លើសពីហ្វេន! ភរិយារបស់កីឡាករ ទីនី, សុគម្ភៈ និងបូរ៉ាវី ប្រាប់បទពិសោធន៍

កីឡាជាតិ

ជាតិ

បទយកការណ៍ / បទសម្ភាសន៍

លើសពីហ្វេន! ភរិយារបស់កីឡាករ ទីនី, សុគម្ភៈ និងបូរ៉ាវី ប្រាប់បទពិសោធន៍

09, Mar 2016 , 3:39 pm

រូបភាព

ដោយ: អុឹង ចំរើន (Ung Chamroeun)

លើសពីហ្វេនបានអត់? នេះជាចំណងជើងបទចម្រៀងរបស់ផលិតកម្មសាន់ដេ ដែលបកស្រាយដោយកញ្ញា ខេមរៈ ស្រីពៅ និងមានការចូលរួមសម្តែងពីសំណាក់កីឡាករបាល់ទាត់ កែវ សុខផេង នៃក្លិបភ្នំពេញក្រោន។ តើត្រឹមជាអ្នកគាំទ្រ និងលើសពីអ្នកគាំទ្រ មានការខុសគ្នាយ៉ាងណាខ្លះ? តាមរយៈសារព័ត៌មានថ្មីៗ អ្នកស្រី ហុក សុកញ្ញា អ្នកស្រី អឿ រ៉ាវី និងអ្នកស្រី ពេជ្រ សង្វា បានរៀបរាប់ពីបទពិសោធន៍ និងតួនាទី របស់ខ្លួនក្នុងនាមភរិយារបស់កីឡាករបាល់ទាត់។

មិនមានបានឲ្យលេចធ្លោដូចគេ តែសប្បាយចិត្ត
៨ឆ្នាំហើយដែលអ្នកស្រី ហុក សុកញ្ញា បានរៀបការជាមួយខ្សែការពារ ទៀង ទីនី បច្ចុប្បន្នលេងឲ្យក្លិបខេមបូឌានថាយហ្គឺរ។ កូនស្រីដ៏ស្រស់ស្អាតពីនាក់គឺជាកំណប់ទ្រព្យដ៏ប្រសើររបស់ពួកគាត់។ អ្នកស្រី សុកញ្ញា ដែលបម្រើការងារឲ្យក្រុមហ៊ុនឯកជនមួយផងដែរនោះ បានបញ្ជាក់ថា ពួកគាត់មិនមានសល់អ្វីជាដុំកំភួនឡើយ ប៉ុន្តែក៏មិនខ្វះខាតទាំងស្រុងនោះដែរ ពោលគឺពួកគាត់អាចរស់នៅដោយសប្បាយចិត្ត និងអាចរៀបចំផែនការសម្រាប់អនាគតកូន។

ភរិយារបស់កីឡាករ គួច សុគម្ភៈ នៃក្លិបណាហ្គាវើល គឺអ្នកស្រី អឿ រ៉ាវី និងភរិយារបស់កីឡាករ ឃួន ឡាបូរ៉ាវី នៃក្លិបបឹងកេតអង្គរ គឺអ្នកស្រី ពេជ្រ សង្វា ក៏មានសុភមង្គលក្នុងគ្រួសារក្រោយអាពាហ៍ពិពាហ៍ជាង៤ឆ្នាំកន្លងមកនេះ ផងដែរ។ គូស្នេហ៍ទាំងពីរគូរនេះ សុទ្ធតែមានកូនប្រុសម្នាក់រៀងៗខ្លួន។

សូមស្តាប់សំឡេងអ្នកស្រី ហុក សុកញ្ញា ភរិយា កីឡាករទៀងទីនី៖

ប្រចណ្ឌ? ពីមុនធ្លាប់ ប៉ុន្តែយល់ពីការងាររបស់ប្តី
សម្រាប់កីឡាករដែលរាងសង្ហារ និងពោរពេញទៅដោយសមត្ថភាពតើអ្នកណាមិនស្រឡាញ់? សម្រាប់អ្នកស្រី សុកញ្ញា ដែលកើតចេញពីគ្រួសារអ្នកកីឡាដែលមានព្រឹទ្ធចារ្យយុទ្ធគុនចម្រុះ ហុក ឈាងគីម ជាឪពុក ហើយបងប្រុស ហុក សុចិត្រា និងហុក សុទិត្យា រួមទាំងប្អូនប្រុស ហុក សុជីវ័ន្ត ជាអតីតកីឡាករបាល់ទាត់ឆ្នើមផងដែរនោះ អារម្មណ៍ប្រចណ្ឌហាក់ដូចជាគ្មានឡើយ ខណៈអ្នកស្រី រ៉ាវី និងសង្វា ទទួលស្គាល់ថា ពីដំបូង ពិតជាមានអារម្មណ៍បែបនេះ ប៉ុន្តែនៅពេលស្គាល់ពីការងារ និងដឹងពីអត្តចរឹកប្តីច្បាស់ ពួកគាត់មិនដែលយកភ្លើងប្រចណ្ឌដាក់ក្នុងចិត្តនោះឡើយ។

