អន្តរជាតិ
ប៉ូលិសអង់គ្លេសច្រលំតាមក្មេងប្រុសអាយុ១០ម្នាក់ ដោយសារកំហុសភាសាអង់គ្លេស
×![]()
ដោយ: ធីតា
ករណីភាន់ច្រលំមួយបានកើតឡើងនៅតំបន់Lancashire ប្រទេសអង់គ្លេសកាលពីខែធ្នូឆ្នាំ២០១៥កន្លងមក។មន្ត្រីប៉ូលិសបានតាមដានសិស្សសាលាអាយុ១០ម្នាក់ដល់ផ្ទះដោយសារគេសរសេរភាសាអង់គ្លេសច្រលំថា «I live in a terrorist house» ដែលតាមពិតកុមារានោះចង់សរសេរថា «I live in a terraced house» ។
ប៉ូលិសបានតាមដានហើយធ្វើការឆែកឆេរផ្ទះរបស់សិស្សសាលាដែលរៀននៅLancashire PrimarySchool ក្រោយទទួលបានការរាយការណ៍ពីសំណាក់គ្រូបង្រៀនម្នាក់ដែលគិតថាក្មេងប្រុសមូស្លីមរូបនោះមានគ្រួសារជាសមាជិកក្រុមភេរវជន។ការភ្ញាក់ផ្អើលរបស់គ្រូបង្រៀននោះកើតឡើងបន្ទាប់ពីបានឃើញសិស្សរបស់ខ្លួន សរសេរថា «I live a terrorist house» [ខ្ញុំរស់នៅក្នុងផ្ទះភេរវជនមួយ]។
យោងតាមការផ្សាយរបស់BBC គ្រួសាររបស់ក្មេងប្រុសមានការស្រងាកចិត្តយ៉ាងខ្លាំងនៅពេលដែលបានឃើញវត្តមានរបស់ក្រុមប៉ូលិសនៅផ្ទះខ្លួនហើយថែមទាំងហៅពួកគាត់ទៅធ្វើការសាកសួរ។សមាជិកមួយចំនួននៅក្នុងគ្រួសារនៅតែមានអារម្មណ៍ភ័យខ្លាចដោយបាយមិនបានសម្រាន្តមិនលក់អស់ជាច្រើនថ្ងៃ។
ក្រោយការសាកសួរប៉ូលិសបានរកឃើញថានេះជាករណីភាន់ច្រលំទាំងស្រុងដែលតាមពិតសិស្សរូបនោះចង់សរសេរថា « a terraced house» មិនមែន «a terrorist house» នោះឡើយ។ ប៉ូលិសបានបញ្ឈប់ការស៊ើបអង្កេតរបស់ខ្លួន ដោយប្រកាសថា វាជាការភាន់ច្រឡំ។
ទោះបីជាយ៉ាងណាក៏ដោយ គ្រួសារក្មេងប្រុសនៅតែមិនទាន់ស្ងប់ចិត្ត ដោយពួកគេចង់ឲ្យមានការសុំទោសជាសាធារណៈពីសំណាក់ប៉ូលិស និងថ្នាក់ដឹកនាំសាលារៀន។ ក្រោមលក្ខខណ្ឌមិនបញ្ចេញឈ្មោះ ស្ត្រីម្នាក់ដែលជាសាច់ញាតិក្មេងប្រុស បាននិយាយប្រាប់ BBC ថា៖ «អ្នកអាចគិតបានហើយថា រឿងបែបនេះ គួរតែកើតលើមនុស្សអាយុ៣០ឆ្នាំ មិនមែនក្មេងប្រុសមិនទាន់ដឹងក្តីនោះឡើយ។ ពេលគេពិតជាមានការភ័យខ្លាចណាស់ក្នុងការសរសេរពាក្យអ្វីមួយ»។
អ្នកប្រើប្រាស់បណ្តាញសង្គមជាច្រើន បាននាំគ្នាបន្ទោសគ្រូបង្រៀន ដោយប្រញាប់ប្រញាល់រាយការណ៍ទៅប៉ូលិស និងមិនបានសាកសួរណែនាំបន្តិចទាល់តែសោះទាក់ទងនឹងសំណេរកូនសិស្សរបស់ខ្លួន៕
© រក្សាសិទ្ធិដោយ thmeythmey.com
