ៊ីរ៉ង់ អាចភ្ជាប់ទៅកាន់គណនីនេះបានវិញជាធម្មតា។
ដោយឡែក ម្សិលមិញនេះដែរ លោក បារ៉ាក់ អូបាម៉ា បានថ្លែងសុន្ទរកថា ជុំវិញការដកទណ្ឌកម្មប្រឆាំងអ៊ីរ៉ង់និងការដោះស្រាយបំណុលជំពាក់អ៊ីរ៉ង់ដែរ។ លោកថាដំណោះស្រាយដែលភាគីទាំងសងខាងព្រមទទួលយកវាពិតជាប្រសើរ ព្រោះលុយដែលអាមេរិកត្រូវសងវាតិចជាងលុយដែលអ៊ីរ៉ង់ធ្លាប់ទាមទារ ហើយការយល់ព្រមសងបំណុលអ៊ីរ៉ង់នេះ បានជួយកាត់បន្ថយការចំណាយរបស់អាមេរិកបានយ៉ាងច្រើនផងដែរ៕
Tag:
កម្មវិធីនុយក្លេអ៊ែរអ៊ីរ៉ង់
អាមេរិក
© រក្សាសិទ្ធិដោយ thmeythmey.com