អន្តរជាតិ
អ្វីសំខាន់គួរយល់ដឹងពីដំណើរទស្សនកិច្ចលោកស៊ី ជិនពីងទៅអ៊ីរ៉ង់?
× អ៊ីរ៉ង់និងចិនបានសម្រេចចុះកិច្ចព្រមព្រៀងចំនួន១៧ ក្នុងដំណើរទស្សនកិច្ចរបស់លោក ស៊ី ជិនពីងទៅ កាន់ ប្រទេសអ៊ីរ៉ង់នៅថ្ងៃសៅរ៍ទី ២៣ មករាម្សិលមិញ។ ភាគីទាំងពីរប្តេជ្ញាថានឹងពង្រឹងទំនាក់ទំនងសេដ្ឋកិច្ច ពាណិជ្ជកម្ម សន្តិសុខ ឧស្សាហកម្ម និងថាមពលផង ហើយគេក៏រំពឹងថា ភាគីអាចពង្រឹងភាពជាដៃគូយុទ្ធសាស្ត្រគ្រប់ជ្រុងជ្រោយបានក្រោមក្របខណ្ឌគំនិតផ្តួចផ្តើម«ខ្សែក្រវ៉ាត់មួយវិថីមួយ» របស់ចិនផង។ នេះបើយោងតាមទីភ្នាក់ងារព័ត៌មាន Xinhua។
មុនបញ្ចប់ដំណើរទស្សនកិច្ចនៅមជ្ឈិមបូព៌ា លោក ស៊ី ជិនពីងបានចុះហត្ថលេខាលើកិច្ចព្រមព្រៀងទ្វេភាគី សំខាន់ៗ ចំនួន ១៧ជាមួយមេដឹកនាំប្រទេសមហាអំណាចប្រេងដែលប្រកាន់និកាយស៊ីអ៊ីត«អ៊ីរ៉ង់»។ កិច្ចព្រមព្រៀងដែលត្រូវចុះហត្ថលេខានេះ ផ្តោតលើកិច្ចសហប្រតិបត្តិការពាណិជ្ជកម្ម សេដ្ឋកិច្ច ថាមពលនុយក្លេអ៊ែរ ឧស្សាហកម្ម សន្តិសុខ និងនយោបាយផងដែរ។ដំណើរទស្សនកិច្ចរបស់លោក ស៊ី ជិនពីងនៅអ៊ីរ៉ង់ ក្លាយជាដំណើរទស្សនកិច្ចសំខាន់និងដំបូងបំផុតក្នុងរយៈពេល ១៤ឆ្នាំមកនេះ ហើយដំណើរទស្សនកិច្ចនេះកើតឡើងប៉ុន្មានថ្ងៃប៉ុណ្ណោះក្រោយសហគមន៍អន្តរជាតិសម្រេចដកទណ្ឌកម្មនិងការហ៊ុំព័ទ្ធសេដ្ឋកិច្ចប្រឆាំងអ៊ីរ៉ង់។
លោក ស៊ីជិនពីង បានជួបជជែកជាមួយប្រធានាធិបតីអ៊ីរ៉ង់លោក ហាសាន រូហានី និងបន្តជួបសម្តែងការគួរសមជាមួយមេដឹកនាំកំពូលសាសនា Ayatollah Ali Khameneiនៅល្ងាចថ្ងៃសៅរ៍ផងដែរ។ មេដឹកនាំសាសនាអ៊ីរ៉ង់ បានលើកឡើងកោតសរសើរពីការគាំទ្រ និងកិច្ចសហប្រតិបត្តិការរបស់ចិនដែលមានជាមួយអ៊ីរ៉ង់ក្នុងពេលដែលអ៊ីរ៉ង់ស្ថិតក្រោមទណ្ឌកម្មសហគមន៍អន្តរជាតិនោះ។
ចំណែកក្នុងកិច្ចពិភាក្សាគ្នាលក្ខណៈទេ្វភាគីរវាងប្រធានាធិបតីប្រទេសទាំងពីរលោក ហាសាន រូហានី បានប្រាប់សមភាគីចិនថា លោករំពឹងថា ទំហំពាណិជ្ជកម្មទ្វេភាគីរវាងចិននិងអ៊ីរ៉ង់នឹងកើនឡើងដោយ ៦០០ពាន់លានដុល្លារអាមេរិក នៅក្នុងរយៈពេល ១០ឆ្នាំខាងមុខ។ ហើយលោកក៏បានសង្កត់ធ្ងន់ថា ដំណើរទស្សនកិច្ចរបស់ប្រធានាធិបតីចិនមកអ៊ីរ៉ង់ និងកិច្ចព្រមព្រៀងដែលចិននិងអ៊ីរ៉ង់ចុះរួមគ្នា បញ្ជាក់ច្បាស់ណាស់ហើយថា ទំនាក់ទំនងអ៊ីរ៉ង់ចិនដើរដល់ជំហានពិសេសថ្មីមួយ។
