ជាតិ
លោក ទៀ បាញ់៖ វិមានឈ្នះ-ឈ្នះ តំណាងថាគ្មានសម័យកាលណាមានសន្តិភាពជាងសម័យនេះឡើយ
×![]()
ដោយ: ម៉ៅ សុផា
រដ្ឋមន្ត្រីក្រសួងការពារជាតិ លោក ទៀ បាញ់ បានលើកពីគុណសម្បត្តិគណបក្សប្រជាជនកម្ពុជារបស់ខ្លួនថា ជាអ្នកបញ្ចប់សង្គ្រាមស៊ីវិលនិងនាំមកនូវសន្តិភាពយ៉ាងពេញលេញ ដល់កម្ពុជា។ លោកថ្លែងបែបនេះនាពិធីបើកការដ្ឋានសាងសង់ «វិមានអនុស្សាវរីយ៍នយោបាយឈ្នះ-ឈ្នះ និងបញ្ចប់សង្គ្រាមស៊ីវិលនៅកម្ពុជា» កាលពីព្រឹកថ្ងៃទី២៥ ខែកុម្ភៈ។
លោក ទៀ បាញ់ រដ្ឋមន្ត្រីក្រសួងការពារជាតិ បានអះអាងថា សម័យកាលមុនៗ ពុំធ្លាប់មានសន្តិភាពបរិបូរ ដូចសម័យបច្ចុប្បន្ន ដែលដឹកនាំដោយគណបក្សប្រជាជនកម្ពុជា នោះទេ។ លោកបន្ថែមទៀតថា លទ្ធផលនេះ គឺប្រសូតចេញពីការបូជាសាច់ស្រស់ និងឈាមស្រស់ របស់ថ្នាក់ដឹកនាំបក្សកាន់អំណាច ដើម្បីរំលត់សង្គ្រាម ហើយប្តូរយកសន្តិភាព។
ការថ្លែងរបស់លោក ទៀ បាញ់ ខាងលើ ធ្វើឡើងក្នុងពិធីបើកការដ្ឋានសាងសង់ «វិមានអនុស្សាវរីយ៍នយោបាយឈ្នះ-ឈ្នះ និងបញ្ចប់សង្គ្រាមស៊ីវិលនៅកម្ពុជា» ដែលប្រព្រឹត្តទៅនៅថ្ងៃទី២៥ ខែកុម្ភៈនេះ។ វិមាននេះ ស្ថិតក្នុងតំបន់អភិវឌ្ឍន៍របស់លោក លី យ៉ុងផាត់ នៅសង្កាត់បាក់ខែង ខណ្ឌជ្រោយចង្វារ រាជធានីភ្នំពេញ។
លោកបញ្ជាក់បែបនេះថា៖«បើគ្មានការប្រឹងប្រែងនិងការអនុវត្តជាក់ស្តែងក្នុងការបំពេញការងារនោះទេ យើងប្រហែលជាមិនអាចរក្សាបាននូវស្ថិរភាពនិងការអភិវឌ្ឍដូច្នេះទេ»។
ក្រៅពីលើកតម្កើង ពីការខិតខំរបស់គណបក្សខ្លួន រដ្ឋមន្ត្រីក្រសួងការពារជាតិរូបនេះ ថែមទាំងចំអកឲ្យបុគ្គលទាំងឡាយណា ដែលមិនទទួលស្គាល់ពីស្នាដៃរបស់បក្សកាន់អំណាច ខណៈពួកគេកំពុងតែរស់នៅប្រកបដោយសុខសន្តិភាព និងការអភិវឌ្ឃស្ទើរគ្រប់វិស័យ។ លើសពីនេះទៅទៀត លោកក៏បានសម្តែងការហួសចិត្តបន្តិចផងដែរ ចំពោះអ្នកដែលមានទំនោរទៅរកនិន្នាការប្រឆាំង មិនត្រឹមតែមិនឲ្យតម្លៃពីការលះបង់កម្លាំកាយចិត្តរបស់បក្សប្រជាជនកម្ពុជា ក្នុងបុព្វហេតុជាតិប៉ុណ្ណោះទេ តែថែមទាំងពោលមួលបង្កាច់ថែមទៀត។
ក្រៅពីលើកតម្កើង ពីការខិតខំរបស់គណបក្សខ្លួន រដ្ឋមន្ត្រីក្រសួងការពារជាតិរូបនេះ ថែមទាំងចំអកឲ្យបុគ្គលទាំងឡាយណា ដែលមិនទទួលស្គាល់ពីស្នាដៃរបស់បក្សកាន់អំណាច ខណៈពួកគេកំពុងតែរស់នៅប្រកបដោយសុខសន្តិភាព និងការអភិវឌ្ឃស្ទើរគ្រប់វិស័យ។ លើសពីនេះទៅទៀត លោកក៏បានសម្តែងការហួសចិត្តបន្តិចផងដែរ ចំពោះអ្នកដែលមានទំនោរទៅរកនិន្នាការប្រឆាំង មិនត្រឹមតែមិនឲ្យតម្លៃពីការលះបង់កម្លាំកាយចិត្តរបស់បក្សប្រជាជនកម្ពុជា ក្នុងបុព្វហេតុជាតិប៉ុណ្ណោះទេ តែថែមទាំងពោលមួលបង្កាច់ថែមទៀត។
សូមបញ្ជាក់ថា រដ្ឋាភិបាល នឹងចាប់ផ្តើមសាងសង់វិមានអនុស្សាវរីយ៍នយោបាយឈ្នះ-ឈ្នះ ក្រោយពីបញ្ជាប់ពិធីបើកឲ្យសាងសង់ នៅព្រឹកនេះ។ ការសាងសង់វិមាននេះ គឺដើម្បី រម្លឹកដល់គុណូបការៈរបស់បុព្វបុរសខ្មែរគ្រប់សម័យកាល ដែលបានលះបង់ជីវិត ក្នុងបុព្វហេតុជាតិមាតុភូមិ។ ម្យ៉ាងទៀត វិមាននេះ ក៏ជានិមិត្តរូបនៃសុខសន្តិភាព ដែលកម្ពុជាទទួល ក្រោយពីបញ្ចប់សង្គ្រាមស៊ីវិលដ៏រ៉ាំរ៉ៃ ជាច្រើនទសវត្សរ៍ កន្លងមក។ ជាងនេះទៀត វិមាននេះ នឹងក្លាយជាកេរមរតក សម្រាប់កូនចៅជំនាន់ក្រោយផងដែរ៕
Tag:
ទៀ បាញ់
© រក្សាសិទ្ធិដោយ thmeythmey.com
