អន្តរជាតិ
អាមេរិកថា កិច្ចប្រជុំលោក អូបាម៉ា និងមេដឹកនាំអាស៊ាននៅ Sunnylands មិនមែនដើម្បីប្រឆាំងចិនឡើយ
× សហរដ្ឋអាមេរិកបានបញ្ជាក់ថាកិច្ចប្រជុំភាពជាដៃគូយុទ្ធសាស្ត្រអាមេរិក អាស៊ានដែលនឹងត្រូវរៀបចំឡើងនៅសហរដ្ឋអាមេរិកថ្ងៃ ១៥ដល់១៦កុម្ភៈខាងមុខមិនមែនប្រឆាំងចិនឡើយ។ គេរំពឹងថា កិច្ចប្រជុំពិសេសនេះនឹងជជែកពិភាក្សាពីទំនាក់ទំនងអាស៊ាន-អាមេរិកក្រោយតំឡើងជាដៃគូយុទ្ធសាស្ត្រតែប៉ុណ្ណោះ មិនមែនបញ្ហាចិនឡើយ។
ឧបការីរដ្ឋមន្ត្រីការបរទេសអាមេរិកទទួលបន្ទុកតំបន់អាស៊ីបូព៌ា លោក Daniel Russel បានប្រកាសថា កិច្ចប្រជុំកំពូលអាស៊ាន-អាមេរិកនៅពាក់កណ្តាលខែកុម្ភៈខាងមុខនេះមិនមែនធ្វើឡើងដើម្បីប្រឆាំងក្រុងប៉េកាំងឡើយ។ មន្ត្រីជាន់ខ្ពស់អាមេរិករូបនេះបានថ្លែងដូច្នេះក្រោយពេលមានការលើកឡើងថា អាមេរិកកំពុងទាក់ទាញនិងបញ្ចុះបញ្ជូលមេដឹកនាំអាស៊ានដើម្បីប្រឆាំងនឹងឥទ្ធិលចិនក្នុងតំបន់។
សូមទាញការចាប់អារម្មណ៍បន្តិចដែរ ក្នុងកិច្ចប្រជុំនៅម៉ាឡេស៊ីចុងឆ្នាំមុន ប្រធានាធិបតីអាមេរិកលោក បារ៉ាក់ អូបាម៉ា ស្នើសុំរៀបចំកិច្ចប្រជុំកំពូលនេះដោយអញ្ជើញមេដឹកនាំអាស៊ានទាំង១០ រួមទាំងសម្តេច ហ៊ុន សែន នាយករដ្ឋមន្ត្រីកម្ពុជាផងនោះទៅចូលរួមកិច្ចប្រជុំនៅ Sunnylands កាលីហ្វរនីញ៉ាពីថ្ងៃ ១៥ដល់ថ្ងៃ ១៦ កុម្ភៈនេះ។
លោក Daniel Russel បានសង្កត់ធ្ងន់ថា កិច្ចប្រជុំកំពូលអាមេរិក-អាស៊ានមិនមែនជាកិច្ចពិភាក្សាពីបញ្ហាចិនឡើយ តែប្រធានបទដែលស្ថិតក្នុងរបៀបវារៈគឺទំនាក់ទំនងទ្វេភាគីរវាងអាស៊ាន និងអាមេរិកដែលត្រូវបានដំឡើងដល់កម្រិតភាពជាដៃគូយុទ្ធសាស្ត្រកាលពីចុងឆ្នាំមុននោះ។ ដូច្នេះវាមិនមែនជាវេទិកាប្រឆាំងចិនអ្វីដែរ។
យោងតាមទីភ្នាក់ងារព័ត៌មាន Reuters កិច្ចប្រជុំនេះនឹងក្លាយជាវេទិកាពិភាក្សាពិសេសមួយ ដែលប្រធានាធិបតីបារ៉ាក់ អូបាម៉ា និងបណ្តាប្រមុខរដ្ឋ ប្រមុខរដ្ឋាភិបាលនៃប្រទេសសមាជិកអាស៊ានជជែកពុភាក្សាពីសមិទ្ធផលអាមេរិក និង អាស៊ានសម្រេចបាន និងស្វែងរកយុទ្ធសាស្ត្រសំខាន់ៗដើម្បីលើកកម្ពស់ចំណងមិត្តភាពទ្វេភាគីបន្តទៅមុខទៀតដែរ។ លោក អូបាម៉ា នឹងយកឱកាសកិច្ចប្រជុំនេះ
ត្រួតពិនិត្យនិងពិភាក្សាពីការវិវត្តនៃការវិនិយោគអាមេរិកក្នុងរយៈពេល ជាង៧ឆ្នាំនៅតំបន់អាស៊ីប៉ាស៊ីហ្វិកជាពិសេសតំបន់អាស៊ីអាគ្នេយ៍ ដែលវាជាផ្នែកមួយគោលនយោបាយត្រលប់មកតំបន់អាស៊ីដែលដាក់ចេញដោយរដ្ឋបាលលោកតាំងពីឆ្នាំ ២០០៩មកនោះ។
ពាក់ព័ន្ធបញ្ហាសមុទ្រចិនខាងត្បូង ឧបការីរដ្ឋមន្ត្រីការបរទេសអាមេរិកខាងលើបានបញ្ជាក់ជាថ្មីថា សហរដ្ឋអាមេរិកមិនមានចំណែកអ្វីក្នុង ជម្លោះសមុទ្រចិនខាងត្បូងតែអាមេរិកខ្វល់ខ្វាយពីសេរីភាពនាវាចរណ៍ដែលជាផ្លូវសំខាន់សម្រាប់ពាណិជ្ជកម្មសមុទ្រ។
លោកថា បញ្ហាប្រឈមបច្ចុប្បន្នទាក់ទងជម្លោះកោះនិងដែនសមុទ្រនៅសមុទ្រចិនខាងត្បូងមិនមែនជាល្បែងផលបូកសូន្យ (Zero-Sum Game) ហើយក៏មិនមែនជាជម្លោះដែលមានអាមេរិកនិងចិននៅពីក្រោយដែរ។ បញ្ហាសំខាន់គឺត្រូវសួរថាតើ ភាគីជម្លោះដែលជារដ្ឋអាស៊ាននិងចិនផ្ទាល់នោះនឹងអាចដោះស្រាយបញ្ហាដោយពឹងផ្អែកលើគោលការណ៍សកល និងនីតិរដ្ឋដែរឬអត់។
មហាចិនទាមទារតំបន់ជម្លោះស្ទើរតែ៩០ភាគរយ ដោយផ្អែកលើលក្ខខណ្ឌប្រវត្តិសាស្ត្រ ហើយមហាអំណាចតំបន់នេះមិនដែរចង់ឲ្យមានការដោះស្រាយជម្លោះនេះតាមផ្លូវច្បាប់ឡើយ៕
Tag:
អាស៊ាន
អាមេរិក
ចិន
Sunnylands
© រក្សាសិទ្ធិដោយ thmeythmey.com