ទូតអាមេរិកថ្មី ប្តេជ្ញាបញ្ចុះបញ្ចូលវិនិយោគិនអាមេរិកឲ្យមកវិនិយោគនៅកម្ពុជា

ជាតិ

សេដ្ឋកិច្ច

ទូតអាមេរិកថ្មី ប្តេជ្ញាបញ្ចុះបញ្ចូលវិនិយោគិនអាមេរិកឲ្យមកវិនិយោគនៅកម្ពុជា

18, Jan 2016 , 8:59 pm

រូបភាព

ដោយ: ខន ចំប៉ា

ពោធិ៍សាត់៖ នៅក្នុងឆ្នាំ២០១៥កន្លងទៅ ទំហំពាណិជ្ជកម្មរវាងកម្ពុជា និងសហរដ្ឋអាមេរិក មានចំនួនជាង២ពាន់លានដុល្លារអាមេរិក។ នេះជាការបញ្ជាក់របស់ លោក William A. Heidt ឯកអគ្គរដ្ឋទូតអាមេរិកថ្មីប្រចាំកម្ពុជា។

នៅចំពោះមុខអភិបាលខេត្តពោធិ៍សាត់លោក ម៉ៅ ធនិន លោកគ្រូ អ្នកគ្រូ និងសិស្សានុសិស្សប្រមាណ៨០០នាក់ ក្នុងវិទ្យាល័យពោធិ៍សាត់ នាថ្ងៃទី១៤ខែ មករា លោក Heidt បានបញ្ជាក់ថា ទីផ្សារអាមេរិក គឺជាទីផ្សារធំជាងគេសម្រាប់ការនាំចេញរបស់កម្ពុជា។

លោកថា នឹងបញ្ចុះបញ្ចូលវិនិយោគិនអាមេរិក ឲ្យមកវិនិយោគនៅកម្ពុជា ខណៈបច្ចុប្បន្នមានក្រុមហ៊ុនធំៗរបស់អាមេរិកតិចតួចនៅឡើយ កំពុងវិនិយោគនៅកម្ពុជា ។ លោក បន្តថា៖«យើងនឹងពន្យល់វិនិយោគិនអាមេរិក អំពីគោលការណ៍រកស៊ីនៅកម្ពុជា ថាតើមានលក្ខណៈដូចម្តេចខ្លះ ដើម្បីឲ្យពួកគេមកវិនិយោគនៅកម្ពុជា»។

សូមបញ្ជាក់ថា កាលពីឆ្នាំ២០១៤ ទំហំពាណិជ្ជកម្មរវាងកម្ពុជា និងសហរដ្ឋអាមេរិក មានទឹកប្រាក់ចំនួន៣,១៧១.៩០លានដុល្លារអាមេរិកកើនឡើង៥.៣ភាគរយ បើធៀបនឹងឆ្នាំ២០១៣ ដែលមានទំហំទឹកប្រាក់ចំនួន៣,០១២.៨០លាន ដុល្លារអាមេរិក៕