អន្តរជាតិ
ល្មមដល់ពេលលោកខាងលិចត្រៀមដកទណ្ឌកម្មប្រឆាំងរុស្ស៊ី ?
× ទណ្ឌកម្មនានារបស់លោកខាងលិចពាក់ព័ន្ធអន្តរាគមន៍របស់រុស្ស៊ីក្នុងជម្លោះអ៊ុយក្រែនអាចនឹងត្រូវដកចេញនៅពេលឆាប់ខាងមុខនេះ។ បារាំងបានបញ្ជាក់ថាខ្លួនអាចនឹងដកទណ្ឌកម្មទណ្ឌកម្មនៅរដូវក្តៅខាងមុខ។ ហើយ កាលពីចុងសប្តាហ៍មុន ប្រមុខការទូតអាមេរិកក៏បានលើកឡើងពីលទ្ធភាពនៃការដកទណ្ឌកម្មប្រឆាំងរុស្ស៊ីដូចគ្នា បើសិនរុស្ស៊ីបន្តគាំទ្រការអនុវត្តកិច្ចព្រមព្រៀងឲ្យបានពេញលេញនិងខ្ជាប់ខ្ជួន។
បណ្តាប្រទេសលោកខាងលិចចាប់ផ្តើមផ្លាស់ប្តូរជំហររបស់ខ្លួន ដោយត្រៀមដកទណ្ឌកម្មសេដ្ឋកិច្ច និងការហ៊ុំព័ទ្ធសេដ្ឋកិច្ចប្រឆាំងរុស្ស៊ីក្រោយជម្លោះអ៊ុយក្រែនកើតឡើងដើមឆ្នាំ ២០១៤ ។ ការឈានទៅដកទណ្ឌកម្មនេះ អាចកើតឡើងបើសិនរុស្ស៊ីប្រឹងប្រែងគាំទ្រការអនុវត្តកិច្ចព្រមព្រៀងសន្តិភាពទីក្រុង Minsk ដែលចូលជាធរមាននៅពាក់កណ្តាលខែកម្ភៈឆ្នាំមុនឲ្យបានពេញលេញ។
ទាក់ទិនបញ្ហានេះ រដ្ឋមន្ត្រីសេដ្ឋកិច្ចបារាំងលោក Emmanuel Macron បានលើកឡើងថា បារាំងអាចនឹងដកទណ្ឌកម្មទាំងឡាយណាពាក់ព័ន្ធបញ្ហាអ៊ុយក្រែន នៅរដូវក្តៅខាងមុខ។ មន្ត្រីជាន់ខ្ពស់បារាំងរូបនេះបានថ្លែងដូច្នេះក្នុងដំណើរទស្សនកិច្ចទៅកាន់ទីក្រុងម៉ូស្គូកាលពីថ្ងៃអាទិត្យទី ២៤ មករាម្សិលមិញ។ បារាំងមានរំពឹងខ្ពស់ថា កិច្ចព្រមព្រៀងដែលចូលជាធរមានតាំងពីឆ្នាំមុននេះនឹងត្រូវអនុវត្តពេញលេញដោយភាគីពាក់ព័ន្ធជាពិសេសរុស្ស៊ីតែម្តង។
ក្រៅពីបារាំង រដ្ឋមន្ត្រីការបរទេសអាមេរិកលោក ចន ឃេរី កាលពីថ្ងៃសុក្រ ទី២២ មករា ក៏បានបញ្ជាក់ផងដែរថា អាមេរិកអាចនឹងដកទណ្ឌកម្មប្រឆាំងរុស្ស៊ីនៅប៉ុន្មានខែខាងមុខដែរ បើសិនបើរុស្ស៊ីប្រឹងប្រែងបន្តទៀតដើម្បីជំរុញឲ្យការអនុវត្តកិច្ចព្រមព្រៀងក្រុង Minsk ត្រូវអនុវត្តពេញលេញ។ លោក ឃេរី បានលើកឡើងបែបនេះនៅក្នុងទីក្រុង Davos ប្រទេសស្វីស នៅពេលដែលលោកបានជួបជជែកជាមួយមន្ត្រីជាន់ខ្ពស់ក្រុងម៉ូស្គូផង។
