ជាតិ
ព្រឹទ្ធសភាអនុម័តច្បាប់ស្តីពី គណនេយ្យ និងសវនកម្ម ទាំងស្រុងសំឡេង ៥៦/៥៦
× ភ្នំពេញ៖ សមាជិកព្រឹទ្ធសភាចំនួន ៥៦/៥៦ នៃអង្គប្រជុំព្រឹទ្ធសភាបានពិនិត្យ និងឲ្យយោបល់ឯកភាព លើសេចក្តីព្រាងសេចក្តីព្រាងច្បាប់ ស្តីពី គណនេយ្យ និងសវនកម្ម ទាំងស្រុង ដោយឥតកែប្រែក្នុងសម័យប្រជុំលើកទី៨ ព្រឹទ្ធសភា នីតិកាលទី៣ ដែលដឹកនាំប្រជុំដោយសម្តេច សាយ ឈុំ ប្រធានព្រឹទ្ធសភា នៅថ្ងៃទី៥ ខែកុម្ភៈ ឆ្នាំ២០១៦ ។
សេចក្តីព្រាងច្បាប់ស្តីពី គណនេយ្យ និងសវនកម្ម តាក់តែងឡើងជាលាយលក្ខណ៍អក្សរ មាន ១៣ជំពូក ៣៩មាត្រា។ ច្បាប់នេះ ត្រូវបានរដ្ឋសភា អនុម័តយល់ព្រមជាលើកដំបូងចំនួន ៩៧សំឡេង កាលថ្ងៃទី១៤ ខែមករា ឆ្នាំ២០១៦។
បើតាមសេចក្តីប្រកាសព័ត៌មានរបស់អគ្គលេខាធិការដ្ឋានព្រឹទ្ធសភា សេចក្តីព្រាងច្បាប់នេះ ត្រូវបានរៀបចំឡើងក្នុងគោលបំណងគ្រប់គ្រងវិស័យគណនេយ្យ និងសវនកម្មប្រកបដោយប្រសិទ្ធភាព តម្លាភាព គណនេយ្យភាព និងភាពជឿទុកចិត្តនៅក្នុងប្រទេសកម្ពុជា។ រាជរដ្ឋាភិបាលបានសម្រេចរៀបចំសេចក្តីព្រាងច្បាប់ស្តីពី គណនេយ្យ និងសវនកម្មថ្មី ជំនួសច្បាប់ស្តីពី គណនេយ្យសហគ្រាស សវនកម្មគណនេយ្យសហគ្រាស និងវិជ្ជាជីវៈគណនេយ្យ ដែលមានជាធរមាន ដោយផ្អែកលើការសិក្សាពីបទពិសោធន៍ និងបរិការណ៍សេដ្ឋកិច្ចពិភពលោក ដែលបានស្តែងឲ្យឃើញឡើងនូវវិបត្តិនាពេលកន្លងមក ដើម្បីឆ្លើយតបទៅនឹងការវិវត្តថ្មីៗនៃវិធានប្រុងប្រយ័ត្នផ្នែកគណនេយ្យ និងសវនកម្ម នៅក្នុងក្របខណ្ឌតំបន់ និងអន្តរជាតិ ។
អគ្គលេខាធិការព្រឹទ្ធសភាលោក អ៊ុំ សារិទ្ធ បានបញ្ជាក់ថា សេចក្តីព្រាងច្បាប់នេះ ឆ្លុះបញ្ចាំងនូវការអភិវឌ្ឍដ៏លឿននៃសកម្មភាពសេដ្ឋកិច្ច និងហិរញ្ញវត្ថុក្នុងប្រទេស និងការប្រមើលមើលជាទស្សនវិស័យលើវិស័យនេះទៅអនាគត ក៏ដូចជាភាពចាំបាច់ក្នុងការអនុលោមតាមស្តង់ដារមូលដ្ឋានជាអន្តរជាតិ។ ហើយថា សេចក្តីព្រាងច្បាប់នេះ អាចឆ្លើយតបបានទាំងស្រុងទៅនឹងស្តង់ដាគណនេយ្យ និងសវនកម្មអន្តរជាតិ និងតំបន់ ដែលមានសារសំខាន់នៅក្នុងបរិការណ៍សមាហរណកម្មកម្ពុជា ទៅក្នុងសហគមន៍សេដ្ឋកិច្ចអាស៊ាន។
