ជាតិ
បទយកការណ៍ / បទសម្ភាសន៍
និស្សិត ទូច សំណាង បង្កើត«រ៉ូបូតប្រមូលសំរាម» ដើម្បីបណ្តុះគំនិតសម្អាតបរិស្ថាន
×![]()
ភ្នំពេញ៖ ក្នុងវ័យ២២ឆ្នាំ ទូច សំណាង ដែលជានិស្សិតឆ្នាំទី៥ផ្នែកអេឡិចត្រូនិកនៃសាកលវិទ្យាល័យន័រតុន បានបង្កើតរ៉ូបូតប្រមូលសំរាមមួយគ្រឿង ដើម្បីបណ្តុះគំនិតពលរដ្ឋឲ្យចូលរួមសម្អាតបរិស្ថាន។ រ៉ូបូតមួយនេះ គេអាចហៅវាថា Cleaning Robot ដែលមានសមត្ថភាពប្រមូលសំរាម ពិសេសវាអាចប្រមូលសំបកកំប៉ុង ឫដបបានចំនួន១៥ ក្នុង១នាទី។
ក្នុងបន្ទប់ស្រាវជ្រាវធំល្មមមួយនៃសាកលវិទ្យាល័យន័រតុន ដែលរួមមានទៅដោយទូរដាក់តាំងសម្ភារៈច្នៃប្រឌិតថ្មីៗ កុំព្យូទ័រ និង ឧបករណ៍ពិសោធន៍ផ្សេងៗ ក្រុមនិស្សិតដែលមានគ្នាប្រមាណ១០នាក់ខ្លះកំពុងតែចុចកុំព្យូទ័រ ឯខ្លះទៀតកំពុងជជែកពិភាក្សាគ្នា។ ដោយឡែក និស្សិត ទូច សំណាង ដែលស្ថិតក្នុងបន្ទប់នេះដែរកំពុងឈរក្បែររ៉ូបូតមួយគ្រឿង ដៃកាន់តេឡេបញ្ជា ទំនងជាចង់ឲ្យវាធ្វើអ្វីម្យ៉ាង។
ភ្នែកសំឡឹងរ៉ូបូតមិនដាក់ សំណាង ឲ្យឈ្មោះវាថា Cleaning Robot។ Cleaning Robot ដែលនិស្សិតរូបនេះបង្កើតវាឡើង មានសមត្ថភាពអាចប្រមូលសំរាម តាមការបញ្ជារបស់មនុស្ស។គេអាចបញ្ជាវាឲ្យប្រមូលសំបកកំប៉ុង ឫដបបានចំនួន១៥ ក្នុង១នាទី។
ជាភ្នាក់ងារសម្អាតបរិស្ថានCleaning Robot អាចឲ្យគេបញ្ជាទៅមុខ-ក្រោយ ងាកឆ្វេង-ស្តាំ តាមចិត្តរបស់អ្នកបញ្ជា។វាមានដៃ២សម្រាប់កៀបសំរាម ស្នូក១សម្រាប់ចូកសំរាម និងមានកង់ដែលអាចឲ្យវាប្តូរទីតាំងបាន។ ក្រៅពីតួខ្លួន Cleaning Robot នៅមានតេឡេ១សម្រាប់បញ្ជាទៅតួខ្លួនទាំងមូលឲ្យធ្វើការ។ ដើម្បីអាចបញ្ជាយ៉ាងនេះបាន សំណាងពន្យល់យ៉ាងដូច្នេះថា៖«ខ្ញុំដាក់បន្ទះឈីបតូច១ ដែលជាខួរក្បាលនៃរ៉ូបូត ដើម្បីចាំទទួលការបញ្ជាពីតេឡេ។ ហើយខ្ញុំបានបញ្ចូលកម្មវិធីដែលឲ្យបន្ទះឈីប និងតេឡេមានទំនាក់ទំនងនិងគ្នា»។ គេអាចបញ្ជាវាក្នុងចម្ងាយ១០០ម៉ែត្រឯណោះ។
