រត់ប្រណាំងចម្ងាយឆ្ងាយលើកដំបូងនៅកម្ពុជាមានអត្តពលិកជិត ២៥០នាក់

កីឡាជាតិ

រត់ប្រណាំងចម្ងាយឆ្ងាយលើកដំបូងនៅកម្ពុជាមានអត្តពលិកជិត ២៥០នាក់

23, Jan 2016 , 8:00 am

រូបភាព

ដោយ:

ព្រឹត្តិការណ៍រត់ប្រណាំងចម្ងាយឆ្ងាយ១២៨គីឡូម៉ែត្រប្រចាំឆ្នាំ២០១៦ (Ultra Trail Angkor 2016) ដែលជាព្រឹត្តិការណ៍លើកដំបូងមិនធ្លាប់មាននៅកម្ពុជានឹងធ្វើការប្រកួតនៅលើទឹកដីអង្គរ ខេត្តសៀមរាប នាថ្ងៃទី២៣ ដល់ថ្ងៃទី២៤ ខែមករា។ការប្រកួតនេះដែរមានអត្តពលិកចូលរួមប្រកួតជិត ២៥០នាក់ មកពី២៦ប្រទេសលើពិភពលោក ប៉ុន្តែមានអត្តពលិកកម្ពុជា១០នាក់ប៉ុណ្ណោះ។

ការរត់ប្រណាំងចម្ងាយឆ្ងាយ១២៨គីឡូម៉ែត្រទាំងថ្ងៃទាំងយប់ប្រចាំឆ្នាំ២០១៦Ultra Trail Angkor 2016 បែបទេសចរណ៍ និងកម្សាន្ត កាត់ធម្មជាតិ ព្រៃប្រឹក្សា ប្រាង្គប្រាសាទ រមណីយដ្ឋាន វាលស្រែ ផ្លូវលំ និងកាត់តាមភូមិឃុំ ប្រជាពលរដ្ឋ នៅលើទឹកដីខេត្តសៀមរាប អង្គរ នាថ្ងៃទី២៣ ដល់ថ្ងៃទី២៤ ខែមករាមានអត្តពលិកចូលរួមប្រកួតជិត២៥០នាក់ មកពី២៦ប្រទេស ប៉ុន្តែក្នុងនោះមានអត្តពលិកកម្ពុជាតែ១០នាក់ប៉ុណ្ណោះ។ហើយអត្តពលិកភាគច្រើនមកពីអាហ្វ្រិកខាងត្បូង អូស្ត្រាលី សហរដ្ឋអាមេរិក បែលហ្ស៊ិក ឥណ្ឌូនេស៊ី ស្វីស សិង្ហបុរី ម៉ាឡេស៊ី និងថៃ។ នេះបើយោងតាម លោក វ៉ាត់ ចំរើន អនុរដ្ឋលេខាធិការក្រសួងទេសចរណ៍ និងជាអគ្គលេខាធិការគណៈកម្មាធិការជាតិអូឡាំពិកកម្ពុជា នៅក្នុងសន្នីសីទសារព័ត៌មានកាលពីម្សិលមិញ នៅ NOCC។

ជាមួយគ្នានេះដែរអ្នកចាត់ការទូទៅ លោក Adriano Dennhadtបានឱ្យដឹងថា មកទល់ពេលនេះអត្តពលិកដែលបានចុះឈ្មោះចូលរួមប្រកួតបានមកដល់កម្ពុជា ៩០ភាគរយហើយ។ ហើយអត្តពលិកទាំងនោះកំពុងសម្រាក និងទស្សនាតំបន់ទេសចរណ៍នៅក្នុងខេត្តសៀមរាប ជាពិសេសប្រាសាទអង្គរវត្ត ហើយពួកគេក៏បាននិងកំពុងមើលផ្លូវរត់ផងដែរ។

លោក វ៉ាត់ ចំរើន បានបញ្ជាក់ទៀតថា ព្រឹត្តិការណ៍រត់ចម្ងាយឆ្ងាយដែលមានការសហការរវាងក្រសួងទេសចរណ៍ គណៈកម្មាធិការជាតិអូឡាំពិកកម្ពុជាអាជ្ញាធរខេត្តសៀមរាប និងអាជ្ញាធរអប្សរា ជាមួយអ្នកជំនាញនេះ ដោយទទួលបានច្បាប់អនុញ្ញាតពីរាជរដ្ឋាភិបាលកម្ពុជាហើយកីឡាបែបវប្បធម៌មួយនេះបាននាំមកនូវផលប្រយោជន៍ជាច្រើនដល់កម្ពុជា ក្នុងការផ្សព្វផ្សាយកីឡាវប្បធម៌ ក៏ដូចជាវិស័យទេសចរណ៍កម្ពុជាទៅកាន់ពីភពលោក។

លោក Adriano Dennhadt បានបញ្ជាក់ថា ព្រឹត្តិការណ៍រត់ប្រណាំងនេះមានការសហការជាមួយក្រុមហ៊ុនទេសចរណ៍បារាំងគឺក្រុមហ៊ុនPhoenix Voyages ដែលជាក្រុមហ៊ុនមួយមានទំនាក់ទំនងល្អជាមួយកម្ពុជា និងមានជំនាញខាងរៀបចំព្រឹត្តិការណ៍រត់ប្រណាំងឆ្លងកាត់ធម្មជាតិចម្ងាយឆ្ងាយនេះ។

លោក វ៉ាត់ ចំរើន បានបន្ថែមថាព្រឹត្តិការណ៍រត់ចម្ងាយឆ្ងាយបែបទេសចរណ៍ និងកម្សាន្តនេះមាន ៤ វិញ្ញាសា រត់ចម្ងាយ ៣២គីឡូម៉ែត្រ ចម្ងាយ ៣២គីឡូម៉ែត្រកាន់ឈើច្រត់ ចម្ងាយ៦៤គីឡូម៉ែត្រ និង១២៨គីឡូម៉ែត្រ។ អត្តពលិកដែលចូលរួមប្រកួតត្រូវបង់ប្រាក់ទៅតាមប្រភេទចម្ងាយនីមួយៗ ក្នុងនោះរត់ចម្ងាយ ៣២គីឡូម៉ែត្រ ត្រូវបង់៦០ដុល្លារ ខណៈចម្ងាយផ្លូវ៦៤គីឡូម៉ែត្រ ៩០ដុល្លារ និងរត់ចម្ងាយ១២៨គីឡូម៉ែត្រ ១៦០ដុល្លារ។ ហើយថវិកាដែលបានមកពីការចុះឈ្មោះក្នុងការរត់ប្រណាំងទាំងអស់នឹងយកទៅជួយដល់កុមារកំព្រាតាមរយៈអង្គការក្រៅរដ្ឋាភិបាលដែលមានសកម្មភាពជួយក្មេងកំព្រានៅកម្ពុជា។

គួរបញ្ជាក់ថា ការរត់ប្រណាំងចម្ងាយឆ្ងាយUltra Trail Angkor 2016 ដោយចេញដំណើរ និងមកដល់ទីនៅមុខប្រាសាទលីលានជល់ដំរីនៅលើទឹកដីអរិយធម៌អង្គរ ខេត្តសៀមរាប នឹងចាប់ផ្តើមនៅថ្ងៃទី២៣ ខែមករា វេលាម៉ោង៥ល្ងាច ដល់ថ្ងៃទី២៤ ខែមករា វេលាម៉ោង ៩ព្រឹក៕