ជាតិ
នយោបាយជាតិ
សម្តេចក្រុមព្រះ និងលោក ញឹក ប៊ុនឆៃ សុទ្ធតែអះអាងពីបេសកកម្មរបស់ខ្លួនដើម្បីហ្វ៊ុនស៊ិនប៉ិច
× សម្តេចក្រុមព្រះនរោត្តម រណឫទ្ធិ ប្រធានគណបក្សហ្វ៊ុនស៊ិនប៉ិច និងលោក ញឹក ប៊ុនឆៃ អនុប្រធានទី២ សុទ្ធតែបានអះអាងពីបេសកកម្មរៀងៗខ្លួនក្នុងការបង្រួបបង្រួមគណបក្សហ្វ៊ុនស៊ិនប៉ិច បើទោះបីជារយៈពេលចុងក្រោយនេះ គេសង្កេតឃើញថា មេដឹកនាំទាំងពីរហាក់ដូចជាស្ថិតក្នុងផ្លូវផ្សេងគ្នាក៏ដោយ។
សម្តេចក្រុមព្រះ នរោត្តម រណឫទ្ធិ ប្រធានគណបក្សហ្វ៊ុនស៊ិនប៉ិច តាមរយៈសេចក្តីជូនដំណឹងមួយចុះថ្ងៃទី២៥ ខែមករា បានអះអាងថា ព្រះអង្គគ្មានបំណងដេញសមាជិកណាចេញពីបក្សឡើយ ប៉ុន្តែចំពោះអ្នកដែលបំបះបំបោរអូសទាញកម្លាំងរាជានិយម ព្រះអង្គគ្មានជម្រើសអ្វីក្រៅពីអញ្ជើញឲ្យចេញនោះទេ។
បន្ថែមពីលើនេះ ព្រះអង្គបានបញ្ជាក់ថា ព្រះក៏គ្មានបំណងបំណងឲ្យសមាជិកណាម្នាក់ទៅលូកដៃលូកជើងក្នុងក្រុមការងារបោះឆ្នោតនៅតាមខេត្តផ្សេងៗនោះដែរ ដោយព្រះអង្គអំពាវនាវឲ្យមានការតាំងចិត្តសាមគ្គីសហការគ្នាដើម្បីឈានទៅរកភាពជោគជ័យនៃការបោះឆ្នោតឃុំ-សង្កាត់ និងការបោះឆ្នោតជ្រើសរើសតំណាងរាស្ត្រនាពេលខាងមុខ។
នៅថ្ងៃដដែល តាមរយៈលិខិតមួយដែលទំនងជាឆ្លើយតបទៅនឹងប្រធានរបស់ខ្លួន លោក ញឹក ប៊ុនឆៃ អនុប្រធានទី២នៃគណបក្សហ្វ៊ុនស៊ិនប៉ិច បានអះអាងថា លោកគ្មានបំណងលូកដៃលូកជើងក្នុងក្រុមការងារបោះឆ្នោតខេត្ត ឬក៏រចនាសម្ព័ន្ធគណបក្សនោះទេ។ លោកបានបញ្ជាក់ថា៖ «ខ្ញុំចុះទៅតាមបណ្តាចេត្តនានា ជួបតែអតីតថ្នាក់ដឹកនាំគណបក្សហ្វ៊ុនស៊ិនប៉ិចចាស់ដែលត្រូវបានគេដកដំណែង និងតួនាទីប៉ុណ្ណោះ ដើម្បីសួរសុខទុក្ខ និងជម្រាបពីលទ្ធផលនៃការបង្រួបបង្រួមគ្នារបស់គណបក្សរយៈពេល១ឆ្នាំនេះ»។
លោក ញឹក ប៊ុនឆៃ បានបំភ្លឺផងដែរថា លោកជួបតែអតីតថ្នាក់ដឹកនាំណា ដែលបានស្នើសុំជួបលោកប៉ុណ្ណោះ ហើយខេត្តណាដែលគ្មានបញ្ហា លោកមិនបានចុះទៅឡើយ៕
Tag:
ហ្វ៊ុនស៊ិនប៉ិច
នរោត្តម រណឫទ្ធិ
ញឹក ប៊ុនឆៃ
© រក្សាសិទ្ធិដោយ thmeythmey.com