អន្តរជាតិ
អូស្ត្រាលី ប្រាប់ចិនបញ្ឈប់សកម្មភាពនៅសមុទ្រចិនខាងត្បូងបើមិនចង់ប្រឈមជាមួយអាមេរិក
× អវត្តមានដំណោះស្រាយនៃជម្លោះសមុទ្រចិនខាងត្បូងរវាងចិន និងភាគីពាក់ព័ន្ធនៃរដ្ឋអាស៊ានបាននិងកំពុងរុញច្រានជម្លោះនេះ មិនត្រឹមតែជាក្តីបារម្ភក្នុងតំបន់ប៉ុណ្ណោះនោះទេ តែកំពុងតែស្ថិតក្នុងការចាប់អារម្មណ៍ពីសហគមន៍អន្តរជាតិទៀតផង។ អាមេរិករួមទាំងសម្ព័ន្ធមិត្តរបស់ខ្លួន គឺអូស្ត្រាលីដែលរដ្ឋខាងក្រៅ កំពុងតែប្រលូកខ្លួនយ៉ាងជ្រៅ ក្រោមរូបភាពនៃការរក្សាសន្តិភាព និងសន្តិសុខ ដើម្បីប្រឆាំងនឹងសកម្មភាពរបស់ចិន ដែលកំពុងតែកើនអំណាចនៅក្នុងតំបន់។
លោកនាយករដ្ឋមន្ត្រីអូស្ត្រាលី Malcolm Turnbull បានទទួចឲ្យរដ្ឋាភិបាលចិន បញ្ឈប់សកម្មភាពនៅក្នុងតំបន់សមុទ្រចិនខាងត្បូង ដើម្បីបញ្ចៀសការប្រឈមមុខគ្នាជាមួយនឹងរដ្ឋាភិបាលអាមេរិក។ ការអះអាងនេះ ត្រូវបានធ្វើឡើងក្នុងសុន្ទរថានាក្រុងវ៉ាស៊ិនតោន កាលពីថ្ងៃចន្ទទី ១៨ ខែមករា ម្សិលមិញមុនពេលនៃកិច្ចប្រជុំជាមួយនឹងប្រធានាធិបតីអាមេរិកលោកបារ៉ាក់ អូបាម៉ា។
យោងតាមភ្នាក់ងារព័ត៌មាន Reuters លោក Malcolm Turnbull បានរម្លឹកពីការលើកឡើងរបស់ប្រធានាធិបតីចិន លោក ស៊ី ជិនពីង ដោយផ្សាភ្ជាប់ជាមួយ នឹងការប្រឈមមុខគ្នារវាងចិន និងអាមេរិក ដែលបានអះអាងថា ចិននឹងចៀសឲ្យផុតពីស្ថានភាពមួយដែលបានបញ្ជាក់ក្នុងទ្រឹស្តី «Thucydides Trap »។ Thucydides Trap គឺជាទ្រឹស្តីមួយដែលយល់ឃើញថាការប្រឈមមុខគ្នា អាចនឹងកើតឡើងយ៉ាងផុយស្រួយ រវាងមហាអំណាចថ្មី និងមហាអំណាចចាស់ នៅក្នុងជម្លោះ ប្រសិនមិនមានភាគីណាមួយបន្ទន់ឥរិយាបថ។
ឆ្លៀតឱកាសក្នុងដំណើរទៅកាន់ក្រុងវ៉ាស៊ិនតោន ដើម្បីស្វែងរកដំណោះស្រាយលើវិបត្តិស៊ីរី និងអ៊ីរ៉ាក់ ជាមួយលោកអូបាម៉ា លោក Malcolm បានសង្កត់ធ្ងន់ថា ប្រសិនបើការចៀសវាងពីស្ថានភាពដូចដែលបញ្ជាក់ក្នុងទ្រឹស្តី Thucydides Trap គឺជាយុទ្ធសាស្ត្រស្នូលរបស់លោក ស៊ី មែននោះ ចិនគួរតែប្រយ័ត្នចំពោះសកម្មភាពខ្លួនបន្តិច។ លោក បន្ថែមទៀតថាចិន គួរតែបន្តសែ្វងរកដំណោះស្រាយ និងកសាងទំនុកចិត្តជាមួយប្រទេសជាតិខាង ដែលសំដៅលើភាគីពាក់ព័ន្ធជម្លោះនៃរដ្ឋអាស៊ាន។
