លោក ហូឡង់ ត្រៀមចុះកិច្ចព្រមព្រៀងលក់យន្តហោះចម្បាំងឲ្យឥណ្ឌា

ប្រធានាធិបតីបារាំងលោក ហ្វ្រង់ស្វ័រ ហូឡង់ អញ្ជើញទៅដល់ប្រទេសឥណ្ឌានៅថ្ងៃអាទិត្យនេះ ក្នុង គោល បំណង ពង្រឹងកិច្ចសហប្រតិបត្តិការទ្វេភាគី។ គេរំពឹងថា លោកនឹងចុះហត្ថលេខាលើកិច្ចព្រមព្រៀងពាក់ព័ន្ធកិច្ចការការពារជាតិដូចកិច្ចព្រមព្រៀងទិញយន្តហោះចម្បាំងពីបារាំងផង។ ហើយបញ្ហាភេរវកម្មក្លាយប្រធានបទសំខាន់ក្នុងកិច្ចពិភាក្សារវាងលោកនិងនាយករដ្ឋមន្ត្រីឥណ្ឌា ។ នេះបើយោងតាមទីភ្នាក់ងារព័ត៌មាន AFP។

ប្រមុខរដ្ឋបារាំង លោក ហ្វ្រង់ស្វ័រ ហូឡង់ ចាប់ផ្តើមដំណើរទស្សនកិច្ចផ្លូវរដ្ឋរបស់លោកមកកាន់ប្រទេសឥណ្ឌានៅថ្ងៃអាទិត្យ ទី ២៤ មករា នេះ។ ដំណើរទស្សនកិច្ចនេះផ្តោតលើការពង្រឹងកិច្ចសហប្រតិបត្តិការ និងទំនាក់ទំនងទ្វេភាគីរវាងមហាអំណាចទាំងពីរ។

នៅថ្ងៃអាទិត្យនេះលោក ហូឡង់ អមដំណើរដោយអ្នកជំនួញបារាំងធំជាច្រើននាក់ផងនឹងជួបជាមួយនាយករដ្ឋមន្ត្រីឥណ្ឌាលោក នារិន្ទ្រាម៉ូឌី នៅទីក្រុង Chandigarh ដែលស្ថិតនៅភាគខាងជើងរដ្ឋធានីដែលី។ ទីក្រុងនេះត្រូវបានសាងសង់តាមប្លង់គូសឡើងដោយស្ថាបត្យករដ៏ល្បីល្បាញរបស់បារាំងលោក Le Corbusier កាលពីជាង ៦០ឆ្នាំមុន។

នៅក្នុងដំណើរទស្សនកិច្ចនេះផងដែរ គេសង្កេតឃើញមានការរឹតបន្តឹងសន្តិសុខខ្លាំងនៅក្នុងទីក្រុងនេះ ហើយ និងតំបន់ដែលប្រធានាធិបតីបារាំងឆ្លងកាត់និងទស្សនកិច្ចផង។ ប៉ូលិសប្រដាប់ដោយអាវុធ និងកម្លាំងទាហានរាប់រយនាក់យាមកាមនៅតាមផ្លូវនិងទីកន្លែងសំខាន់មួយចំនួនទៀត។

បន្ទាប់ពីចាកចេញទីក្រុង Chandigarh លោក ហូឡង់ នឹងបន្តមកកាន់រដ្ឋធានី ដែលី វិញដើម្បីពិភាក្សាជាមួយលោក ម៉ូឌី លើបញ្ហាសំខាន់ៗជាពិសេសកិច្ចសហប្រតិការពាណិជ្ជកម្ម សន្តិសុខ ថាមពល និងការប្រឆាំងភេរវកម្មជាដើម។

ប្រធានាធិបតីបារាំង នឹងចុះហត្ថលេខាលើកិច្ចព្រមព្រៀងទាក់ទិញវិស័យការពារជាតិ ជាពិសេសកិច្ចព្រមព្រៀងលក់យន្តហោះចម្បាំងទៅឲ្យឥណ្ឌាផង។ ឥណ្ឌាកន្លងទៅបានសុំទិញយន្តហោះចម្បាំង Rafalesចំនួន ៣៦ គ្រឿងដើម្បីពង្រឹងកម្លាំងយោធាជើងអាកាសរបស់ខ្លួន ទប់ទល់ប្រទេសជិតខាងមានប៉ាគីស្ថាននិងចិនផង។ ប៉ុន្តែភាគីឥណ្ឌា និងបារាំងនៅបន្តចរចាមិនចេះត្រូវរ៉ូវគ្នា ហើយ រហូតមកដល់មានដំណើរទស្សនកិច្ចរបស់លោក ហូឡង់ពេលនេះ ក៏មិនទាន់មានកិច្ចព្រមព្រៀងពេញលេញមួយលេចចេញជារួបរាងដែរ។ យ៉ាងណាក៏ដោយ ភាគីទាំងពីររំពឹងយ៉ាងមុតមាំថា កិច្ចព្រមព្រៀងនេះនឹងត្រូវចុះហត្ថលេខាងក្នុងពេលប៉ុន្មានថ្ងៃនៃទស្សនកិច្ចនេះ។

ពាក់ព័ន្ធបញ្ហាសន្តិសុខលោក ហូឡង់ ប្រហែលជានឹងលើកយកបញ្ហាភេរវកម្ម មកជជែកជាមួយប្រមុខរដ្ឋាភិបាលឥណ្ឌា ព្រោះប្រទេសទាំងពីរសុទ្ធតែរងគ្រោះដោយសារបញ្ហានេះដូចគ្នា។ កាលពីឆ្នាំ ២០០៨ ក្រុមភេរវជនវាយប្រហារនៅទីក្រុង ម៉ុមប៉ៃ សម្លាប់មនុស្សអស់១៦៦នាក់ហើយមកដល់ចុងឆ្នាំ ២០១៥ ក្រុងប៉ារី ក៏រងការវាយប្រហារដូចគ្នាដែលបណ្តាលឲ្យមនុស្សជាង១០០នាក់ស្លាប់ផង។

ចំណែកបញ្ហាថាមពល បារាំងនិងឥណ្ឌានឹងត្រៀមប្រកាសពីគម្រោងសាងសង់រោងចក្រថាមពលអគ្គិសនីដើរដោយថាមពលនុយក្លេអ៊ែរចំនួន ៦ ដែលក្រុមហ៊ុនបារាំងទទួលសាងសង់នៅភាគខាងលិចរដ្ឋMaharashtra។

អ្វីដែលពិសេស លោក ហ្វ្រង់ស្វ័រ ហូឡង់ នឹងក្លាយជាភ្ងៀវពិសេសដែលចូលរួមក្នុងថ្ងៃបុណ្យប្រកាសរដ្ឋធម្មនុញ្ញឥណ្ឌាដែលមានការដើរក្បួនព្យុហយាត្រារបស់កងទ័ពឥណ្ឌានៅថ្ងៃអង្គារខាងមុខនេះដែរ។ លោក ហូឡង់ ក្លាយជាប្រមុខរដ្ឋបរទេសទីពីរ បន្ទាប់ពីលោក បារ៉ាក់ អូបាម៉ា ដែលត្រូវបានឥណ្ឌាអញ្ជើញឲ្យធ្វើជាភ្ងៀវពិសេសក្នុងបុណ្យជាតិឥណ្ឌានេះ៕