ជាតិ
នយោបាយជាតិ
ឆន្ទៈពលរដ្ឋ តម្រូវឲ្យសម រង្ស៊ី-កឹម សុខា រួបរួមគ្នាដើម្បីបញ្ចប់ការបែកបាក់ជាតិ
× ភ្នំពេញ៖ ឆ្លើយតបនឹងសំណួររបស់មតិមហាជន ដែលសង្ស័យពីការបែកបាក់គ្នារវាងឯកឧត្តមសម រង្ស៊ី និងឯកឧត្តម កឹម សុខា នៅព្រឹកថ្ងៃទី០៦ កុម្ភៈនេះ ប្រធានស្តីទីគណបក្សសង្គ្រោះជាតិ ឯកឧត្តម កឹម សុខា បានថ្លែងនៅក្នុងវេទិកាសកម្មជនមូលដ្ឋាន ស្ថិតក្នុងក្រុងតាខ្មៅ ខេត្តកណ្តាល ថា គណបក្សសង្គ្រោះជាតិ មិនបែកបាក់គ្នានោះទេ ពីព្រោះពលរដ្ឋខ្មែរតម្រូវឲ្យលោកទាំងពីរត្រូវតែរួបរួមគ្នា។
ថ្លែងនៅក្នុងវេទិកាជាមួយសកម្មជនមូលដ្ឋាន នៅព្រឹកថ្ងៃទី០៦ កុម្ភៈ ឯកឧត្តម កឹម សុខា ប្រធានស្តីទីគណបក្សសង្គ្រោះជាតិ បានថ្លែងថា លោកទាំងពីរនឹងបន្តការរួបរួមគ្នា តាមឆន្ទៈរបស់ពលរដ្ឋខ្មែរ។ តំណាងរាស្ត្រមណ្ឌលកំពង់ចាមរូបនេះ បានបញ្ជាក់តាមរយៈការផ្សាយ ផ្ទាល់នៅលើទំព័រហ្វេសប៊ុករបស់ខ្លួនយ៉ាងដូច្នេះថា៖ «បងប្អូនខ្លះ ភ័យថា លោក សម រង្ស៊ី និង កឹម សុខា បែកបាក់គ្នា ក្បត់គ្នាអត់ ក្បត់ទៅលក់ខ្លួនឲ្យគេដែរអត់។ មិនអាចទៅរួចទេបងប្អូន ពីព្រោះ ឆន្ទៈបងប្អូនមុះមុតណាស់ តម្រូវឲ្យពួកយើងខ្ញុំជាអ្នកដឹកនាំត្រូវតែរួមគ្នា ត្រូវតែស្របតាមឆន្ទៈរាស្ត្រ»។ មិនត្រឹមតែ មិនបែកបាក់នៅក្នុងជួរគណបក្សសង្គ្រោះជាតិនោះទេ ប៉ុន្តែ ឯកឧត្តម កឹម សុខា បានអំពាវនាវ ឲ្យខ្មែររួមគ្នាកុំឲ្យមានការបែកបាក់ជាតិចាប់ពីពេលនេះតទៅ។
លោកបញ្ជាក់យ៉ាងដូច្នេះថា៖ « រឿង បក្សសម រង្ស៊ី បក្សសិទ្ធិមនុស្សរួមគ្នា មិនមែនត្រឹមតែរួមគ្នា បង្កើតបក្សសង្គ្រោះជាតិនោះទេ គោលដៅធំរបស់យើងគឺដើម្បីរួបរួមជាតិ ព្រោះកាលណាខ្មែរបែកបាក់គ្នា គឺខ្មែរនឹងអន្តរាយ ហើយបរទេសនឹងមើលងាយហើយៗ កុំអួត ខាងណាក៏ដោយ បើបែកបាក់គ្នាទៅពឹងគេ ហើយបើទៅពឹងគេ គឺគេមើលងាយហើយ ដូច្នេះ ត្រូវបញ្ចប់ការបែកបាក់ជាតិពីពេលនេះតទៅ»។
ថ្លែងនៅក្នុងវេទិកាដែលមានអ្នកចូលរួមរាប់ពាន់នាក់ ឯកឧត្តម កឹម សុខា ក៏បានរិះគន់ ចំពោះវិស័យសុខាភិបាលកម្ពុជា ថា នៅទន់ខ្សោយ។ប្រមុខបក្សប្រឆាំងរូបនេះ បានបញ្ជាក់ថា៖ «លើវិស័យសុខាភិបាល យើងថា មិនមែនអន់ទេ ឥឡូវខំហើយ កែទម្រង់នេះ កែទម្រង់នោះ តែសួរថា អ្នកក្រីក្រអត់លុយទៅពេទ្យ ពេទ្យមើលឲ្យដែរអត់គ្រប់គ្នាហ្នឹង។ ទាំងកូនចៅ ទាំងមេបក្សកាន់អំណាច និងបក្សប្រឆាំង ពេលឈឺចេះតែងរត់ទៅស្រុកយួន រត់ទៅស្រុកសៀម រត់ទៅសិង្ហបុរីឲ្យគេមើល វាអាម៉េចវិញ សុខាភិបាលហ្នឹង។ ទាំងខ្ញុំទាំងគេ ទៅក្រៅប្រទេសទាំងអស់គ្នា។ ទទួលស្គាល់ទាំងអស់គ្នាថា ប្រព័ន្ធសុខាភិបាលយើងអន់ បើអន់អត់ទទួលថាអន់ កែអត់កើតទេ»។
គួរបញ្ជាក់ថា មួយរយៈពេលចុងក្រោយនេះ គណបក្សសង្គ្រោះជាតិ បានចុះពង្រឹងសកម្មជន មូលដ្ឋានរបស់ខ្លួន ដើម្បីរៀបចំខ្លួនយកឈ្នះ ក្នុងការបោះឆ្នោតឃុំសង្កាត់នៅឆ្នាំ២០១៧ និង ការបោះឆ្នោតជាតិនៅឆ្នាំ២០១៨ខាងមុខ៕
© រក្សាសិទ្ធិដោយ thmeythmey.com