ជាតិ
សង្គមជាតិ
×![]()
សៀមរាប៖ ស្នងការនគរបាលខេត្តសៀមរាបបានឲ្យដឹងថា ការដោះស្រាយការកកស្ទះនៅតំបន់ផ្សារចាស់ ដែលជាគោលដៅសំខាន់សម្រាប់ភ្ញៀវទេសចរនៅពេលយប់ គឺជាការងារមួយស្មុគស្មាញបំផុត។ ព្រោះថា ជាទីក្រុងបុរាណ ហើយផ្លូវក្នុងតំបន់ផ្សារចាស់ទៀតសោត ក៏មិនអាចពង្រីកបាននោះដែរ។ កំណើនយាន្តយន្តជាមូលហេតុសំខាន់ ដែលធ្វើឲ្យតំបន់ផ្សារចាស់ ឫផាប់ស្ទ្រីត តែងកកស្ទះជារឿយៗ ក្នុងនោះគេសង្កេតឃើញកំណើតរ៉ឺម៉កកង់បី ដែលមានចំនួនច្រើនជាងគេ។
ស្នងការនគរបាលខេត្តសៀមរាប លោក សត ណាឌី បានឲ្យដឹងថា បញ្ហាប្រឈមក្នុងការរៀបចំសណ្តាប់ធ្នាប់នៅតំបន់ផ្សារចាស់ រួមមានបញ្ហារ៉ឺម៉កកង់បី មធ្យោបាយធ្វើដំណើររបស់អ្នកធ្វើការនៅតាមហាងមួយៗ បញ្ហាអ្នកសុំទាន បញ្ហារទេះរុញចល័ត និងបញ្ហារថយន្តដឹកភ្ញៀវ ដែលគ្មានចំណតត្រឹមត្រូវ។ លោក សត ឌីណា បញ្ជាក់ថា អ្នករត់រ៉ឺម៉កកង់បី និងរទេះរុញចល័តតែងបង្កការកកស្ទះនៅតាមផ្លូវក្នុងតំបន់ផ្សារចាស់ ដែលភ្ញៀវនិយមដើរពេលយប់។
សម្រាប់វិធានការរបស់អាជ្ញាធរខេត្ត គឺត្រឹមហៅពួកគេអប់រំឲ្យយល់ដឹងពីផលប៉ះពាល់តែប៉ុណ្ណោះ ចំណែកការដាក់ទោសទណ្ឌ គឺពុំមានច្បាប់នៅឡើយ។ លោក សត ឌីណា បន្ថែមថា គេមិនត្រូវមើលស្រាលលើបញ្ហាទាំងអស់នេះបានទេ ព្រោះថាវាអាចនឹងបង្កជាបញ្ហាអសន្តិសុខសង្គមបាន។ ស្នងការខេត្តសៀមរាប បានលើកឧទាហរណ៍ដូចប្រទេសលីប៊ី ដែលធ្វើឲ្យប្រទេសជាតិធ្លាក់ក្នុងភាពលំបាក ដោយសារតែការហាមប្រាណមិនឲ្យលក់ដូរនេះ។ «ដើមហេតុ ប៉ូលិសលីប៊ី ចុះធ្វើសណ្តាប់ធ្នាប់ដោយទៅចាប់កញ្ច្រែងលក់របស់និស្សិត ទើបបង្កឲ្យផ្ទុះអំពើហិង្សាកើតឡើង ហើយអ្នកនយោបាយលូកដៃចូល ធ្វើឲ្យប្រទេសនេះរងគ្រោះដោយសារបដិវត្តន៍ផ្កាម្លិះ»។ នេះជាការបញ្ជាក់បន្ថែមរបស់លោក សត ណាឌី។តាមការបញ្ជាក់របស់លោក សត ណាឌី ដដែល ក្នុងមួយយប់ៗមានរ៉ឺម៉កកង់បី ចន្លោះពី៣០០ទៅ៥០០គ្រឿង ដែលចល័តដឹកភ្ញៀវនៅតំបន់ផ្សារចាស់។ ក្រៅពីនេះមានម៉ូតូពី៣០០ទៅ៥០០គ្រឿង កង់ពី៣០០ទៅ៥០០គ្រឿង រទេះរុញចល័តភាគច្រើនលក់ទឹកផ្លែឈើ មានពី៧០ទៅ៩០គ្រឿង។ បច្ចុប្បន្នតំបន់ផ្សារចាស់ មានកន្លែងចំណតយានយន្តតែមួយកន្លែងប៉ុណ្ណោះ គឺនៅក្រោមដើមពោធិ៍ មុខសណ្ឋាគារតាព្រហ្ម ក្រៅពីនេះ រថយន្តមួយចំនួនធំ តែងចតនៅកៀនផ្លូវក្បែរតំបន់នោះ ដែលបង្កជាការកកស្ទះគ្មានលោះថ្ងៃឡើយ៕
© រក្សាសិទ្ធិដោយ thmeythmey.com