ទាំងអាមេរិក អាល្លឺម៉ង់ បារាំង ចាប់ផ្តើមមើលឃើញថា របបដឹកនាំរុស្ស៊ីចាប់ផ្តើមផ្លាស់ប្តូរជំហររបស់ខ្លួនដោយ ចង់ជួយបញ្ចប់ជម្លោះនៅភាគខាងកើតអ៊ុយក្រែន ដើម្បីឲ្យទណ្ឌកម្មទាំងប៉ុន្មានដែលបានដាក់ចេញប្រឆាំងខ្លួនត្រូវដកចេញ។ កាលពីចុងឆ្នាំ ២០១៥ លោក វ្ល៉ាឌីមៀ ពូទីន បានសម្រេចបញ្ជូនបេសកកម្មពិសេសលោក Boris Gryzlov ដែលជាសមាជិកក្រុមប្រឹក្សាសន្តិសុខរុស្ស៊ី ទៅជជែកពិភាក្សាជាមួយក្រុមត្រីភាគីដែលទទួលខុសត្រូវដោះស្រាយបញ្ហាអ៊ុយក្រែន។
១.រុស្ស៊ីបោះបង់អ៊ុយក្រែន ងាកទៅតំបន់មជ្ឈិមបូព៌ា
តាមពិតទៅអ្វីដែលលោកខាងលិចចង់បាន គឺរុស្ស៊ីត្រូវឈប់គាំទ្រក្រុមបណ្តាក្រុមប្រដាប់អាវុធនៅក្នុងតំបន់ភាគខាងកើតនិងឈប់ផ្តល់ជំនួយគ្រប់យ៉ាងដល់ក្រុមឧទ្ទាម។ ចាប់តាំងពីអនុវត្តកិច្ចព្រមព្រៀង Minsk នៅដើមឆ្នាំ ២០១៥ ការប្រយុទ្ធគ្នាបានចប់ហើយ តែបទឈប់បាញ់នៅផុយស្រួយណាស់។ តែប៉ុន្មានខែចុងក្រោយរុស្ស៊ីហាក់បីដូចជាស្វះស្វែងជំរុញឲ្យជម្លោះប្រដាប់អាវុធចប់ជាស្ថាពរ ហើយអាចថាមានមូលហេតុច្រើន ដែលរុស្ស៊ីត្រូវប្តូរជំហររបស់ខ្លួនពេលនេះ។ បញ្ហាធំគឺ សេដ្ឋកិច្ចរុស្ស៊ីកំពុងជួបវិបត្តិ ព្រោះបញ្ហាតម្លៃប្រេងធ្លាក់ចុះខ្លាំងផង និងទណ្ឌកម្មលោកខាងលិចក៏រុកគួនសេដ្ឋកិច្ចប្រទេសនេះខ្លាំងផង។ បញ្ហាមួយទៀត ក្រុងម៉ូស្គូ មិនអាចធ្វើសង្គ្រាមពីរក្នុងពេលតែមួយឡើយ។ បច្ចុប្បន្នក្រុងម៉ូស្គូចាប់ផ្តើមផ្តោតលើបញ្ហានៅមជ្ឈិមបូព៌ាវិញម្តង ដោយចេញមុខអន្តរាគមន៍នៅស៊ីរី កាលពីចុងខែកញ្ញាឆ្នាំទៅ។ រុស្ស៊ីចាប់ផ្តើមពង្រឹងតួនាទីក្នុងតំបន់ដោយការពាររដ្ឋាភិបាលស៊ីរី លោក បាសា អាល់អាសាដ ដើរតួជាអ្នកកសាងសន្តិភាពដោយជួយបញ្ចប់ជម្លោះនៅស៊ីរី និងប្រឆាំងក្រុមរដ្ឋឥស្លាមផងដែរ។
