ជាតិ
នយោបាយជាតិ
ឯកឧត្តម កឹម សុខា ថា បើCNRPឈ្នះឆ្នោត គឺអាចផ្ដល់សេចក្ដីសុខជូនពលរដ្ឋគ្រប់និន្នាការ
រូបភាព៖ facebook Kem Sokha
×![]()
ដោយ: ធឿន បញ្ញាឬទិ្ធ
ប្រធានស្ដីទីគណបក្សសង្គ្រោះជាតិ ឯកឧត្តម កឹម សុខា បានអះអាងប្រាប់អ្នកគាំទ្រខ្លួនថា មហិច្ឆតាលោកមិនមែនចង់បានត្រឹមតែការរួបរួមជាមួយឯកឧត្តម សម រង្ស៊ី នោះទេ ពោលគឺលោកចង់ឲ្យខ្មែរមានការរួបរួមជាតិទាំងមូល ហើយត្រូវឈរលើគោលការណ៍លទ្ធិប្រជាធិបតេយ្យ ដែលឈានទៅរកការរៀបចំប្រទេសជាតិឲ្យបានល្អ។
មេដឹកនាំបក្សប្រឆាំងរូបនេះ បន្ថែមថា ដើម្បីឲ្យមានការរៀបចំប្រទេសបានល្អនោះ គណបក្សលោកត្រូវតែបង្ហាញភាពខ្លាំងរបស់ខ្លួន តាមរយៈការប្រកួតប្រជែងបោះឆ្នោត ដើម្បីដណ្ដើមការដឹកនាំប្រទេស។ ឯកឧត្តម កឹម សុខា បញ្ជាក់ថា បើគណបក្សលោកឈ្នះឆ្នោតដឹកនាំប្រទេសនោះប្រជាពលរដ្ឋគ្រប់និន្នាការទាំងអស់ គឺនឹងអាចរស់នៅបានដោយសេចក្ដីសុខ ដោយគ្មានការគុំគួនសងសឹកគ្នានោះឡើយ។
ថ្លែងទៅកាន់សកម្មជនមូលដ្ឋាននិងអ្នកគាំទ្រខ្លួននៅខេត្តកំពង់ស្ពឺ កាលពីថ្ងៃសៅរ៍ម្សិលមិញនោះ ប្រធានស្ដីទីគណបក្សសង្គ្រោះជាតិរូបនេះ បានបញ្ជាក់ដូច្នេះថា៖«យើងត្រូវចូលរួមប្រកួតតាមរយៈការបោះឆ្នោត គូប្រកួតមិនមែនជាគូសត្រូវទេ។ គូប្រកួតក្នុងការបោះឆ្នោតនៅក្នុងប្រទេសយើង គណបក្សណាក៏ដោយមិនមែនជាសត្រូវរបស់គណបក្សសង្គ្រោះជាតិទេ ប៉ុន្ដែគណបក្សនោះអាចជាគូប្រកួតដើម្បីប្រកួតជាមួយគណបក្សសង្គ្រោះជាតិ ដណ្ដើមការដឹកនាំប្រទេស។ ប្រកួតដើម្បីឈ្នះ ឈ្នះដើម្បីអ្វី មិនមែនឈ្នះដើម្បីទៅកម្ទេចអ្នកចាញ់ ឈ្នះដើម្បីធ្វើបាបអ្នកទន់ខ្សោយ ឈ្នះដើម្បីសងសឹកគុំគួនគេ អត់ទេ…។គឺឈ្នះដើម្បីផ្ដល់សេចក្ដីសុខទៅដល់ខ្មែរគ្រប់រូបទាំងអស់ ទាំងប្រជាពលរដ្ឋគ្រប់និន្នាការទាំងអស់»៕
Tag:
ឯកឧត្តម កឹម សុខា
© រក្សាសិទ្ធិដោយ thmeythmey.com
