អន្តរជាតិ
អាហ្វ្រិកចង់បានកៅអីសមាជិកអចិន្ត្រៃយ៍ក្រុមប្រឹក្សាសន្តិសុខ UN
× ប្រធានាធិបតីស៊ីមបាវ៉េលោក រ៉ូបឺត មូហ្កាបេ ដែលជាប្រធានសហភាពអាហ្វ្រិកបាននិយាយថា សហភាពអាហ្វ្រិក នៅតែចិញ្ចឹមចិត្តចង់មានតំណាងរបស់ខ្លួនសម្រាប់កៅអីសមាជិកអចិន្ត្រៃយ៍របស់ក្រុមប្រឹក្សាសន្តិសុខ និងចង់បានការកែទម្រង់ក្រុមប្រឹក្សានេះ កុំឲ្យក្រុមលោកខាងលិចមានឥទ្ធិពលខ្លាំងពេក។ លោក មូហ្កាបេឡើងបែបនេះកើតឡើងនៅមុនការបើកសម័យប្រជុំរបស់សហភាពអាហ្វ្រិកនៅថ្ងៃទី៣០ ខែមករា។
សហភាពអាហ្វ្រិកនឹងចាប់ផ្ដើមឡើងវិញគំនិតកែទម្រង់ក្រុមប្រឹក្សាសន្តិសុខអង្គការសហប្រជាជាតិ ក្នុងពេលកិច្ចប្រជុំរបស់ខ្លួនក្នុងទីក្រុងអាឌីស អាបេបា។ ហើយសហភាពអាហ្វ្រិកនឹងនៅតែពិភាក្សាលើគំនិតកែទម្រង់នេះឲ្យខានតែបាន ទោះជាសមាជិកអចិន្ត្រៃយ៍ទាំង៥របស់ក្រុមប្រឹក្សាសន្តិសុខមិនអើពើលើរឿងកែទម្រង់នេះក៏ដោយ។
ទ្វីបអាហ្វ្រិកគឺជាតំបន់ដែលទទួលយកបេសកកម្មថែរក្សាសន្តិភាពច្រើនជាងគេ តែតំបន់នេះស្ទើរតែគ្មានសំឡេងទាល់តែសោះក្នុងក្រុមប្រឹក្សាសន្តិសុខ ដែលជាស្ថាប័នត្រួតពិនិត្យលើកិច្ចការនេះ។ ដោយសារមូលហេតុនេះ ទើបសហភាពអាហ្វ្រិកចង់បានកៅអីដល់ទៅពីរក្នុងក្រុមប្រឹក្សាសន្តិសុខសម្រាប់ប្រទេសអាហ្វ្រិក។
លើសពីនេះ ក្នុងជំនួបជាមួយប្រធានាធិបតីអេក្វាទ័រ ប្រធានាធិបតីស៊ីមបាវ៉េលោក រ៉ូបឺត មូហ្កាបេ ដែលជាប្រធានសហភាពអាហ្វ្រិកនិយាយថា ក្នុងពេលកិច្ចប្រជុំសហភាពអាហ្វ្រិក លោកនឹងពិភាក្សាពីគោលជំហររបស់អាហ្វ្រិកពាក់ព័ន្ធនឹងរឿងជាច្រើន ដែលរួមទាំងការកែទម្រង់ក្រុមប្រឹក្សាសន្តិសុខផងដែរ។ ជារឿយៗ លោក មូហ្កាបេ មានជំហរប្រឆាំងនឹងឥទ្ធិពលរបស់ក្រុមលោកខាងលិចនៅលើឆាកអន្តរជាតិ ហើយតែងរិះគន់យ៉ាងចាស់ដៃទៀតផង។
សូមរម្លឹកថា ក្រុមប្រឹក្សាសន្តិសុខគឺជាស្ថាប័នមានឥទ្ធិពលបំផុតរបស់អង្គការសហប្រជាជាតិ ដែលមានតួនាទីរក្សាសន្តិសុខនិងសន្តិភាពនៅទូទាំងពិភពលោក។ ក្រុមប្រឹក្សានេះមានសមាជិក១៥ប្រទេស ដែលក្នុងនោះមានសមាជិកអចិន្ត្រៃយ៍៥ប្រទេស។ ប្រទេសទាំង៥នោះ មានសិទ្ធិវ៉េតូលើការសម្រេចចិត្តរបស់ក្រុមប្រឹក្សាផងដែរ។
មួយវិញទៀតនោះ ក្រុមប្រឹក្សានេះ ក៏ទទួលរងការរិះគន់ថា គ្មានប្រជាធិបតេយ្យនិងមិនបម្រើផលប្រយោជន៍ទូទៅឡើយ។ នេះក៏ដោយសារ ក្រៅពីប្រទេសចិន ប្រទសសមាជិកអចិន្ត្រៃយ៍៤ទៀត គឺមកពីតំបន់អឺរ៉ុបទាំងអស់៕
Tag:
អាហ្វ្រិក
ក្រុមប្រឹក្សាសន្តិសុខ
© រក្សាសិទ្ធិដោយ thmeythmey.com