ជាតិ
សង្គមជាតិ
កាំកុងត្រូលខេត្តសៀមរាបផ្តើមចុះពិនិត្យកន្លែងលក់ស្ករត្នោតរកសារធាតុគីមី
×![]()
សៀមរាប៖ ពេញមួយព្រឹកហើយ កាំកុងត្រូលខេត្តសៀមរាប មិនទាន់រកឃើញសារធាតុគីមី នៅក្នុងស្ករត្នោតនោះទេ។ ប្រតិបត្តិការចុះត្រួតពិនិត្យដំបូងនៅព្រឹកថ្ងៃសុក្រនេះ ធ្វើឡើងនៅតាមតូបក្នុងតំបន់ផ្សារលើ ដោយក្នុងនោះ មន្ត្រីកាំកុងត្រួល បានពិនិត្យស្ករត្នោតជាច្រើន តែស្ករទាំងនោះ ពុំមានលាយសារធាតុគីមីឡើយ។
ដោយអនុវត្តន៍តាមបទបញ្ជាពីកាំកុងត្រូលរាជធានីភ្នំពេញ នៅព្រឹកថ្ងៃទី២៩ មករានេះ កាំកុងត្រូលខេត្តសៀមរាប បានចាប់ផ្តើមអនុវត្តន៍ផែនការ ដោយគ្រោងនឹងចុះត្រួតពិនិត្យស្ករត្នោត តាមទីផ្សារសំខាន់ៗមួយចំនួន ក្នុងខេត្តសៀមរាប។ នេះបើយោងតាមការបញ្ជាក់ពីលោក លឹម វុទ្ធី អនុប្រធានកាំកុងត្រូលខេត្តសៀមរាប។
ការចុះត្រួតពិនិត្យកន្លែងលក់ស្ករត្នោតប្រមាណ១០តូប នៅផ្សារលើកាលពីព្រឹកមិញ អាជ្ញាធរ មិនបានរកឃើញសារធាតុគីមី សូដ្យូមអ៊ីដ្រូស៊ីលហ្វីត (Sodium hydrocilfeet) នោះទេ។ តាមការបញ្ជាក់របស់លោក លឹម វុទ្ធី ដែលបានដកស្រង់សំដីរបស់ក្រុមអាជីវករ បាននិយាយថា ស្ករត្នោតទាំងនោះ ពួកគេយកពីអ្នកផលិតនៅក្នុងស្រុក និងភាគច្រើនជាស្ករត្នោតដែលផលិតជាលក្ខណៈគ្រួសារតូចតាចតែប៉ុណ្ណោះ។ យ៉ាងណាក៏ដោយ ក្រុមកាំកុងត្រូលខេត្តសៀមរាប គ្រោងនឹងចុះពិនិត្យរកសារធាតុគីមីនៅក្នុងស្ករត្នោត នៅតាមទីផ្សារសំសំខាន់ៗមួយចំនួនទៀត មានតំបន់ផ្សារចាស់ និងផ្សារក្រោមជាដើម។ នេះបើតាមការបញ្ជាក់របស់លោក លឹម វុទ្ធី។
កាលពីថ្ងៃទី២៧ មករាកន្លងទៅ នគរបាលនាយកដ្ឋានប្រឆាំងបទល្មើសសេដ្ឋកិច្ចនៃក្រសួងមហាផ្ទៃ សហការនិងកាំកុងត្រូលរាជធានីភ្នំពេញ បានចុះឆែកឆេរ រកឃើញស្ករត្នោតជាច្រើនតោន ដែលមានផ្ទុកសារធាតុគីមី សូដ្យូមអ៊ីដ្រូស៊ីលហ្វីត។ ក្នុងនោះម្ចាស់អាជីវកម្ម ដែលរស់នៅសង្កាត់បឹងសាឡាង ខណ្ឌទួលគោក ក៏ត្រូវបានឃាត់ខ្លួនភា្លមៗនោះដែរ។
ទាក់ទងនឹងសារធាតុគីមី ដែលប្រើនៅក្នុងស្ករត្នោតនេះ លោក លឹម វុទ្ធី ពន្យល់ពីគ្រោះថ្នាក់របស់វាថា គឺមានហានិភ័យខ្ពស់ចំពោះសុខភាព។ លោកបន្តថា វាធ្វើឲ្យប៉ះពាល់ផ្លូវដង្ហើមធ្ងន់ធ្ងរ រាគរួស ឈឺក្រពះ ជាពិសេសគឺគ្រោះថ្នាក់សម្រាប់អ្នកកើតជំងឺហឺត។ អ្នកជំងឺហឺត ដែលប៉ះសារធាតុនេះ នឹងធ្វើឲ្យរាងកាយញ័រ និងអាចបណ្តាលឲ្យស្លាប់បានដែរ។ កន្លងមកសារធាតុនេះច្រើនមានប្រើនៅលើបន្លែមួយចំនួន មានសណ្តែកបណ្តុះ និងខ្ញីជាដើម៕
© រក្សាសិទ្ធិដោយ thmeythmey.com
