តួកគីសុំលុយពីអឺរ៉ុប៣.៣ពាន់លានដុល្លាទៀត ដើម្បីដោះស្រាយបញ្ហាជនភៀសខ្លួន

អន្តរជាតិ

តួកគីសុំលុយពីអឺរ៉ុប៣.៣ពាន់លានដុល្លាទៀត ដើម្បីដោះស្រាយបញ្ហាជនភៀសខ្លួន

09, Mar 2016 , 8:39 am

រូបភាព

ដោយ: តន ចាន់រិទ្ធារ៉ា

តួកគីបានស្នើសុំលុយបន្ថែមពីអឺរ៉ុបចំនួនដល់ទៅ៣.៣ពាន់លានដុល្លា ដើម្បីដោះស្រាយលំហូរជនភៀសខ្លួន ដែលនៅតែបន្តហូរចូលតួកគីតាមផ្លូវសមុទ្រអេជែន។ សំណើនេះលេចឡើងក្នុងជំនួបរវាងក្រុមមេដឹកនាំប្រទេសអឺរ៉ុប និងនាយករដ្ឋមន្ត្រីតួកគីលោក Ahmet Davutoglu នៅទីក្រុងព្រុចស៊ែល។

ក្រុមមេដឹកនាំអឺរ៉ុបនិងមេដឹកនាំតួកគីបានជួបប្រជុំគ្នាកាលពីថ្ងៃទី៧ ខែមីនា ដើម្បីរកវិធីដោះស្រាយលំហូរជនភៀសខ្លួន ដែលនៅតែជាបញ្ហាធ្ងន់ធ្ងរដដែល។ ក្នុងជំនួបនេះ តួកគីបានស្នើសុំលុយពីអឺរ៉ុបចំនួន៣.៣ពាន់លានដុល្លារ សម្រាប់ត្រួតពិនិត្យលំហូរជនភៀសខ្លួន ដែលធ្វើដំណើរឆ្លងកាត់សមុទ្រអេជែន។

ប្រធានសភាអឺរ៉ុបលោក Martin Schulz បានបញ្ជាក់ពីសំណើសុំរបស់តួកគីក្នុងជំនួបរវាងមេដឹកនាំអឺរ៉ុបនិងនាយករដ្ឋមន្ត្រីតួកគី អាមេដ ដាវូទូគ្លូ (Ahmet Davutoglu) នៅឯទីក្រុងព្រុចស៊ែល។ បើតាម Al Jazeera តួកគីនឹងទទួល ទឹកប្រាក់ ៣.៣ពាន់លានដុល្លានេះ រហូតដល់ឆ្នាំ២០១៨ ប៉ុន្តែចំនួននេះត្រូវបានស្នើបង្កើនទ្វេដង។

នៅក្រោមពង្រាងសំណើថ្មីនេះ សហភាពអឺរ៉ុបនិងតួកគី នឹងសហការគ្នាទប់ស្កាត់លំហូរជនភៀសខ្លួនទៅកោះរបស់ក្រិក ហើយចាប់ផ្ដើមផ្លាស់ប្ដូរការតាំងលំនៅថ្មីរបស់ជនភៀសខ្លួនស៊ីរីពីតួកគីទៅកាន់ប្រទេសអឺរ៉ុប។ ជាមួយគ្នានេះ ជាថ្នូរនឹងការយល់ព្រមរបស់តួកគីក្នុងទទួលជនភៀសខ្លួនពីក្រិក អឺរ៉ុបនឹងអនុញ្ញាតឲ្យជនជាតិតួកគីធ្វើដំណើរទៅតំបន់ Schengen ក្នុងអឺរ៉ុប ដោយមិនចាំបាច់ប្រើប្រាស់ទិដ្ឋាការនៅចុងខែមិថុនាខាងមុខ។

លើសពីនេះ តួកគីក៏ទំនងប្រើបញ្ហាជនភៀសខ្លួននេះ ដើម្បីធានានូវសមាជិកភាពអឺរ៉ុបរបស់ខ្លួនផងដែរ។ និយាយមុនកិច្ចប្រជុំកំពូលជាមួយមេដឹកនាំអឺរ៉ុប នាយករដ្ឋមន្ត្រីតួកគី Ahmet Davutoglu និយាយថា តួកគីត្រៀមខ្លួនរូចរាល់ក្នុងការធ្វើការជាមួយអឺរ៉ុប ហើយតួកគីក៏ត្រៀមខ្លួនរួចរាល់សម្រាប់ចូលជាសមាជិកសហភាពអឺរ៉ុបផងដែរ។

នេះមិនមែនជាលើកទីមួយទេដែលក្រុមមេដឹកនាំប្រទេសអឺរ៉ុបសម្រេចផ្ដល់លុយដល់តួកគីសម្រាប់ដោះស្រាយវិបត្តិជនភៀសខ្លួន។ នៅខែតុលា ឆ្នាំ២០១៥ មេដឹកនាំអឺរ៉ុបបានជួបជាមួយនាយករដ្ឋមន្ត្រីតួកគីលោក អាមេដ ដាវូទូគ្លូ នៅទីក្រុងព្រុចស៊ែល ដើម្បីពិភាក្សាបញ្ចប់កិច្ចព្រមព្រៀងមួយស្ដីបញ្ហាជនភៀសខ្លួនស៊ីរីដែលកំពុងតែស្ថិតនៅក្នុងប្រទេសតួកគី។ តាមរយៈកិច្ចព្រមព្រៀងនេះ អឺរ៉ុបបានផ្ដល់ប្រាក់៣ពាន់លានអឺរ៉ូម្ដងរួចទៅហើយដល់តួកគីសម្រាប់ការទប់ស្កាត់លំហូរជនភៀសខ្លួនពីតួកគីទៅកាន់អឺរ៉ុបក៏ដូចជាការលើកកម្ពស់ស្ថានភាពរស់នៅរបស់ជនភៀសខ្លួនស៊ីរី។

គួររម្លឹកផងដែរថា ជនភៀសខ្លួនរាប់លាននាក់បានឆ្លងកាត់ទៅកាន់តំបន់អឺរ៉ុបតាមរយៈប្រទេសតួកគីដែលបានក្លាយជាចំណុចឆ្លងកាត់ដ៏សំខាន់របស់ជនភៀសខ្លួនមកពីមជ្ឈិមបូព៌ាដែលកំពុងតែហែកហួរដោយភ្លើងសង្គ្រាម។ ឯតួកគីខ្លួនឯងក៏បានក្លាយជាជំរំបណ្ដោះអាសន្នរបស់ជនភៀសខ្លួនប្រមាណពីរលាននាក់ផងដែរ។ ចាប់តាំងពីដើមឆ្នាំ២០១៥ ជនភៀសខ្លួនច្រើនជាងមួយលាននាក់មានវាសនាបានទៅដល់អឺរ៉ុប ខណៈមនុស្សជាង៤ពាន់នាក់បានបាត់បង់ជីវិតក្នុងការឆ្លងកាត់សមុទ្រម៉េឌីទែរ៉ានេ៕