អន្តរជាតិ
ស្ត្រីតៃវ៉ាន់ដើមកំណើតកម្ពុជា Lin Li Chan ក្លាយជាតំណាងរាស្ត្រទី១ក្នុងប្រវត្តិសាស្ត្រ
× កាលពីថ្ងៃទី១៦ ខែមករា កន្លងទៅ តៃវ៉ាន់ បានរៀបចំការបោះឆ្នោតជ្រើសរើសប្រធានាធិបតី និងសមាជិកសភា។ លទ្ធផលជាបឋម បានបង្ហាញឲ្យឃើញថាបក្សប្រឆាំងប្រជាធិបតេយ្យជឿនលឿន (DPP) ដឹកនាំដោយលោកស្រី Tsai Ing-wen បានទទួលជ័យជម្នះលើបក្សកាន់អំណាចគួរមិនតាង (KMT)ដែល ដឹកនាំដោយលោក ម៉ា យិនជឺ ដែលមានសំឡេង ៦៨ ទល់នឹង៣៥ នៃអាសនៈសរុប១១៣។
លោកស្រី Tsai Ing-wen បានក្លាយជាស្ត្រីទីមួយដែលបានក្លាយជាប្រធានាធិបតីតៃវ៉ាន់ក្នុងប្រវត្តិសាស្ត្រនយោបាយគិតចាប់ពីឆ្នាំ១៩៤៩នៃការបង្កើតដែនកោះមួយនេះ។ ជ័យជម្នះនេះ គេមិនអាចប្រកែក បាននោះទេ គឺដោយសារគោលនយោបាយនៃការប្រកាសឯករាជ្យកោះតៃវ៉ាន់ចេញពីចិន។
ជារឿងប្រវត្តិសាស្ត្រមួយទៀតនោះគឺ ក្នុងចំណោមអាសនៈនៃសភាដែលបក្សគួរមិនតាងទទួលបាន៣៥នៃអាសនៈសរុប១១៣ ក៏មានបេក្ខភាពតំណាងរាស្ត្រស្ត្រីតៃវ៉ាន់ដែលមានសញ្ជាតិដើមកម្ពុជានៅក្នុងនោះផងដែរ។ ហើយនោះ គឺលោកស្រី Lin Li Chan ដែលសារព័ត៌មានVOA បានចុះផ្សាយថា លោកស្រី ឈរនៅក្នុងលំដាប់ទី៤នៃបញ្ជីតំណាងរាស្ត្រនៃបក្សនោះ។
តំណែងនៅក្នុងសភានេះ បានធ្វើឲ្យលោកស្រី Lin Li Chan ក្លាយជាជនអន្តោប្រវេសន៍ទីមួយហើយដែលកាន់តំណែងជាតំណាងរាស្ត្រក្នុងប្រវត្តិសាស្ត្រនយោបាយនៅក្នុងដែនកោះតៃវ៉ាន់។
សូមបញ្ជាក់ផងដែរថា លោកស្រី Lin Li-chan បានរៀបការជាមួយបុរសតៃវ៉ាន់តាមរយៈការផ្គូរផ្គងរបស់មេអណ្ដើកតាំងពីពេលលោកស្រីមានអាយុ ២០ឆ្នាំមកម្ល៉េះ។ ការរៀបការនេះ ដ្បិតនៅពេលនោះ គ្រួសារមានជីវភាពក្រីក្រ។ លោកស្រី Lin Li-chan ក៏បានបញ្ចប់ការសិក្សាកម្រិតបរិញ្ញាបត្រជាន់ខ្ពស់ និងទទួលបានពានរង្វាន់ជាជនអន្តោប្រវេសន៍ឆ្នើមផងដែរ៕
© រក្សាសិទ្ធិដោយ thmeythmey.com