សូមស្តាប់ការអះអាងថា របស់អ្នកស្រី ពេជ្រ សង្វា ភរិយារបស់កីឡាករ ឃួន ឡាបូរ៉ាវី

គោរពពេលវេលាស្វាមីជាងពេលខ្លួនឯង
ពិតជាមានអារម្មណ៍ឯកោណាស់សម្រាប់ភរិយាកីឡាករបាល់ទាត់ ជាពិសេសកីឡាករដែលតែងតែជាប់ក្នុងក្រុមជម្រើសជាតិ ដូចជាកីឡាករ ទៀង ទីនី គួច សុគម្ភៈ និង ឃួន ឡាបូរ៉ាវី។ អ្នកស្រី ហុក សុកញ្ញា ធ្លាប់ឆ្លងពិធីបុណ្យចូលឆ្នាំ ភ្ជំបិណ្ឌ និងខួបកំណើត តែជាមួយកូនជាញឹកញាប់ ខណៈស្វាមីត្រូវបំពេញបេសកកម្មនៅក្រៅប្រទេស ប៉ុន្តែវាជារឿងដែលមិនអាចប្រកែកបាន ហើយត្រូវតែសប្បាយចិត្តចំពោះបេសកកម្មបម្រើជាតិរបស់ស្វាមី។

មិនខុសគ្នានោះឡើយ អ្នកស្រី រ៉ាវី ត្រូវតែគោរពកាលវិភាគរបស់ សុគម្ភៈ រីឯអ្នកស្រី សង្វា ត្រូវតែធ្វើតាមកម្មវិធីរបស់បូរ៉ាវី។
សូមស្តាប់ការពន្យល់របស់អ្នកទាំងបី (សុកញ្ញា, រ៉ាវី និងសង្វា)

អ្នកគាំទ្រពិសេសរបស់ស្វាមី និងគាំទ្រក្លិបទាំងមូល
រ៉ាវី មិនសូវខកខានឡើយក្នុងការបង្ហាញវត្តមាននាអំឡុងនៃការប្រកួតរបស់ សុគម្ភៈ ហើយភាគច្រើនទៅជាមួយភរិយាកីឡាករដទៃទៀត ជាពិសេសភរិយារបស់កីឡាករ ឃឹម បូរី នៃក្លិបណាហ្គាវើល មិត្តស្រីរបស់កីឡាករ ហុង ផេង នៃក្លិបបឹងកេតអង្គរ និងភរិយារបស់ទៀង ទីនី គឺ សុកញ្ញា ផងដែរ។

រ៉ាវី បានអះអាងថា បាល់ទាត់បានក្លាយជាចំណង់ចំណូលរបស់ខ្លួនទៅហើយ ដូច្នេះពេលខ្លះ ក៏ចំណាយពេលទៅមើលការប្រកួតផងដែរ បើទោះបីជាគ្មានស្វាមីក៏ដោយ។ បញ្ហាត្រង់ថា អារម្មណ៍មើលខុសគ្នា ជាពិសេសកន្លងមក ស្វាមីរបស់ រ៉ាវី និងសុកញ្ញា ស្ថិតនៅក្នុងក្លិបណាហ្គាវើលតែមួយ ដូច្នេះវាគ្មានបញ្ហាអ្វីឡើយ ប៉ុន្តែនៅពេលពួកគេលេងនៅក្លិបផ្សេងគ្នា ភរិយារបស់ពួកគេក៏ហាក់ដូចជាមិនសូវមានពេលស្និទ្ធស្នាលដូចមុននោះឡើយ ។

ទៀង ទីនី និង ឃួន ឡាបូរ៉ាវី ក៏ចង់ឃើញវត្តមានរបស់ភរិយាដូចជា គួច សុគម្ភៈ ផងដែរ នៅពេលដែលពួកគេប្រកួត ពីព្រោះនេះជាការលើកទឹកចិត្តបន្ថែម។ ភរិយារបស់កីឡាករបាល់ទាត់បានទទួលស្គាល់ថា ពេលខ្លះពួកគាត់មានអារម្មណ៍ខឹងនៅពេលមានការសម្រេចអ្វីមួយនៅក្នុង ការប្រកួត ប៉ុន្តែវាជាអារម្មណ៍តែមួយឆាវប៉ុណ្ណោះ។

បងឈឺអត់? បងឈឺត្រង់ណាខ្លះ? ត្រៀមអ្វីខ្លះសម្រាប់ស្វាមីនៅមុនការប្រកួត?

