ពីនេះ ពីនោះ
តើអ្វីដែលអ្នកត្រូវដឹងពីស្ថានីយសន្លុងប្រាសាទបាកាណកំពង់ស្វាយ?
× ភ្នំពេញ៖ ប្រាសាទបាកាណគឺជាប្រាសាទ ដែលមានបរិវេណធំជាងគេបំផុតរបស់អាណាចក្រខ្មែរក្នុងសម័យអង្គរ។ ប្រាសាទនេះ លាតសន្ធឹងលើផ្ទៃដីប្រហែល២២,៥០គីឡូម៉ែតការ៉េ ។
នៅក្នុងឯកសារស្រាវជ្រាវមួយចងក្រងដោយអ្នកបុរាណវិទ្យា និងជាលោកសាស្ត្រាចារ្យផ្នែកបុរាណវិទ្យាលោក ធុយ ចាន់ធួន មានចំណងជើងថា«ដែក និងថ្ម ខ្មែរបុរាណ» ស្ថានីយនេះស្ថិតនៅភូមិតាសែង ឃុំរណសិរ្ស ស្រុកសង្គមថ្មី ខេត្តព្រះវិហារ មានទីតាំងតាមGPSmap60csx, Datum-WGS84, UTMZone48NP 473257, 1482567។
នៅពេលដែលគេធ្វើដំណើរពីភ្នំពេញតាមផ្លូវជាតិលេខ៦២ ដល់ភូមិស្វាយប៉ាត នៅខាងឆ្វេងដៃគេនឹងឃើញមានផ្លូវឆ្ពោះទៅស្រុកសង្គមថ្មី ពេលទៅដល់ស្រុសង្គមថ្មី គេត្រូវបន្តដំណើរទៅឃុំរណសិរ្ស ដែលមានចម្ងាយផ្លូវប្រហែល៣០គម គេនឹងឃើញស្លាកសញ្ញាបង្ហាញពីទីតាំងប្រាសាទ។
ពេលទៅដល់ ទីតាំងស្ថានីយនេះ គេនឹងឃើញមានទួលអាចម៍ដែកនិងថ្មរ៉ែដែកដុំតូចៗ ជាច្រើននៅរាយប៉ាយពេញបរិវេណខាងក្រៅ និងខាងក្នុងប្រាសាទ។ ប្រាសាទបាកាណ គឺជាប្រាសាទមួយដែលមានលក្ខណៈស្រដៀង ទៅនិងប្រាសាទអង្គរវត្តដែរ។ ព្រោះប្រាសាទនេះ មានប្រាសាទតូចៗជាច្រើន និងមានបារាយណ៍ធំៗចំនួនពីរ គឺបឹងបារាយណ៍ និងបឹងក្រោមហើយបឹងនេះទទួលទឹកពីព្រះស្ទឹង និងមានកស្សិណព័ទ្ធជុំវិញ។
ស្ថានីយសន្លុងប្រាសាទបាកាណកំពង់ស្វាយនេះ ត្រូវបានអ្នកស្រាវជ្រាវ វាស់វែងផ្ទៃប្រាសាទទាំងមូលព្រមទាំងបឹងបារាយណ៍និងបឹងក្រោមរហូតដល់ប្រាសាទដំរី ឃើញថាមានទំហំជាង៣៦គីឡូម៉ែតការេ។ ថែមពីនោះទៀតអ្នកស្រាវជ្រាវ បានវាស់វែង និងគូរប្លង់រួចហើយដោយគណនាបរិមាណអាចម៍ដែកសរុបស្មើ១០៨១១២ម៉ែត្រគូប ក្នុងក្រឡាផ្ទៃ៤១៤២២ម៉ែត្រការ៉េ៕
(ខាងសារព័ត៌ថ្មីៗសូមអភ័យទោសដែលមិនមានរូបភាពពិតទាក់ទងស្ថានីយនេះ)
ដកស្រង់ និងផ្ដល់សិទ្ធិដោយ៖ ( ដែក និងថ្ម ខ្មែរបុរាណ, សាស្ដ្រាចារ្យ ធុយ ចាន់ធួន)
Tag:
ស្ថានីយ
ប្រាសាទបាកាណ
កំពង់ស្វាយ
© រក្សាសិទ្ធិដោយ thmeythmey.com