អ្វីដែលរុស្ស៊ីពេញចិត្តចំពោះកិច្ចព្រមពៀងគឺ តំបន់ភាគខាងកើតដែលស្និទ្ធជាមួយខ្លួននឹងក្លាយជាតំបន់ស្វយ័តមួយដែលមានអំណាចពិសេសក្នុងការគ្រប់គ្រងកិច្ចការងារនានាជាពិសេសរក្សាទំនាក់ទំនងសេដ្ឋកិច្ច ពាណិជ្ជកម្ម ជាមួយរស្ស៊ីជាធម្មតា។ ហើយកិច្ចព្រមព្រៀងនេះក៏មិនទាមទារឲ្យ រុស្ស៊ីផ្ទេរទឹកដី Crimea មកឲ្យអ៊ុយក្រែនវិញដែរ។
២.កែទម្រង់នៅអ៊ុយក្រែននៅលើផ្លូវមិនច្បាស់លាស់
ខណៈដែលរុស្ស៊ីត្រូវបំពេញតួនាទីរបស់ខ្លួនដោយឈប់គាំទ្រក្រុមឧទ្ទាមភាគខាងកើត រដ្ឋាភិបាលក្រុងគៀវ របស់លោក Petro Poroshenko ក៏ត្រូវអនុវត្តតាមចំណុចមួយចំនួនដែលមានចែងក្នុងកិច្ចព្រមព្រៀងនេះដែរ។ បញ្ហាចម្បងបំផុតគឺត្រូវធានាឲ្យបានការកែទម្រង់រដ្ឋនយោបាយនិងសេដ្ឋកិច្ចនៅក្នុងប្រទេស បំពេញចិត្តប្រជាជនភាគខាងកើត។ រដ្ឋាភិបាលអ៊ុយក្រែននេះក៏រងសម្ពាធខ្លាំងពីបណ្តាមិត្តអឺរ៉ុបនិងអាមេរិកដែរ ជុំវិញការបន្តកែទម្រង់នេះ។
កន្លងមកលោក Poroshenko បានដាក់ស្នើសុំ កែទម្រង់រដ្ឋធម្មនុញ្ញ ដោយផ្តល់ស្វ័យភាពបន្ថែមដល់តំបន់ភាគខាងកើតដែលកំពុងរងគ្រោះ ដោយជម្លោះប្រដាប់អាវុធ។ ការអនុវត្តការកែទម្រង់ស៊ីជម្រៅនេះ ប្រឈមមុខបញ្ហាច្រើនព្រោះតែរដ្ឋាភិបាលក្រុងគៀវ ត្រូវការការគាំទ្រពីសំណាក់បណ្តាអ្នកនយោបាយអ៊ុយក្រែនដើម្បីធានាថា រដ្ឋធម្មនុញ្ញនឹងត្រូវវិសោធនកម្ម។ ដើម្បីកែរដ្ឋធម្មនុញ្ញវាត្រូវការការសំឡេងគាំទ្រពីសមាជិកសភាចំនួន ២ ភាគ ៣ ប៉ុន្តែការកែរដ្ឋធម្មនុញ្ញដើម្បីផ្តល់ស្វ័យភាពឲ្យតំបន់ភាគខាងកើតជាចំណុចចម្រូងចម្រាសបំផុតក្នុងនយោបាយអ៊ុយក្រែន។ អ្នកនយោបាយអ៊ុយក្រែនភ័យថា បើផ្តល់ស្វ័យភាពឲ្យតំបន់ភាគខាងកើត ថ្ងៃណាមួយខេត្តទាំងនោះនឹងរបូតម្តងមួយៗទៅកណ្តាប់ដៃរុស្ស៊ី។ ដូច្នេះហើយបានជាការកែទម្រង់នៅអ៊ុយក្រែនស្របតាមកិច្ចព្រមព្រៀង អាចនឹងបរាជ័យ។
© រក្សាសិទ្ធិដោយ thmeythmey.com