ពីនេះ ពីនោះ
ទម្លាប់ល្អទាំង ៤ នៅពេលព្រឹក ដើម្បីជោគជ័យក្នុងជីវិត
×
ទម្លាប់នៅពេលព្រឹករបស់អ្នក គឺជាអ្នកកំណត់ថាតើ ថ្ងៃនេះ ការងារ និងសុខភាពរបស់អ្នក នឹងទៅជាយ៉ាងណា។
១. ឆាប់ក្រោកពីគេង
ឆ្លងតាមរយៈការសិក្សា បានឲ្យដឹងថា អ្នកដែលឆាប់ភ្ញាក់ពីគេង មានខួរក្បាលល្អ ភ្លឺស្វាង និងរហ័សរហួន ជាងអ្នកគេងស្ពឹក មិនងាយក្រោក។ មនុស្សជោគជ័យក្នុងពិភពលោក ភាគច្រើន តែងតែមានទម្លាប់បែបនេះ គឺឆាប់ចូលគេង និងឆាប់ក្រោកពីគេង ដើម្បីចាប់ផ្តើមការងាររបស់ខ្លួន។ ការឆាប់ភ្ញាក់ពីគេង នឹងធ្វើឲ្យអារម្មណ៍ និងរាងកាយរបស់អ្នក ស្វាហាប់ និងស្រស់ថ្លា។
២. ដើរចេញក្រៅ
ការដើរចេញពីក្រៅផ្ទះ ក៏ជួយឲ្យជីវិតអ្នកជោគជ័យដែរ។ មិនថាអ្នកដើរហាត់ប្រាណ រត់លេង ហែលទឹក ឬអ្វីផ្សេងទៀតនោះទេ គឺឲ្យតែបានចេញទៅក្រៅ។ ការចេញក្រៅនេះ អាចធ្វើឲ្យអ្នកស្រស់ថ្លា ក្រោយពេលទទួលបរិយាសបរិសុទ្ធ ពន្លឺថ្ងៃ និងធម្មជាតិស្រស់បំព្រង។ ជាមួយគ្នានេះផងដែរ ការហាត់ប្រាណនៅក្នុងផ្ទះ មិនល្អ និងមិនសូវជោគជ័យ ដូចការហាត់ប្រាណ នៅខាងក្រៅនោះទេ។
៣. ពិភពលោកដើរដល់ណាហើយ?
យើងនិយាយនេះ គឺសំដៅទៅលើ ការអាន និងការស្តាប់។ ការអានទស្សនាវដ្តី កាសែត និងព័ត៌មានផ្សេងៗ ពិតជាជួយអ្នក ឲ្យដឹងពីសង្គម ការងារ និងមុខជំនួញរបស់អ្នក។ ក្រៅពីនេះ អ្នកអាចស្តាប់វិទ្យុ ឬមើលទូរទស្សន៍ក៏បាន។
៤. បង្កើតតារាងការងារដែលត្រូវធ្វើ
អ្វីក៏ដោយ ឲ្យតែមានគម្រោងច្បាស់លាស់ វានឹងជោគជ័យ។ ក្នុងជីវិតរស់នៅប្រចាំថ្ងៃ ក៏ដូចគ្នាដែរ គឺថា អ្នកត្រូវចេះរៀបចំគម្រោង និងពេលវេលា ឲ្យបានត្រឹមត្រូវ និងសមស្រប រួចខិតខំអនុវត្តវាឲ្យបានជោគជ័យ។ របាយការណ៍ ឬគម្រោងនេះ នឹងជួយអ្នកឲ្យដឹងរាល់ការងារ គ្រប់គ្រងការងារ និងមិនភ្លេចអំពីអ្វី ដែលអ្នកត្រូវធ្វើឡើយ។ មិនថាទៅផ្សារក្តី អ្នកគួរតែកត់ត្រា នូវអ្វីដែលអ្នកត្រូវទិញ ដើម្បីចំណេញពេលវេលា និងប្រាក់កាស៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com