«វាមិនងាយស្រួលអ្វីប៉ុន្មានទេ ទម្រាំបានរ៉ូបូតមួយនេះ។ ខ្ញុំបានច្នៃរូបរាងវាខុស៣ ឫ៤ដង។ ហើយតេឡេបញ្ជាវិញរិតតែពិបាក ទម្រាំអាចដាក់កម្មវិធីឲ្យវាអាចបញ្ជាតួរ៉ូបូតបាន ខុសមិនតិចដងទេ»។ នេះជាការពោលរៀបរាប់របស់និស្សិត ទូច សំណាង ពីផលលំបាកពេលបង្កើតរ៉ូបូតនេះឡើង។
ក្នុងរយៈពេល១ខែពេញ ដែលសំណាងត្រូវរៀនផង ឆ្លៀតពេលចូលបន្ទប់ស្រាវជ្រាវផង ហើយរូបគេត្រូវបន្តស្នាដៃដល់យប់ជ្រៅទើបបានសំរាក។ តែចំពោះការចំណាយលើឧបករណ៍ផ្សេងៗ សំណាងទទួលការឧបត្ថមថវិកាពីសាលា ដោយរ៉ូបូត១គ្រឿងនេះ ត្រូវចំណាយប្រមាណ១០០ដុល្លារអាមេរិក។
ទោះជាលំបាក តែសំណាងមិនបានគិតថា ជារឿងធំដុំនោះទេ។ ហេតុតែចិត្តស្រលាញ់ការស្រាវជ្រាវ បង្កើតស្នាដៃថ្មីៗ ផ្សារភ្ជាប់នឹងការអភិវឌ្ឍសង្គម និស្សិតរូបនេះមានគំនិតបង្កើតស្នាដៃនេះឡើង ដើម្បីជួយបណ្តុះគំនិតឲ្យពលរដ្ឋចេះសម្អាតបរិស្ថានជុំវិញខ្លួន។ អ្នកច្នៃប្រឌិតវ័យក្មេងរូបនេះ និយាយយ៉ាងនេះថា៖«ខ្ញុំបង្កើតរ៉ូបូតមួយនេះ ចង់ប្រាប់ឲ្យប្រជាពលរដ្ឋជួយសម្អាតបរិស្ថានរបស់ពួកយើង»។
ដូចបំណងរបស់សំណាង ស្នាដៃមួយនេះធ្លាប់ត្រូវបានដាក់តាំងបង្ហាញ និងចូលរួមប្រកួតប្រជែង ដោយទទួលចំណាត់ថ្នាក់លេខ២ ក្នុងពិធីបុណ្យសមុទ្រ ដែលជាកម្មវិធីជួយជំរុញការចូលរួមសម្អាតបរិស្ថានតាមតំបន់ឆ្នេរសមុទ្រ។
មិនទាន់ស្ងប់ចិត្ត អ្នកច្នៃប្រឌិតរូបនេះ នឹងបង្កើនសមត្ថភាព Cleaning Robot នេះបន្ថែមទៀត។ រូបគេ នឹងស្រាវជ្រាវបន្ត ដើម្បីបំពាក់កាំមេរ៉ា ដែលអាចឲ្យវាប្រមូលសំរាមដោយខ្លួនឯង ដោយមិនចាំបាច់មានមនុស្សបញ្ជា។ រ៉ូបូតនេះ នឹងត្រូវបានបញ្ចូលកម្មវិធីឲ្យវាស្គាល់ពីវត្ថុដែលត្រូវប្រមូល និងវត្ថុដែលមិនត្រូវប្រមូល។
តើពេលណាទើបកម្ពុជាមានរ៉ូបូតប្រមូលសំរាមនេះគ្រប់ទីកន្លែង? តើវាមានតម្លៃប៉ុន្មាន? គេត្រូវនៅរង់ចាំមើលសិន៕
Tag:
បច្ចេកវិទ្យា
© រក្សាសិទ្ធិដោយ thmeythmey.com
