MALACCA-ម៉ាឡេស៊ី៖ Let Me Go គឺជាមធ្យោបាយដឹកភ្ញៀវទេសចរមួយប្រភេទដោយប្រើជើងធាក់ ដើម្បីផ្លាស់ទីទៅមុខ ស្រដៀងគ្នានឹង ស៊ីក្លូ របស់ខ្មែរដែរ។ សម្រស់របស់ Let Me Go បានទាក់ចិត្តភ្ញៀវទេសចរឲ្យថតរូបទុកជាអនុស្សាវរីយ៍ និងជិះកម្សាន្តជុំវិញរមណីយដ្ឋានប្រវត្តិសាស្ត្រមួយចំនួនដូចជា China Town ព្រះវិហារបុរាណ និងនៅសារមន្ទីរ PERBADANA ជាដើម នៅក្នុងរដ្ឋ MALACCA របស់ម៉ាឡេស៊ី។
Let Me Go ត្រូវបានផលិតឡើងដោយមានកង់មួយ ផ្សាភ្ជាប់ជាមួយនឹងរ៉ឺម៉កមួយផ្សេងទៀតនៅខាងឆ្វេងដើម្បីឲ្យភ្ញៀវអង្គុយ។ តួទាំងមូលរបស់ Let Me Go ឬអាចហៅបានថាជារ៉ឺម៉កកង់ ត្រូវបានរចនាយ៉ាងស្រស់ស្អាតដោយប្រើរូបតុក្កតាជាច្រើនប្រភេទ និងផ្កាចម្រុះពណ៌។
បើតាមលោក EDDY វ័យ ៣៥ឆ្នាំ ជាអ្នករត់ Let Me Go ដឹកភ្ញៀវ អស់រយៈពេលជាងបីឆ្នាំមកហើយនោះ បានឲ្យដឹងថា ថ្លៃជិះក្នុងកង់មួយគឺ 6.25$ ស្មើនឹង (25 RM-ម៉ាឡេស៊ី) ជុំវិញរមណីយដ្ឋាន China Town ឬរមណីយដ្ឋានផ្សេងទៀត មួយជុំតូច ដែលមានរយៈពេល ៣០នាទី។ បើជិះមួយជុំធំ ដែលមានរយៈពេលជាង ៤០នាទី ភ្ញៀវត្រូវចំណាយប្រាក់ចំនួន 8.75$ ដែលស្មើនឹង (35 RM-ម៉ាឡេស៊ី)។ ក្នុងកង់មួយអាចផ្ទុកភ្ញៀវបានចំនួនពីរនាក់ ឬអាចថែមក្មេងតូចបានម្នាក់ទៀត ហើយភ្ញៀវអាចកម្សាន្តជាមួយចម្រៀងជាច្រើនបទ តាមរយៈឧបករណ៍ចាក់ចម្រៀង (Speaker) ដែលភ្ជាប់នឹងតួកង់ផ្នែកខាងក្រោម។
លោក EDDY អះអាងថា លោកអាចរកចំណូលបានចាប់ពី (1500-2000 RM) ដែលស្មើនឹង ៣៧៥ ទៅ ៥០០ ដុល្លារអាមេរិក ក្នុងមួយខែ។ EDDY ឲ្យដឹងទៀតថា ក្នុងតំបន់ទេសចរដែលលោកកំពុងរកស៊ីសព្វថ្ងៃនៅក្នុងរដ្ឋ ម៉េឡាកា នេះ មាន Let Me Go ចំនួនប្រមាណជាង ៣០០គ្រឿង ហើយអ្នករត់ Let Me Go ទាំងអស់ត្រូវបង់ពន្ធជូនរដ្ឋ ចំនួន (50 RM) ដែលស្មើនឹង ១២.៥ ដុល្លារអាមេរិកក្នុងមួយឆ្នាំ ដើម្បីសុំសិទ្ធប្រកបរបរមួយនេះ៕
សូមទស្សនារូបភាពដែលសារព័ត៌មានថ្មីៗបានផ្តិតយកពីរដ្ឋម៉ាឡាកាដូចតទៅ៖