អ្នកនាំពាក្យ៖ លោក ញឹក ប៊ុនឆៃ បំភាន់មន្ត្រីដែលមានតួនាទីក្នុងរដ្ឋាភិបាលឲ្យទៅតាមខ្លួន

ជាតិ

នយោបាយជាតិ

អ្នកនាំពាក្យ៖ លោក ញឹក ប៊ុនឆៃ បំភាន់មន្ត្រីដែលមានតួនាទីក្នុងរដ្ឋាភិបាលឲ្យទៅតាមខ្លួន

03, Feb 2016 , 9:39 pm

រូបភាព

ដោយ: រំដួល ចិត្រា (Romdoul Chetra)

អ្នកនាំពាក្យគណបក្សហ្វ៊ុនស៊ិនប៉ិច និងជាមន្ត្រីស្និទ្ធនឹងសម្ដេចក្រុមព្រះ នរោត្តម រណឫទ្ធិ លោក ញ៉េប ប៊ុនជិន អះអាងថា លោក ញឹក ប៊ុនឆៃ អនុប្រធានបក្ស បានប្រើពាក្យឃោសនា ដោយបំភាន់ពាក្យ ប្រាប់មន្ត្រីបក្សដែលមានតួនាទីក្នុងរដ្ឋាភិបាលថា មិនបាត់បង់តួនាទីឡើយ ដែលផ្ទុយពីក្របខណ្ឌបក្ស។

បន្ទាប់ពីបានប្រកាសថាខ្លួនបានចាកចេញពីបក្ស នឹងទៅបង្កើតគណបក្សថ្មីមានឈ្មោះថា«គណបក្សខ្មែររួបរួមជាតិ» នោះ លោក ញឹក ប៊ុនឆៃ ក៏បានបញ្ជាក់ថា មន្ត្រីហ្វ៊ុនស៊ិនប៉ិច ស្ទើរទាំងអស់ បានចេញពីសម្តេចក្រុមព្រះ មកបង្កើតគណបក្សជាមួយលោក។

ត្រង់ចំណុចអ្នកនាំពាក្យគណបក្សហ្វ៊ុនស៊ិនប៉ិច លោក ញ៉េប ប៊ុនជិន បានចោទលោក ញឹក ប៊ុនឆៃ ដែលអូសទាញមន្ត្រី ហ្វ៊ុនស៊ិនប៉ិច មានតំណែងក្នុងរដ្ឋាភិបាលមួយចំនួនទៅជាមួយខ្លួននេះថា បានបំភាន់ពាក្យសម្ដីក្រោមការឃោសនាថា មន្ត្រីទាំងនោះនឹងមិនបាត់តំណែងទេ បើទៅចូលរួមបង្កើតបក្សថ្មីជាមួយខ្លួន ។ លោក ញ៉េប ប៊ុនជិន ចាត់ទុកការឃោសនានេះជារឿងមិនត្រឹមត្រូវ ដែលផ្ទុយពីក្របខណ្ឌដៃគូរសហប្រតិបត្តិការរវាងគណបក្សប្រជាជនកម្ពុជា និងគណបក្សហ្វ៊ុនស៊ិនប៉ិច។

ថ្លែងប្រាប់សារព័ត៌មានថ្មីៗ អ្នកនាំពាក្យរូបនេះ បានរំឮកពាក្យសម្ដីឃោសនារបស់លោក ញឹក ប៊ុនឆៃ ដូច្នេះថា៖«គាត់បានបំពាន់ពាក្យសម្ដីប្រាប់មន្ត្រីបក្សថា បើពួកគេទៅចូលរួមបង្កើតបក្សជាមួយគាត់នោះ មន្ត្រីទាំងនោះនឹងមិនបាត់បង់តួនាទីក្នុងជួររដ្ឋាភិបាលឡើយ តែបើនៅជាមួយសម្ដេចក្រុមព្រះ ពួកគេនឹងបាត់បង់តំណែងនេះ។ តែការឃោសនាជាការបំភាន់ពាក្យដែលផ្ទុយពីក្របខណ្ឌបក្សជាមួយគណបក្សប្រជាជន»។