នេះជាសំណួរដែលភរិយាកីឡាករបាល់ទាត់តែងតែសាកសួរស្វាមីនៅក្រោយ ការប្រកួត។ សុកញ្ញា តែងតែតាមដានស្វាមីជានិច្ចនៅពេលដែលគាត់ហាក់ដូចជាទ្រោមខ្លាំងនា អំឡុងនៃការប្រកួត បើទោះបីជាគ្រូពេទ្យប្រចាំក្លិបព្យាបាលហើយក៏ដោយ។ ការហូបចុក ការជួយម៉ាស្សាខ្លួន ដៃជើង ក៏ជាបន្ទុករបស់ភិរយាកីឡាករបាល់ទាត់ផងដែរ។
សូមស្តាប់បទពិសោធន៍របស់លោកស្រី ទីនី និងលោកស្រី សុគម្ភៈ

តើស្វាមីជាមនុស្សបែបណា?
ខ្សែការពារ ទៀង ទីនី ដែលលេងបាល់ទាត់អាជីពជាង១០ឆ្នាំកន្លងមកនេះ ប្រហែលជាទទួលពិន្ទុ១០លើ១០ពេញពីភរិយាមិនខាន។ សុកញ្ញា បានអះអាងថា រយៈពេលជាង៨ឆ្នាំកន្លងមកនេះ ក្រុមគ្រួសាររបស់ពួកគាត់មិនមានបញ្ហាអ្វីឡើយ ហើយស្ត្រីម្នាក់នេះ គឺជាមនុស្សដែលតែងតែលើកទឹកចិត្តស្វាមីជានិច្ច។

ផ្អែមមិនខុសគ្នាឡើយ រ៉ាវី បានអះអាង សុគម្ភៈ គឺជាបុរសដ៏ល្អបំផុតក្នុងជីវិតរបស់ខ្លួន។ «ខ្ញុំចំអិនម្ហូប...គាត់លាងចាន។ ខ្ញុំបោកខោអាវ គាត់ជាអ្នកហាល»។ នេះជាការលើកឡើងរបស់អ្នកស្រី រ៉ាវី ដោយបន្ថែមថា សុគម្ភៈ ជាមនុស្សដែលមិនចេះប្រកាន់ការងារ ហើយតែងតែជួយខ្លួនជានិច្ចនៅពេលទំនេរ។
ស្តាប់ការអះអាងរបស់ភរិយា គួច សុគម្ភៈ

រីឯសង្វា ពេញចិត្ត បូរ៉ាវី ស្តូក ត្រង់គាត់គឺជាមនុស្សដែលស្រឡាញ់ក្រុមគ្រួសារទាំងសងខាងស្មើៗគ្នា។ អ្វីដែលពិសេសនោះ ការអបអរដោយដាក់ដៃជាសញ្ញាបេះដូង ក្រោយការស៊ុតបញ្ចូលទីគឺជានិមិត្តរូបនៃសេចក្តីស្នេហារបស់បូរ៉ាវី ចំពោះម៉ាក់ «DoDo» ។
ស្តាប់ការអះអាងរបស់ភរិយា ឃួន ឡាបូរ៉ាវី

ស្នេហ៍គ្នាដំបូង
សុកញ្ញា គឺជាអតីតអ្នកគាំទ្រក្លិបភ្នំពេញអ៊ឹមផាយអឺរ (ភ្នំពេញក្រោនបច្ចុប្បន្ន) ដែលកាលណោះស្ថិតក្រោមការដឹកនាំបង្វឹករបស់លោក ហុក សុចិត្រា ដែលជាបងប្អូន ហើយ ទីនី គឺជាកីឡាករម្នាក់នៅទីនោះ។ ការលែបខាយរវាងអ្នកគាំទ្រម្នាក់ និងកីឡាករម្នាក់បានក្លាយជាសេចក្តីស្នេហាតែម្តង។
សុកញ្ញារៀបរាប់៖

ចំពោះរ៉ាវី និងសុគម្ភៈ វិញ ពួកគេស្គាល់គ្នាតាមរយៈបងជីដូនមួយរបស់ រ៉ាវី និងជាមិត្តភ័ក្ត្ររបស់សុគម្ភៈ ផងដែរ។ ងាកទៅស្នេហារវាង សង្វា និងបូរ៉ាវី វាជារឿងដែលកើតឡើងដោយចៃដន្យ។ ពួកគាត់បានទាក់ទងគ្នាតាមរយៈសារ SMS។
រ៉ាវីរំលឹកប្រវត្តិស្នេហ៍ជាមួយសុគម្ភៈ

សង្វាថាជាការស្គាល់គ្នាដោយចៃដន្យជាមួយបូរ៉ាវី