អន្តរជាតិ
តម្លៃប្រេងឆៅធ្លាក់ដល់ ២២.៤៨ ដុល្លារក្នុង១បារ៉ែល តែ OPEC បន្តនៅស្ងៀមស្ងាត់
× មកទល់ពេលនេះ តម្លៃប្រេងរបស់អង្គការនៃប្រទេសនាំចេញប្រេង (OPEC) បានបន្តធ្លាក់ចុះដល់កម្រិត មួយគួរព្រួយបារម្ភ។ វា គឺជារឿងល្អមួយសម្រាប់ប្រទេសដែលនាំចូលប្រេង ដ្បិតពួកគេ អាចចំនាយថវិកាតិចជាងមុន។ ផ្ទុយទៅវិញ វា គឺជារឿងមួយគួរបារម្ភសម្រាប់ប្រទេសដែលផលិតប្រេងនិងនាំចេញប្រេង និងម៉ាក្រូសេដ្ឋកិច្ចជារួម។ តែអង្គការនៃប្រទេសនាំចេញប្រេង មិនទាន់មានចំណាត់ការជាបន្ទាន់ណាមួយ ដើម្បីឆ្លើយតបទៅនឹងការធា្លក់ថ្លៃនេះនៅឡើយនោះទេ។
បើយោងតាមតារាងតម្លៃប្រេងនៃអង្គការនៃប្រទេសនាំចេញប្រេង(OPEC) នៅថ្ងៃទីពុធទី២០ ខែមករា កន្លងទៅនេះ ប្រេងឆៅមួយបារ៉ែល(១បារ៉ែល=១៥៨.៩៨៧២លីត្រ)ធា្លក់ថ្លៃរហូត២២.៤៨ដុល្លារអាមេរិក។ ការធ្លាក់ចុះនៃតម្លៃប្រេងនេះ បានអូសបន្លាយរយៈជាងមួយឆ្នាំហើយ ដោយមិនមានដំណោះស្រាយប្រសិទ្ធភាពត្រូវបានធ្វើ។
រដ្ឋាភិបាលនីហ្សេរីយ៉ា ដែលជាសមាជិកមួយនៃអង្គការនៃប្រទេសនាំចេញប្រេង នៅថ្ងៃទី២១ ខែមករាម្សិលមិញ បានស្នើឲ្យមានកិច្ចប្រជុំជាបន្ទាន់មួយនៃអង្គការនោះ។ រដ្ឋមន្ត្រីប្រេងនីហ្សេរីយ៉ា លោក Emmanuel Ibe Kachikwu បានអះអាងនៅវេទិកាសេដ្ឋកិច្ចពិភពលោកនៅក្រុងដាវូសនៃប្រទេសស្វ៊ីស លោកបានទទួចឲ្យមានកិច្ចប្រជុំជាមួយនឹងប្រទេសសមាជិក OPEC ដើម្បីចូលរួមរកដំណោះស្រាយជាមួយគ្នា និងកាត់បន្ថយការនាំចេញប្រេងច្រើនលើសលប់ពេក។
មិនខុសពីនីហ្សេរីយ៉ា វេណេស៊ុយអេឡា ដែលជាប្រទេសមួយក្នុងចំណោមប្រទេសដែលនាំប្រេងចេញច្រើនបំផុតរបស់ OPEC ក៏បានស្នើឲ្យមានកិច្ចប្រជុំជាបន្ទាន់មួយនៅដើមខែកុម្ភៈ។ រដ្ឋមន្ត្រី ប្រេង និងរ៉ែ វេណេស៊ុយអេឡា លោក Eulogio del Pino សង្កត់ថា កិច្ចប្រជុំគួរតែប្រារព្ធឡើងនៅដើមកុម្ភៈនេះដើម្បីចេញគោលលនយោបាយមួយឲ្យបានឆាប់រហ័សក្នុងការធ្វើឲ្យទីផ្សារប្រេងមានស្ថិរភាពឡើងវិញ។
យ៉ាងណាក៏ដោយ សំណើទាំងនេះ មិនមែនទើបតែធ្វើឡើងជាលើកដំបូងនោះទេ ពោលគឺ ការកោះប្រជុំត្រូវបានស្នើជាច្រើនលើកច្រើនសារមកហើយ តែសមាជិកភាគច្រើននៃ OPEC ហាក់ដូចជាមិន សូវអើពើប៉ុន្មាននោះទេ។ ជាពិសេសនោះគឺ អារ៉ាប់ប៊ី សាអូឌីត ដែលប្រទេសនាំប្រេងចេញច្រើនជាង គេរបស់ OPEC នៅតែមិនចាប់អារម្មណ៍ជាមួយនឹងបញ្ហា ខណៈបន្តផ្គត់ផ្គង់ប្រេងលើសលប់ពីតម្រូវការដែលវាជាផ្នែកមួយធ្វើឲ្យតម្លៃប្រេងបន្តធ្លាក់ចុះ។
តម្លៃប្រេងឆៅលើទីផ្សារអន្តរជាតិបានបន្តធ្លាក់ចុះមកនៅក្រោម៣០ដុល្លារក្នុងមួយបារ៉ែល ដែលវាជាការធ្លាក់ថ្លៃខ្លាំងបំផុតក្នុងរយៈពេល១២ឆ្នាំកន្លងមកនេះ ។ តម្លៃប្រេងឆៅ បានធ្លាក់សឹងតែ៧៥ភាគរយ ចាប់តាំងពីខែវិច្ឆិកា ឆ្នាំ២០១៥ ដោយសារតែការផ្គត់ផ្គង់លើសតម្រូវការ ។
ការធ្លាក់ចុះនេះ បាននិងកំពុងគំរាមកំហែងដល់ប្រទេសដែលជាសមាជិកOPEC ដែលសេដ្ឋកិច្ចពឹង ផ្អែកទៅលើការលក់ប្រេងទាំងស្រុងនោះ។ ជាក់ស្តែង វេណេស៊ុយអេឡា កំពុងតែព្រួយបារម្ភខ្លាំង ដ្បិត ចំណូលរបស់ប្រទេស៩៦ភាគរយត្រូវពឹងផ្អែកទៅលើការនាំចេញនៃប្រេង។ ដោយឡែកសម្រាប់លទ្ធ ភាពនៃដំណោះស្រាយរបស់OPEC វិញ គឺពិបាកនឹងបង្កើតឡើងណាស់ ដ្បិតបច្ចុប្បន្នប្រទេសសមាជិកOPEC ខ្លួនឯងស្រាប់នោះ កំពុងតែប្រឈមមុខគ្នា និងរង្គោះរង្គើរខ្លាំង។ នោះគឺ អ៉ារ៉ាប់ប៊ីសាអូឌីត បានផ្តាច់ទំនាក់ទំនងការទូតជាមួយអីរ៉ង៕
© រក្សាសិទ្ធិដោយ thmeythmey.com