លើសពីនេះ លោកថា សេចក្តីព្រាងច្បាប់ស្តីពី គណនេយ្យ និងសវនកម្ម បានដើរតួនាទីយ៉ាងសំខាន់ក្នុងវិស័យសេដ្ឋកិច្ច និងសង្គម ជាពិសេសក្នុងការធានាភាពត្រឹមត្រូវច្បាស់លាស់ តម្លាភាព គណនេយ្យភាព និងអភិបាលកិច្ចល្អ ក្នុងការគ្រប់គ្រងកិច្ចប្រតិបត្តិការ ហិរញ្ញវត្ថុទាំងក្នុងវិស័យសាធារណៈ និងវិស័យឯកជន ដែលរាជរដ្ឋាភិបាលបានចាត់ទុកវិស័យ គណនេយ្យ និងសវនកម្មនេះ ជាផ្នែកមួយដ៏សំខាន់នៅក្នុងការអភិវឌ្ឍវិស័យហិរញ្ញវត្ថុរបស់ជាតិ ដូចមានចែងនៅក្នុងចក្ខុវិស័យ និងផែនការអភិវឌ្ឍវិស័យហិរញ្ញវត្ថុឆ្នាំ២០០១-២០១០ ដែលត្រូវបានធ្វើបច្ចុប្បន្នកម្មទៅជាយុទ្ធសាស្ត្រអភិវឌ្ឍន៍វិស័យហិរញ្ញវត្ថុឆ្នាំ២០០៦-២០១៥ ហើយបន្តមកទៀតយុទ្ធសាស្ត្រអភិវឌ្ឍន៍វិស័យហិរញ្ញវត្ថុឆ្នាំ២០១១-២០២០។
បើតាមអគ្គលេខាធិការព្រឹទ្ធសភា បើប្រៀបធៀបសេចក្តីព្រាងច្បាប់ស្តីពី គណនេយ្យ និងសវនកម្មថ្មី ជាមួយនឹងច្បាប់ស្តីពី គណនេយ្យសហគ្រាស សវនកម្មគណនេយ្យសហគ្រាស និងវិជ្ជាជីវៈគណនេយ្យ គឺមានចំណុច ជាឧត្តមប្រយោជន៍ និងគុណសម្បត្តិជាច្រើនរួមមានដូចខាងក្រោម៖
-បង្កើនតម្លាភាព និងសុក្រឹតភាពនៃឯកសារគណនេយ្យ និងរបាយការណ៍ហិរញ្ញវត្ថុ របស់ស្ថាប័នសាធារណៈ និងសហគ្រាសដែលអាចបង្កើននូវជំនឿទុកចិត្តរបស់សាធារណជនលើស្ថាប័នរដ្ឋ និងសហគ្រាស ក៏ដូចជាទំនុកចិត្តរបស់វិនិយោគិនក្នុងស្រុក និងបរទេស។
-ជំរុញគណនេយ្យភាព និងអភិបាលកិច្ចល្អនៃស្ថាប័នសាធារណៈ និងសហគ្រាស។
-បង្កើនគុណភាព និងសមត្ថភាពធនធានមនុស្សជាគណនេយ្យករ និងសវនករ និងលើកកម្ពស់វិជ្ជាជីវៈគណនេយ្យ និងសវនកម្ម។
-ជំរុញបន្ថែម និងទ្រទ្រង់និរន្តរភាពនៃទីផ្សារមូលធន ព្រមទាំងបង្កលក្ខណៈឲ្យសហគ្រាសធុនតូច និងមធ្យម មានលទ្ធភាពចូលរួមក្នុងទីផ្សារមូលធន និងលើកកម្ពស់ប្រសិទ្ធភាពនៃការប្រមូលពន្ធជូនរដ្ឋ។
