អន្តរជាតិ
មេដឹកនាំបារាំង-ឥណ្ឌាប្តេជ្ញាពង្រឹងកិច្ចសហការប្រឆាំងភេរវកម្ម
× នៅថ្ងៃអង្គារទី ២៦ ខែមករានេះ ប្រធានាធិបតីបារាំងលោក ហ្វ្រង់ស្វ័រ ហូឡង់ ក្លាយជាភ្ងៀវពិសេសចូលរួមក្នុងព្យុហយាត្រាយោធាថ្ងៃប្រកាសរដ្ឋធម្មនុញ្ញឥណ្ឌា។ ក្នុងដំណើរទស្សនកិច្ចនេះ លោក ហូឡង់ និលោក នារិន្ទ្រា ម៉ូឌី បានប្តេជ្ញាសហការគ្នាដើម្បីប្រឆាំងភេរវកម្មនិងពង្រឹងទំនាក់ទំនងច្រើនវិស័យជាពិសេសវិស័យការពារជាតិ ថាមពលនិងសេដ្ឋកិច្ច។ តែភាគីនៅមិនទាន់ដាច់ស្រេចរឿងកិច្ចព្រមព្រៀងទិញយន្តហោះចម្បាំងពីបារាំងឡើយ។
សូមស្ដាប់ព័ត៌មានលម្អិត៖
ឥណ្ឌាបានអញ្ជើញប្រធានាធិបតីបារាំងលោក ហ្វ្រង់ស័រ ហូឡង់ ឲ្យធ្វើជាភ្ងៀវពិសេសចូលរួមទស្សនា ក្បួនព្យុហយាត្រាយោធាប្រកាសរដ្ឋធម្មនុញ្ញនៅក្នុងរដ្ឋធានីដែលី នៅថ្ងៃអង្គារទី២៦ ខែមករានេះ។ កងទ័ពបារាំងក៏ចូលរួមក្នុងពិធីដើរក្បួននេះដែរ។ កាលពីឆ្នាំ ២០០៩ ឥណ្ឌាបានបញ្ជូនទ័ពរបស់ខ្លួនទៅចូលរួមក្នុងព្យុហយាត្រាយោធាថ្ងៃបុណ្យជាតិបារាំងBastille ដែលរម្លឹកពីបដិវត្តន៍ផ្តួលរំលំរបបរាជានិយមបារាំង។
ក្នុងដំណើរទស្សនកិច្ចបីថ្ងៃ លោក ហូឡង់ និងនាយករដ្ឋមន្ត្រីឥណ្ឌាលោក នារិន្ទ្រា ម៉ូឌី មានកិច្ចពិភាក្សាទ្វេភាគីដោយផ្តោតសំខាន់លើបញ្ហាជាច្រើនក្នុងនោះមានការពង្រឹងកិច្ចសហប្រតិបត្តិការទ្វេភាគីលើវិស័យ សន្តិសុខ ពាណិជ្ជកម្ម ថាមពល និង ការពារជាតិ។ កិច្ចព្រមព្រៀង ១៣ ត្រូវភាគីចុះរួមគ្នាក្នុងដំណើរទស្សនកិច្ចនេះដែរ។
ភាគីទាំងពីរបានឯកភាពគ្នាដំឡើងកម្រិតការទូតពីដៃគូយុទ្ធសាស្ត្រដែលបានបង្កើតឡើងក្នុងឆ្នាំ ១៩៩៨ ហើយស្របពេលជាមួយគ្នានោះមេដឹកនាំទាំងពីរសម្រេចពង្រឹងទំនាក់ទំនងសន្តិសុខឲ្យបានជិតស្និទ្ធិដើម្បីប្រឆាំងភេរវកម្មផង។ ឥណ្ឌានិងបារាំងរងគ្រោះដោយសារបញ្ហាភេរវកម្មដូចគ្នា។ ឥណ្ឌារងការវាយប្រហារកាលពីឆ្នាំ ២០០៨ ហើយក្រុមភេរវជនរដ្ឋឥស្លាមឬក្រុមដែស្ហអុកឡុកក្រុងប៉ារីសកាលពីខែវិច្ឆិកាកន្លងទៅដោយសម្លាប់មនុស្សអស់ជាង ១០០នាក់ផង។ ការជជែកគ្នារវាងប្រធានាធិបតីបារាំងនិងនាយករដ្ឋមន្ត្រីឥណ្ឌាកើតឡើងស្របពេលដែលក្រុមរដ្ឋឥស្លាមឬក្រុមដែស្ហ បញ្ចេញខ្សែអាត់វីដេអូថ្មីរបស់ខ្លួន ដើម្បីគំរាមប្រជាជនបារាំងផងដែរ។
ប៉ុន្តែ កិច្ចពិភាក្សាសំខាន់មួយទៀតគឺ ពាក់ព័ន្ធលើការបន្តចរចាបង្កើតកិច្ចព្រមព្រៀងទិញយន្តហោះចម្បាំង Rafale ចំនួន ៣៦ គ្រឿងពីក្រុមហ៊ុន Dassault របស់បារាំង។ ឥណ្ឌានិងបារាំងបញ្ជាក់ថា គូភាគីមិនទាន់ដាច់ស្រេចគ្នានៅឡើយជុំវិញបិទបញ្ចប់កិច្ចព្រមព្រៀងទិញលក់យន្តហោះចម្បាំងនេះ ព្រោះចំណុចចម្រូងចម្រាសមួយចំនួន តែគេរំពឹងកិច្ចព្រមព្រៀងនេះនឹងត្រូវបញ្ចប់ឆាប់ៗ។ លោក ម៉ូឌី បានបញ្ជាក់ថា បច្ចុប្បន្នចំណុចនានានៃកិច្ចព្រមព្រៀងត្រូវភាគីឯកភាពគ្នាហើយ នៅឡើយតែព័ត៌មានលម្អិតខាងហិរញ្ញវត្ថុប៉ុណ្ណោះដែលនៅសល់។
ក្រៅពីនេះមេដឹកនាំឥណ្ឌា និង បារាំង ជជែកពិភាក្សាលើការកសាងរោងចក្រអគ្គិសនីដើរថាមពលនុយក្លេអ៊ែរ ដោយបារាំងនឹងសង់រោងចក្រចំនួន ៦ ឲ្យឥណ្ឌាក្នុងពេលមួយឆ្នាំ និង ការបន្តសហការសង់រោងចក្រថាមពលនុយក្លេអ៊ែរបន្ថែមទៀតនៅពេលអនាគត។ ឥណ្ឌាខ្វះខាតថមពលអគ្គិសនីច្រើន ហើយការសង់រោងចក្រនុយក្លេអ៊ែរនេះនឹងអាចជួយឲ្យឥណ្ឌាទាក់ទាញលំហូរវិនិយោគបរទេស និងកាត់បន្ថយភាពក្រីក្រផងដែរ។ ប្រធានាធិបតីបារាំងនិងនាយករដ្ឋមន្ត្រីឥណ្ឌាក៏ ព្រមព្រៀងគ្នាសហការលើកម្មវិធីលំហរអាកាសដោយបាញ់បង្ហោះផ្សាយរណបស្រាវជ្រាវបញ្ហាប្រែប្រួលអាកាសធាតុ៕
© រក្សាសិទ្ធិដោយ thmeythmey.com