អន្តរជាតិ
ថៃ នឹងរៀបចំការបោះឆ្នោតនៅឆ្នាំ២០១៧ បើទោះបីជាគ្មានរដ្ឋធម្មនុញ្ញថ្មីក៏ដោយ
× នៅថ្ងៃទី២៦ ខែមករា នេះ លោកនាយករដ្ឋមន្ត្រីថៃប្រាយុទ្ធ ច័ន្ទអូចា បានប្រកាសជាថ្មីថា ការបោះឆ្នោតសកល នឹងត្រូវធ្វើឡើងនៅឆ្នាំ២០១៧ជាដាច់ខាត។ ការអះអាងបែបនេះ ធ្វើឡើងបន្ទាប់ពីមានសម្តែងការព្រួយបារម្ភ ក្នុងករណីដែលដំណើរការនៃការធ្វើរដ្ឋធម្មនុញ្ញថ្មី បរាជ័យ ហើយរបបយោធា នឹងបន្តគ្រប់គ្រងថៃបន្តទៀត។
លោកឧត្តមសេនីយ៍ប្រាយុទ្ធ បានសង្កត់ថា « បើទោះបីសេចក្តីព្រាងរដ្ឋធម្មនុញ្ញ អាចឆ្លងកាត់នូវការធ្វើ ប្រជាមតិ បាន ឬមិនបានក៏ដោយ រដ្ឋាភិបាល នឹងរៀបចំការបោះឆ្នោតឆ្នាំ២០១៧ ដែលយោងតាមផែនការនៃការនាំមកវិញនូវលទ្ធិប្រជាធិបតេយ្យរបស់លោក»។ នេះបើយោងតាមភ្នាក់ងារព័ត៌មាន Reuter។
កាលពីថ្ងៃទី២០ ខែមករា កន្លងទៅ ប្រធានគណៈកម្មាធិការព្រាងរដ្ឋធម្មនុញ្ញថៃ លោក Meechai Ruchupan បានអះអាងថាសេចក្តីព្រាងរដ្ឋធម្មនុញ្ញថៃថ្មី នឹងត្រូវបង្ហាញជាសាធារណៈនៅចុងខែនេះហើយ។ តាមការអះអាងរបស់ លោក Meechai Ruchupan សេចក្តីព្រាងរដ្ឋធម្មនុញ្ញដែលជាសេចក្តីព្រាងលើក២ ក្រោមការដឹកនាំដោយរបបសឹក គឺប្រៀបប្រដូចទៅនឹងឱសថដ៏ខ្លាំងពូកែមួយដើម្បីព្យាបាលជំងឺនយោបាយថៃ។ តែលោក ថា លោកមិនអាចធានាបានថាច្បាប់ នោះអាចផ្គាប់ចិត្តអ្នកនយោបាយថៃទាំងអស់បាននោះទេ។
ដើម្បីឲ្យរដ្ឋធម្មនុញ្ញថ្មីថៃអាចចូលជាធរមានបាន ត្រូវឆ្លងកាត់ការយល់ព្រមពីក្រុមប្រឹក្សាកែទម្រង់ថៃ និងការធ្វើប្រជាមតិពីប្រជាជនជាមុនសិន។
សូមបញ្ជាក់ផងដែរ ក្រោយពីការឡើងកាន់អំណាចតាមរយៈរដ្ឋប្រហារយោធាថ្ងៃទី២២ ខែឧសភា ឆ្នាំ ២០១៤ លោក ប្រាយុទ្ធ បានតែងតាំងឲ្យមានគណៈកម្មាធិការព្រាងរដ្ឋធម្មនុញ្ញថ្មី ដើម្បីដោះស្រាយនៃការជាប់គាំងវិបត្តិនយោបាយ។
នៅថ្ងៃទី០៦ ខែកញ្ញាឆ្នាំ២០១៥ ក្រុមប្រឹក្សាកែទម្រង់ជាតិថៃ បានបដិសេធសេចក្តីព្រាងច្បាប់រដ្ឋធម្មនុញ្ញថៃ ដែលធ្វើឡើងដោយគណៈកម្មធិការលើកទី១ដែលលោកប្រាយុទ្ធ បានតែងតាំង ដ្បិតសេចក្តីព្រាងនោះ មិនឆ្លើយតបទៅនឹងបញ្ហានយោបាយថៃបច្ចុប្បន្ន។ ក្រោយពីការច្រានចោលនៃសេចក្តីព្រាងរដ្ឋធម្មនុញ្ញនោះ លោកប្រាយុទ្ធ ក៏បានតែងតាំងគណៈកម្មាធិការថ្មីជាលើក២ភ្លាមជាមួយនឹងនោះដែរ។ ក្នុងនោះលោកប្រាយុទ្ធ ក៏បានប្រកាសថាសេចក្តីព្រាងច្បាប់រដ្ឋធម្មនុញ្ញ ដែលរួមទាំងការធ្វើប្រជាមតិ ត្រូវបញ្ចប់មុនឆ្នាំ២០១៧ដែលជាពេលនៃការបោះឆ្នោត ជ្រើសរើសមេដឹកនាំថ្មី៕
© រក្សាសិទ្ធិដោយ thmeythmey.com