ដោយឡែក អត្ថប្រយោជន៍ផ្សេងទៀតនៃសេចក្តីព្រាងច្បាប់នេះ មានដូចជា ជំរុញកំណើនចំណូលពន្ធដារប្រកបដោយប្រសិទ្ធភាព ការកត់ត្រាចំណូល, ចំណាយបានត្រឹមត្រូវ អាចឲ្យក្រសួងសេដ្ឋកិច្ច និងហិរញ្ញវត្ថុ ទទួលបានតួលេខច្បាស់លាស់ អំពីប្រតិបត្តិការអាជីវកម្ម ដែលងាយក្នុងការកំណត់ពន្ធដារ និងបង្កើនចំណូលថវិកាជាតិ ពីអាករនៃការសុំចូលជាសមាជិក ឬសុំអាជ្ញាបណ្ណប្រកបវិជ្ជាជីវៈគណនេយ្យ និងសវនកម្ម (ករណីមិនអនុវត្តន៍តាមច្បាប់ ត្រូវបានពិន័យអន្តរកាល និងជាប់ពន្ធនាគារ)។
ជាងនេះទៀត ធានាបាននូវកំណើនសេដ្ឋកិច្ច(GDP) និងផ្តល់ភាពងាយស្រួលក្នុងការព្យាករណ៍សេដ្ឋកិច្ច គឺក្រសួងសេដ្ឋកិច្ច និងហិរញ្ញវត្ថុ អាចនឹងទទួលបានតួលេខអំពីចំណូលសរុប ឬចំណាយសរុបពិតប្រាកដ ដើម្បីគណនាផលិតផលសរុបក្នុងស្រុក (ផលិតផលសរុបក្នុងស្រុកពិត និងផលិតផល សរុបក្នុងស្រុកម្នាក់ៗ) និងផ្តល់ភាពងាយស្រួលដល់ការសិក្សាស្រាវជ្រាវ វិភាគ អំពីគ្រប់សកម្មភាពសេដ្ឋកិច្ច ដែលជាមូលដ្ឋានសម្រាប់ព្យាករណ៍សេដ្ឋកិច្ច។
ធានាបាននូវភាពច្បាស់លាស់ តម្លាភាព គណនេយ្យភាព និងអភិបាលកិច្ចល្អលើកិច្ចប្រតិបត្តិការ ហិរញ្ញវត្ថុ គឺដោយមើលឃើញនូវបញ្ហាប្រឈមកើតឡើងពីកំណើនធុរកិច្ច រាជរដ្ឋាភិបាលបានបង្កើតច្បាប់ថ្មីនេះ ដោយផ្តល់សិទ្ធិបន្ថែមដល់ក្រុមប្រឹក្សាជាតិគណនេយ្យ (ក.ជ.គ) ក្នុងការតាមដាន ត្រួតពិនិត្យ និងវាយតម្លៃ លើការអនុវត្តច្បាប់ស្តង់ដារ បង្កើតជាក្រមសីលធម៌ វិជ្ជាជីវៈគណនេយ្យ និងសវនកម្ម ហើយក៏មានវិធានការមួយចំនួនដោយអនុញ្ញាតឲ្យក្រុមប្រឹក្សា ជាតិគណនេយ្យអាចផ្តល់ ព្យួរ និងដកហូតអាជ្ញាបណ្ណប្រកបវិជ្ជាជីវៈគណនេយ្យ ដោយអាចចាត់វិធានការវិន័យ ឬទណ្ឌកម្មរដ្ឋបាល។
រីឯ អំពើបំពានច្បាប់ និងបង្កើនគុណភាព និងពង្រឹងសមត្ថភាព គឺតម្រូវការធនធានមនុស្សប្រកបដោយគុណភាព លើវិស័យគណនេយ្យ និងសវនកម្ម ទាំងក្នុងវិស័យឯកជន និងវិស័យសាធារណៈ ដើម្បីធ្វើការលើរបាយការណ៍ហិរញ្ញវត្ថុឲ្យបានត្រឹមត្រូវ និងស្របតាមស្តង់ដារគណនេយ្យ បង្ហាញពីតម្លាភាព ភាពត្រឹមត្រូវរបស់វិនិយោគិន និងស្របតាមនិយាមអន្តរជាតិ (ស្តង់ដារបាយការណ៍ហិរញ្ញវត្ថុ អន្តរជាតិ)៕
© រក្សាសិទ្ធិដោយ thmeythmey.com