អន្តរជាតិ
នយោបាយអន្តរជាតិ
រុស្សីបារម្ភលើគម្រោងពង្រាយប្រព័ន្ធការពារអាកាសរបស់អាមេរិកនៅកូរ៉េខាងត្បូង
× ក្រសួងការបរទេសរុស្សី បានបង្ហាញការព្រួយបារម្ភរបស់ខ្លួន លើការពង្រាយប្រព័ន្ធការពារអាកាសរបស់អាមេរិក នៅកូរ៉េខាងត្បូង ក្រោមហេតុផលថាការពារកូរ៉េខាងត្បូង ពីការវាយប្រហាររបស់កូរ៉េខាងជើង។ រុស្សីក៏បានចាត់ទុកការពង្រាយប្រព័ន្ធការពារអាកាសនេះ ជាសកម្មភាពដែលអាចនាំឲ្យប៉ះពាល់ដល់ទំនាក់ទំនងរុស្សី និងអាមេរិកផងដែរ។ នេះបើយោងតាមសារព័ត៌មាន New China។
ក្រសួងការបរទេសរុស្សីបានចេញសេចក្ដីសេចក្ដីថ្លែងការណ៍មួយ បង្ហាញពីការព្រួយបារម្ភ នៅពេលដែលទីក្រុងវ៉ាស៊ីងតោន និងទីក្រុងសេអ៊ូល បានចាប់ផ្ដើមការពិភាក្សាលើការពង្រាយប្រព័ន្ធការពារអាកាសនៅកូរ៉េខាងត្បូង។ រុស្សីយល់ថា នេះជាគ្រាន់តែជាលេសសម្រាប់អាមេរិក ក្នុងការពង្រាយប្រព័ន្ធការពាររបស់ខ្លួននៅលើពិភពលោកតែប៉ុណ្ណោះ ហើយវាក៏អាចផ្ដល់ផលមិនល្អក្នុងទំនាក់ទំនងរុស្សី និងអាមេរិក។
សេចក្ដីថ្លែងការណ៍ដដែលនោះក៏បានបញ្ជាក់ដែរថា ការពង្រាយប្រព័ន្ធការពារអាកាសនៅក្នុងតំបន់ ដោយអះអាងថាមានការប្រឈមមុខផ្នែកសន្តិសុខ នឹងធ្វើឲ្យមានការប្រណាំងប្រជែងសព្វាវុធនៅតំបន់អាស៊ីខាងកើត។ លើសពីនោះ វាក៏នឹងធ្វើឲ្យរាំងស្ទះការចរចាស្ដីពីនុយក្លេអ៊ែរជាមួយកូរ៉េខាងជើង ក៏ដូចជាប៉ះពាល់ដល់ផែនការពង្រាយប្រព័ន្ធការពារលើពិភពលោកផងដែរ។
លើសពីនេះទៅទៀត សេចក្ដីថ្លែងការណ៍ក៏ទទូចឲ្យបង្កើតប្រព័ន្ធសន្តិភាពរួម នៅក្នុងតំបន់អាស៊ីខាងកើត ដែលនឹងជួយការពារផលប្រយោជន៍សន្តិសុខ ប្រទេសទាំងអស់ក្នុងតំបន់។ ជាមួយគ្នានោះ រុស្សីក៏បានបង្ហាញក្ដីសង្ឃឹម លាយឡំនឹងការព្រមានថា ទាំងអាមេរិក និងកូរ៉េខាងត្បូង នឹងគិតឲ្យច្បាស់ពីលទ្ធផលទាំងឡាយចេញពីការពង្រាយនេះ។
ជារឿយៗ ឲ្យតែកូរ៉េខាងជើងធ្វើការបាញ់កាំជ្រួច ឬសាកល្បងអាវុធ កូរ៉េខាងត្បូងដែលជាសម្ព័ន្ធមិត្តជិតស្និទ្ធរបស់អាមេរិកក្នុងតំបន់ តែងតែស្នើឲ្យមានការដាក់ពង្រាយប្រព័ន្ធការពារអាកាសក្នុងទឹកដីរបស់ខ្លួន។ ទីក្រុងសេអ៊ូលត្រូវការជំនួយការពារនេះជាចាំបាច់ ដើម្បីត្រៀមខ្លួនការពារនឹងការវាយប្រហារជាយថាហេតុណាមួយ ពីសំណាក់ទីក្រុងព្យុងយ៉ាង។
សូមបញ្ជាក់ថា នៅថ្ងៃទី៧ ខែកុម្ភៈ កូរ៉េខាងជើងបានបាញ់រ៉ុកហ្កែតទៅកាន់លំហអាកាស ល្មើសនឹងបម្រាមអន្តរជាតិ ដែលប្រទេសជាច្រើនចាត់ទុកជាការសាកល្បងបច្ចេកវិទ្យាកាំជ្រួចបាលីស្ទិចរយៈចម្ងាយឆ្ងាយ។ ក្រោយការបាញ់បង្ហោះនេះ រដ្ឋាភិបាលកូរ៉េខាងត្បូង បានងាកទៅរកជំនួយប្រព័ន្ធអាកាសរបស់អាមេរិក ដើម្បីការពារខ្លួន។ តែរុស្សីមិនសូវជាសប្បាយចិត្តប៉ុន្មាននោះទេ ពីព្រោះរុស្សីចាត់ទុកនេះជាផែនការរបស់អាមេរិក ក្នុងការហ៊ុមព័ទ្ធឥទ្ធិពលរបស់ខ្លួនប៉ុណ្ណោះ៕
Tag:
អាមេរិក
រុស្សី
កូរ៉េខាងត្បូង
© រក្សាសិទ្ធិដោយ thmeythmey.com