រូបត្លុក
តើកណ្តាប់ដៃដែកកំចាត់«ខ្មោចពុករលួយ» នឹងមានប្រសិទ្ធភាពប៉ុណ្ណា?
× វិធានការរបស់រដ្ឋាភិបាលដែលដឹកនាំដោយគណបក្សប្រជាជនកម្ពុជា ក្នុងការកំចាត់មន្ត្រីខ្មោច ត្រូវបានដាក់អោយអនុវត្តច្រើនដងរួចមកហើយដែរ។ ក្រៅពីការធ្វើជំរឿនមន្ត្រីរាជការថ្នាក់ជាតិ វិធានការចុងក្រោយមួយទៀត គឺការចុះបញ្ជីវត្តមានដោយម៉ាស៊ីនអេឡិចត្រូនិក។ ក្រសួងខ្លះសម្រេចប្រើប្រាស់មធ្យោបាយស្កែនក្រយៅដៃ ស្ថាប័នរដ្ឋខ្លះទៀតប្រើប្រាស់មធ្យោបាយបង្ហាញប័ណ្ណបុគ្គលិកដាក់លើម៉ាស៊ីនស្វ័យប្រវត្តិ ដើម្បីបញ្ជាក់អំពីវត្តមានពួកគេនៅកន្លែងធ្វើការ។ ប៉ុន្តែ វិធានការទាំងនោះ គ្មានប្រយោជន៍ និងគ្មានប្រសិទ្ធភាពឡើយ។
មន្ត្រីរាជការគ្នាឯងបាននិយាយតគ្នាថា អ្នកដែលមានតែឈ្មោះ ហើយមិនមកធ្វើការនៅតែមានច្រើនដូចដើម ជាពិសេស មន្ត្រីដែលជាកូនក្មួយ សាច់ញាតិ្តអ្នកធំ និងថ្នាក់ដឹកនាំខ្លះនៅក្នុងស្ថាប័នរដ្ឋ។
ប្រសិនបើក្រសួងណាដែលប្រើប្រាស់វិធានការដាក់ស្កែនក្រយៅដៃ មន្ត្រីគ្រាន់តែមកស្កែនក្រយៅដៃពេលចូលធ្វើការ និងពេលចេញពីធ្វើការប៉ុណ្ណោះ ប៉ុន្តែពួកគេមិនបាននៅធ្វើការឡើយ។ ប្រសិនបើស្ថាប័នរដ្ឋណា ប្រើប្រាស់មធ្យោបាយស្កែនប័ណ្ណបុគ្គលិកនោះ មធ្យោបាយមួយនេះរឹតតែស្រួលសម្រាប់បុគ្គលិកដែលចង់បន្លំ។ ពួកគេគ្រាន់តែផ្ញើប័ណ្ណនោះតគ្នា អោយមន្ត្រីម្នាក់ដែលមកធ្វើការ ដាក់ស្កែនបណ្ណនោះឱ្យជាការស្រេច។
ម្តងនេះ ប្រធានអង្គភាពប្រឆាំងអំពើពុករលួយបានប្រកាសបើកយុទ្ធនាការកំចាត់មន្ត្រីខ្មោចទាំងនោះសារជាថ្មីទៀត ដោយលោកហៅថា ជាខ្មោចពុករលួយ។ យុទ្ធនាការរបស់អង្គភាពប្រឆាំងអំពើពុករលួយ នឹងអាចក្លាយជាវិធានការចុងក្រោយ ដែលមានប្រសិទ្ធភាព ក្នុងការបោសសម្អាត មន្ត្រីខ្មោចនៅកម្ពុជាដែរឬទេ? ជាពិសេស ក្នុងសំណុំបញ្ហាដដែល គឺការបោសសម្អាត ក្រុមសាច់ញាតិ កូនក្មួយរបស់មន្ត្រីធំប្រចាំស្ថាប័ន ដែលមិនបើកប្រាក់ខែរដ្ឋ តែមិនបំពេញការងារជូនរដ្ឋនោះ ?
គេបានលឺរដ្ឋមន្ត្រីនៃក្រសួងមួយចំនួន បានចាប់ផ្តើមដាក់បទបញ្ជាទៅថ្នាក់ក្រោមឱវាទសម្អាតបញ្ជីឈ្មោះមន្ត្រីខ្មោចជាបណ្តើរហើយ ខណៈដែលអង្គភាពប្រឆាំងអំពើពុករលួយបានដាក់ឱសានវាទ៣ខែដល់ស្ថាប័នរដ្ឋ៕
© រក្សាសិទ្ធិដោយ thmeythmey.com