ជាតិ
នយោបាយជាតិ
លោកស្រី មូរ សុខហួ ជាប់ថែទាំស្វាមីដែលសម្រាកព្យាបាលជំងឺមហារីកក្រពះនៅអាមេរិក លោកស្រី មូរ សុខហួ និងកូនស្រី២នាក់ នៅពេលមើលថែទាំស្វាមី។ រូបថត ហ្វេសប៊ុក Mu Sochua
× លោកស្រី មូរ សុខហួ មន្ត្រីជាន់ខ្ពស់គណបក្សសង្គ្រោះជាតិ និងជាតំណាងរាស្ត្រមណ្ឌលបាត់ដំបង បានផ្ញើសារសុំទោសពលរដ្ឋចំពោះអវត្តមានចុះសួរសុខទុក្ខនៅតាមមូលដ្ឋាន ដោយសារតែលោកស្រីមានធុរៈមើលថែស្វាមីដែលកំពុងសម្រាកព្យាបាលជំងឺមហារីកក្រពះនៅសហរដ្ឋអាមេរិក។
តាមរយៈគណនីហ្វេសប៊ុករបស់ខ្លួន (Mu Sochua) កាលពីថ្ងៃទី២៣ ខែកុម្ភៈ កន្លងមក លោកស្រី មូរ សុខហួ បានសរសេរថា៖ «ខ្ញុំសូមទោសចំពោះបងប្អូន ដោយមួយរយៈកន្លងទៅនេះ ខ្ញុំពុំបានចុះជួបសួរសុខទុក្ខបងប្អូននៅតាមមូលដ្ឋាន ដោយសារតែខ្ញុំ មាន ធុរ:ចាំបាច់ត្រូវតែមើលថែស្វាមីរបស់ខ្ញុំដែលកំពុង សម្រាកព្យាបាលជំងឺមហារីកក្រពះនៅសហរដ្ឋអាមេរិក»។
អ្នកនយោបាយស្ត្រីដ៏មានល្បីល្បាញរូបនេះ បានអះអាងថា លោកស្រីនឹងវិលមកកាន់ស្រុកខ្មែរវិញនាពេលខាងមុខដើម្បីបន្តបម្រើប្រទេសជាតិ។ ឆ្លើយតបនឹងសារលើកទឹកចិត្តជាច្រើននោះ លោកស្រី មូរ សុខហួ បានសរសេរថា៖ «សូមអរគុណយ៉ាងជ្រាលជ្រៅនូវសន្តានចិត្តរបស់បងប្អូនដែលបានជូនពរស្វាមីរបស់ខ្ញុំ ទឹកចិត្តរបស់គាត់នៅតែរឹងមាំជានិច្ច ពីព្រោះគាត់ចង់វិលត្រឡប់ទៅស្រុកខ្មែរវិញណាស់ នៅជីវិតចុងក្រោយរបស់គាត់ ដោយសារតែគាត់ស្រឡាញ់ និងចូលចិត្តស្រុកខ្មែរ យើងណាស់»។
លោកស្រី មូរ សុខហួរ បានរៀបការជាមួយលោក Scott Leiper ជនជាតិអាមេរិក កាលពីឆ្នាំ១៩៨៤ ខណៈពួកគាត់ធ្វើការជាមួយគ្នានៅជំរុំជនភៀសខ្លួននៅជាយដែនខ្មែរ-ថៃ។ គូស្វាមី-ភរិយានេះ មានកូនស្រីបីនាក់ ដែលមានឈ្មោះ Thida Leiper, Devi Leiper និង Malika Leiper៕
© រក្សាសិទ្ធិដោយ thmeythmey.com