ជម្លោះសមុទ្រចិនខាងត្បូង គឺជាជម្លោះដែនអធិបតេយ្យរវាងរដ្ឋអាស៊ាន ដែលរួមមានព្រុយណេ ម៉ាឡេស៊ី ហ្វីលីពីន និងវៀតណាម និងជាមួយនឹងចិន។ ជម្លោះនេះ កើតឡើងដ្បិត ចិនទាមទារស្ទើរតែទាំងស្រុង នៃតំបន់ជម្លោះតាមកត្តាប្រវត្តិសាស្ត្រ ខណៈរដ្ឋអាស៊ាន ទាមទារដោយយោងតាមផ្នែកច្បាប់។ អវត្តមាននៃដំណោះស្រាយ បានធ្វើចិន បន្តគោលនយោបាយវាតទីរបស់ខ្លួន ក្នុងការចូលទៅកាន់កាប់តំបន់ជម្លោះ និងថែមទាំងសាងសង់កោះសិប្បនិម្មិតដោយឯកតោភាគី ដែលត្រូវបានគេជឿជាក់ថា នឹងប្រែក្លាយជាមូលដ្ឋានយោធារបស់ចិនដ៏សំខាន់។
មិនខុសពីមេដឹកនាំមួយចំនួនផ្សេងទៀត លោក Malcolm ក៏បានទទូចឲ្យចិនដោះស្រាយជម្លោះនោះ ដោយយោងតាមច្បាប់អន្តរជាតិ និងចូលរួមដោះស្រាយជាមួយនឹងហ្វីលីពីននៅមជ្ឈត្តការអន្តរជាតិក្រុងឡាអេ។ មជ្ឈត្តការនៃតុលាការអន្តរជាតិក្រុងឡាអេ កំពុងតែដំណើរការលើសំណុំរឿងសមុទ្រចិនខាងត្បូង ក្រោមបណ្តឹងរបស់ហ្វីលីពីន ប្រឆាំងចិន តែចិនបានបដិសេធមិនចូលរួមនោះទេ។
សូមបញ្ជាក់ផងដែរ អាមេរិក និងអូស្ត្រាលី គឺជារដ្ឋខាងក្រៅនៃជម្លោះសមុទ្រចិនខាងត្បូង ដែលប្រលូកខ្លួនយ៉ាងជ្រៅ ក្នុងជម្លោះនេះ ដើម្បីប្រឆាំងនឹងចិន។ កន្លងមកអាមេរិក បានបញ្ជូននាវាល្បាត និងយន្តហោះទម្លាក់គ្រាប់ B-52 មកកាន់តំបន់ជម្លោះសមុទ្រចិនខាងត្បូង ដែលស្ថិតនៅក្បែរតំបន់កោះសិប្បនិម្មិតរបស់ចិន។ រីឯអូស្ត្រាលី ក៏បានបញ្ជូនយន្តហោះស៊ើបការណ៍មកកាន់តំបន់នោះដែរ។ សកម្មភាពដែលគេមើលឃើញថាជាកិច្ចអន្តរាគមន៍ក្នុងតំបន់ជម្លោះនោះ ត្រូវបានអាមេរិក និងអូស្ត្រាលី ចាត់ទុកថាជាការអនុវត្តសិទិ្ធសេរីនៃការហោះហើរ និងការធ្វើនាវាចរណ៍ក្រោមច្បាប់អន្តរជាតិ៕
Tag:
ចិន
អូស្ត្រាលី
សហរដ្ឋអាមេរិក
សមុទ្រខាងត្បូង
© រក្សាសិទ្ធិដោយ thmeythmey.com