ជាតិ
ក្រសួងមហាផ្ទៃបង្គាប់ឲ្យលោក ញឹក ប៊ុនឆៃ កែប្រែសញ្ញាគណបក្ស
× ក្រោយពីក្រសួងមហាផ្ទៃបានពិនិត្យ លើការស្នើសុំរបស់លោក ញឹក ប៊ុនឆៃ រួចមក ក្រសួងមហាផ្ទៃបានសម្រេចឲ្យ លោក ញឹក ប៊ុនឆៃ កែប្រែសញ្ញាសម្គាល់គណបក្សខ្មែរ រួបរួមជាតិ របស់លោកឡើងវិញ ដោយសារតែមានលក្ខណៈដូចទៅនឹង សញ្ញាសម្គាល់គណបក្សដទៃ ដែលបានប្រើប្រាស់រួចហើយ។
បើតាមលិខិតសម្តេច ស ខេង ដែលចេញកាលពីម្សិលមិញ បានឲ្យដឹងថា «ក្រសួងមហាផ្ទៃបានពិនិត្យឃើញថា សញ្ញាសម្គាល់របស់គណបក្សខ្មែររួបរួមជាតិ គឺជាសញ្ញាសម្គាល់ដែលគណបក្សនយោបាយផ្សេង បានប្រើប្រាស់រួចមកហើយ។ ដូច្នេះក្រសួងមហាផ្ទៃស្នើសុំឲ្យឯកឧត្តម ធ្វើការផ្លាស់ប្តូរសញ្ញាសម្គាល់ របស់គណបក្សឡើងវិញ ដើម្បីឲ្យស្របតាមច្បាប់ ដែលបានកំណត់»។
ការបដិសេធរបស់ក្រសួងមហាផ្ទៃនេះ គឺធ្វើឡើងក្រោយពី សម្តេចក្រុមព្រះ នរោត្តម រណឫទ្ធិ បានបញ្ជូនលិខិតមួយកាលពីថ្ងៃទី០៤ ខែកុម្ភៈ នេះទៅក្រសួងមហាផ្ទៃ ដើម្បីជំទាស់ទៅនឹង លោក ញឹក ប៊ុនឆៃ ដែលបង្កើតបក្សថ្មីហើយយករូបស្លាកសញ្ញាគណបក្សហ្វ៊ុនស៊ិនប៉ិចចាស់ ដែលធ្លាប់បានបង្កើតរួចហើយ។
កន្លងមកលោក ញឹក ប៊ុនឆៃ ពន្យល់ថា មូលហេតុដែលលោកយក Logo គណបក្សហ្វ៊ុនស៊ិនប៉ិចចាស់មកប្រើ ដោយសារលោកចង់រក្សាមរតកដើមហ្វ៊ុនស៊ិនប៉ិច ដែលព្រះបរមរតនកោដ្ឋបានបន្សល់ទុក។ លោកថា បន្ទាប់ពីព្រះអង្គម្ចាស់ នរោត្តម រណឫទ្ធិ យាងមកធ្វើជាប្រធានបក្សហ្វ៊ុនស៊ិនប៉ិចឡើងវិញនៅឆ្នាំ ២០១៥ ព្រះអង្គបានបោះចោលLogo ចាស់នេះ ទៅបង្កើតLogo ថ្មី ដែលលោកនិងអ្នករាជានិយមមួយចំនួនមិនពេញចិត្ត៕
Tag:
ញឹក ប៊ុនឆៃ
ក្រសួងមហាផ្ទៃ
© រក្សាសិទ្ធិដោយ thmeythmey.com