អន្តរជាតិ
វីរុស Zika ដែលគ្មានថ្នាំព្យាបាលកំពុងរាតត្បាតនៅតំបន់អាស៊ី
× ភ្នំពេញ៖ នៅឆ្នាំ២០១០ វីរុស Zika ត្រូវបានរកឃើញនៅកម្ពុជា និងឆ្នាំ២០១២ ដល់ឆ្នាំ២០១៤ រកឃើញនៅក្នុងប្រទេសថៃតែត្រូវបានធ្វើការទប់ស្កាត់ទាន់ពេលបានមួយចំនួន។ ចំណែកខែមករា ឆ្នាំ២០១៦ ជំងឺនេះត្រូវបានគេរកឃើញនៅក្នុងប្រទេសតៃវ៉ាន។ នេះបើយោងតាមការចុះផ្សាយរបស់នាយកដ្ឋានប្រយុទ្ធនឹងជំងឺឆ្លង CDC។
ជំងឺដែលបង្ករដោយវីរុស Zika នេះមានរោគសញ្ញា ដូចជា គ្រុនក្ដៅស្រាល ឈឺក្បាល កន្ទួលក្រហមលើស្បែក ក្រហមភ្នែក ឈឺសន្លាក់ ហើយភាគច្រើនជាវិញពី២ទៅ៧ថ្ងៃ។ សម្រាប់អត្រាស្លាប់ដែលបណ្ដាលដោយជំងឺនេះមានកម្រិតតិចតួច ប៉ុន្តែវីរុសនេះអាចវិវត្តន៍ទៅជាទន់ដៃជើង ទារកអាចស្លាប់ក្នុងផ្ទៃម្ដាយ និងក្បាលទារកតូចជាដើម។ វីរុសនេះ ក៏មិនទាន់មានថ្នាំព្យាបាល និងវ៉ាក់សាំងសម្រាប់ការពារនៅឡើយនោះទេ។ ចំណែកការព្យាបាល គឺត្រូវធ្វើតាមការគាំទ្រវេជ្ជសាស្ត្រ។ ដើម្បីបង្ការជំងឺនេះ គឺត្រូវបំផ្លាញជំរកមូល និងការពារកុំឲ្យមូសខ្លាខាំ។
ទោះជាយ៉ាងណាសម្រាប់ប្រទេសកម្ពុជាជំងឺនេះ នៅមានអត្រាគ្រោះថ្នាក់នៅទាបនៅឡើយ តែវិធានការបង្ការត្រូវតែ ពង្រឹងជាប់ជានិច្ច។ នាយដ្ឋានប្រយុទ្ធនឹងជំងឺឆ្លង CDC នៃក្រសួងសុខាភិបាល បន្តរពង្រឹងប្រព័ន្ទតាមដានជំងឺ តាមរយៈការធ្វើតេស្ហអ្នកជំងឺ និងពលរដ្ឋដែលត្រលប់មកពី អាហ្វ្រិក និង អាមេរិក។ សម្រាប់ពលរដ្ឋដែលសង្ស័យថាមានជំងឺនេះ ត្រូវទៅពិគ្រោះជំងឺនៅមន្ទីរពេទ្យ និងប្រាប់គ្រូពេទ្យអំពី ប្រវត្តន៍នៃការធ្វើដំណើររបស់ខ្លួន។
គួបញ្ជាក់ថា វីរុស នេះរកឃើញដំបូងនៅលើសត្វស្វាក្នុងឆ្នាំ១៩៤៧ និងលើមនុស្ស ក្នុងឆ្នាំ១៩៥២ នៅប្រទេស Uganda នៃទ្វីបអាហ្វ្រិក។ វីរុសZika រាតត្បាតខ្លាំងឡើងបន្ទាប់ពីការទាត់បាល់ពិភពលោកនៅប្រទេសប្រេស៊ីលឆ្នាំ២០១៤ ហើយធ្លាប់បានផ្ទុះឡើងនៅទ្វីបអាហ្វ្រិក អាមេរិក និង អាស៊ីប៉ាស៊ីហ្វិកផងដែរ៕
© រក្សាសិទ្ធិដោយ thmeythmey.com