តែយ៉ាងណា លោក ញ៉េប ប៊ុនជិន មិនទាន់ហ៊ានអារកាត់ថា ទាំងលោក ញឹក ប៊ុនឆៃ ទាំងមន្ត្រីដែលចាកចេញពីបក្សទាំងនោះ នឹងត្រូវបាត់បង់តួនាទីក្នុងជួររដ្ឋាភិបាលដែរឫអត់ទេ? ដោយលោកថា បញ្ហានេះគឺអាស្រ័យលើសម្ដេចនាយករដ្ឋមន្ត្រី ហ៊ុន សែន។«ការបាត់បង់តួនាទីក្នុងរដ្ឋាភិបាលគឺការសម្រេចលើប្រមុខដឹកនាំថា ដក ឫមិនដកប៉ុណ្ណោះ។តែខ្ញុំស្នើឲ្យមន្ត្រីដែលទៅជាមួយលោក ញឹក ប៊ុនឆៃ ដាក់ពាក្យលាឈប់ពីបក្សទៅ ព្រោះកុំឲ្យថ្ងៃមុខមានការបាត់បង់តួនាទីក្នុងរដ្ឋាភិបាល រត់ចេញ ឬរត់ចូលបក្សវិញស្រេចតែចិត្ត»។នេះជាការបញ្ជាក់របស់លោក ញ៉េប ប៊ុនជិន។

អ្នកនាំពាក្យគណបក្សប្រជាជនកម្ពុជាលោក សុខ ឥសាន ក៏បដិសេធមិនឆ្លើយសំនួរដែលសួរទាក់ទងនិងតួនាទីមន្ត្រីបក្សហ្វ៊ុនស៊ិនប៉ិចនេះដែរ ដោយលោកគ្រាន់តែឆ្លើយថា ចំណុចទាំងអស់នេះ គឺអាស្រ័យទៅលើសម្ដេច ហ៊ុន សែន ប្រមុខរដ្ឋាភិបាល។

លោក ញឹក ប៊ុនឆៃ ដែលបានដើរចេញពីបក្សហ្វ៊ុនស៊ិនប៉ិច ទៅបង្កើតគណបក្សថ្មីនេះ ដោយសារតែលោកមិនពេញចិត្តនឹងការដឹកនាំរបស់សម្ដេចក្រុមព្រះ នរោត្តម រណឫទ្ធិ ដែលបានកៀបសង្កត់មកលើខ្លួន និងមន្ត្រីបក្សមួយចំនួនទៀត ។ អនុប្រធានរូបនេះថា ទ្រង់ រណឫទ្ធិ បានបង្កើតបក្សពួកនិយម ដឹកនាំបែបអត្តនោម័ត ហើយបក្សគ្មានការរីកចម្រើនទេក្នុងរយៈពេល១ឆ្នាំនេះ។ ជាងនេះទៅទៀតនៅក្នុងបទសម្ភាសន៍ជាមួយសារព័ត៌មានថ្មីៗ លោក ញឹក ប៊ុនឆៃ អះអាងថា លោកនិងសម្ដេចក្រុមព្រះ មានរបៀបដឹកនាំ និងចរិតផ្សេងគ្នា ដែលមិនអាចរួបរួមគ្នាទៀតបានឡើយ។

លោក ញ៉េប ប៊ុនជិន ចាត់ទុកការចាកចេញរបស់លោក ញឹក ប៊ុនឆៃ ថា ជាសិទ្ធិរបស់លោក ញឹក ប៊ុនឆៃ។តែយ៉ាងណាអ្នកនាំពាក្យរូបនេះ ស្នើឲ្យលោក ញឹក ប៊ុនឆៃ ពិចារណាឲ្យបានច្បាស់លាស់ ដោយលោករំលឹកលោក ញឹក ប៊ុនឆៃ ឲ្យក្រឡេកទៅមើលមេរៀនពីអតីតកាលឆ្នាំ២០០៦ ក្រោយពីបក្សបានបែកបាក់គ្នា គឺគណបក្សរាជានិយមបានបាត់បង់សំឡេងពី២៦កៅអី មកសូន្យកៅអី បាត់បង់រចនាសម្ព័នបក្សជាដើម៕