អ៊ីរ៉ង់បង្ហាញការគាំទ្រពេញទំហឹងចំពោះគំនិតផ្តួចផ្តើមរបស់ចិន «ខ្សែក្រវ៉ាត់មួយ វិថីមួយ» និង«ផ្លូវសូត្រសតវត្សទី ២១» ដែលផ្តោតលើការបង្កើនការផ្សាភ្ជាប់ ផ្នែកពាណិជ្ជកម្ម វប្បធម៌ ជាដើមតាមរយៈការកសាងហេដ្ឋារចនាសម្ព័ន្ធរូបវ័ន្តជាដើមដូចជាផ្លូវសូត្រសម័យបុរាណដែលចិនធ្លាប់រកស៊ីជាមួយប្រទេសនានា។ ហើយក្រោមគម្រោងសេដ្ឋកិច្ចរបស់ចិននេះ អ៊ីរ៉ង់និងចិនក៏រំពឹងយ៉ាងមុតមាំពីការកសាងភាពជាដៃគូយុទ្ធសាស្ត្រគ្រប់ជ្រុងជ្រោយទៅថ្ងៃអនាគតផងដែរ។
ចិនពឹងផ្អែកខ្លាំងការនាំចូលប្រេងពីបណ្តាប្រទេសមជ្ឈិមបូព៌ាហើយចិនជាអតិថិជនប្រេងធំបំផុតរបស់អ៊ីរ៉ង់ផង។ ដែលនេះមានន័យថា ចិនមិនអាចមិនរវីរវល់ពីបញ្ហាដែលកំពុងកើតឡើងនៅទីនោះឡើយ។ ហើយចិនកំពុងតែប្រឹងកសាងឥទ្ធិពលរបស់ខ្លួននៅមជ្ឈិមបូព៌ាផង ស្របពេលដែលសហរដ្ឋអាមេរិកខ្សត់ខ្សោយអំណាចដោះស្រាយបញ្ហាតំបន់នេះមិនចេញ។ ទៅកាន់តំបន់មជ្ឈិមបូព៌ាលើកដំបូងនេះ លោក ស៊ី ជិនពីង ក៏បានត្រៀមខ្លួនជួយធ្វើជាសន្ធានការីដោះស្រាយបញ្ហាវិបត្តិការទូតរវាងមហាអំណាចប្រេង អារ៉ាប៊ីសាអូឌីត និងអ៊ីរ៉ង់ផងដែរ។
ក្នុងជំនួបខាងលើដែរលោក ស៊ី ជិនពីង បានកោតសរសើរអ៊ីរ៉ង់ដែលបានចូលរួមយ៉ាងសំខាន់ក្នុងការប្រយុទ្ធប្រឆាំងក្រុមភេរវជន និងរក្សាសន្តិសុខ សន្តិភាព និងស្ថិរភាពក្នុងតំបន់ ហើយលោកគាំទ្រការពង្រីកតួនាទីរបស់អ៊ីរ៉ង់ ក្នុងពេលអនាគត។ ពាក់ព័ន្ធបញ្ហាសេដ្ឋកិច្ច ប្រធានាធិបតីចិននេះ បានអះអាងថាប្រាប់ប្រធានាធិបតីអ៊ីរ៉ង់ថា សេដ្ឋកិច្ចចិន និងសេដ្ឋកិច្ចអ៊ីរ៉ង់បំពេញគ្នាទៅវិញទៅមក ខ្វះគ្នាមិនបាន។
អ្វីដែលសំខាន់ លោក ស៊ី ជិនពីង បានបង្ហាញការគាំទ្ររបស់មហាយក្សចិន ចំពោះការក្លាយជាសមាជិកពេញសិទ្ធរបស់អង្គការសហប្រតិបត្តិការសៀងហៃរបស់អ៊ីរ៉ង់ផងដែរ។ បច្ចុប្បន្ននេះអ៊ីរ៉ង់ក្លាយជាសមាជិកអង្កេតការណ៍របស់ស្ថាប័នថ្នាក់តំបន់ដែលផ្តោតលើវិស័យសន្តិសុខនិងសេដ្ឋកិច្ចនេះ។
សូមបញ្ជាក់ផងដែរថា លោក ស៊ី ជិនពីង ចាប់ផ្តើមដំណើរទស្សកិច្ចផ្លូវរដ្ឋរបស់លោកជាផ្លូវការលើកដំបូងនៅមជ្ឈិមបូព៌ានៅដើមសប្តាហ៍នេះ ដោយលោកបានអញ្ជើញទៅកាន់ប្រទេសអារ៉ាប៊ីសាអូឌីត អេហ្ស៊ីប និងចុងក្រោយមកកាន់ប្រទេសអ៊ីរ៉ង់៕
Tag:
ស៊ី ជិនពីង
អ៊ីរ៉ង់
© រក្សាសិទ្ធិដោយ thmeythmey.com