កីឡាជាតិ
ជាតិ
យុទ្ធនាការប្រកួតជ្រើសរើសជើងឯករាជធានីកម្រិតសិស្សមធ្យមសិក្សា
× ការប្រកួតកីឡាសិស្សមធ្យមសិក្សាជ្រើសរើសជើងឯករាជធានីភ្នំពេញប្រចាំឆ្នាំសិក្សា ២០១៥-២០១៦ ននឹងប្រព្រឹត្តទៅរយៈពេល១០ថ្ងៃ ចាប់ពីថ្ងៃទី៧ ដល់ថ្ងៃទី១៦ ខែមិនា ដោយមានអនុវិទ្យាល័យ និងវិទ្យាល័យចូលរួមប្រកួតជាច្រើនទាំងនៅក្នុង និងក្រៅរាជធានីភ្នំពេញ និងមានវិញ្ញាសាចួលរួមប្រកួតចំនួន៤។
កីឡាករកីឡាការិនីមកពីអនុវិទ្យាល័យ និងវិទ្យាល័យដែលមានទីតាំងស្ថិតនៅក្នុង និងជាយរាជធានីភ្នំពេញជាច្រើន បាននិងកំពុងធ្វើការប្រកួតប្រជែងគ្នាដើម្បីដណ្តើមជើងឯកក្នុងកម្មវិធីប្រកួតកីឡាសិស្សមធ្យមសិក្សាជ្រើសរើសជើងឯករាជធានីភ្នំពេញប្រចាំឆ្នាំសិក្សា ២០១៥-២០១៦។ កីឡាករកីឡាការិនីទាំងនេះប្រកួតក្នុងវិញ្ញាសាចំនួន៤ ក្នុងនោះមាន កីឡាបាល់ទះ(យុវនារីកម្រិតអនុវិទ្យាល័យ និងវិទ្យាល័យ) បាល់បោះ(យុវនារី និងយុវជន) បាល់ទាត់ (យុវជនកម្រិតអនុវិទ្យាល័យ និងយុវនារី យុវជន កម្រិតវិទ្យាល័យ) និងប្រភេទកីឡាអត្តពលកម្ម (កម្រិតអនុវិទ្យាល័យ និងវិទ្យាល័យ)។
សម្រាប់ការប្រកួតបាល់ទះយុវនារី កម្រិតអនុវិទ្យាល័យ មានក្រុមចូលចំនួន៣ គឺអនុវិទ្យាល័យទួលសុវណ្ណរាម, សាលាសិលាមាស និងអន្តរទ្វីបអាមេរិកកាំង ខណៈបាល់ទះយុវនារី កម្រិតវិទ្យាល័យមានការថយចុះចំនួន២ក្រុមគឺមានតែ៣ក្រុមចូលរួមប្រកួតប៉ុណ្ណោះ រួមមាន វិទ្យាល័យច្បារអំពៅ, វិទ្យាល័យជាស៊ីមជ្រោយចង្វារ និងសាលាសិលាមាស។
ចំណែកបាល់បោះនារីកម្រិតអនុវិទ្យាល័យមាន៣ក្រុមចូលរួម គឺអនុវិទ្យាល័យ ហ៊ុន សែន ជន្លង់ម្លូ, សាលាសុវណ្ណភូមិ និងសាលាអន្តរទ្វីបអាមេរិកកាំង ចំណែកបាល់បោះយុវជនកម្រិតវិទ្យាល័យមាន១០ក្រុមចូលរួម(កើន៤ក្រុម) គឺ វិ.ហ៊ុន សែន ប៊ុនរ៉ានីផ្សារដើមថ្កូវ, វិ.វត្តកោះ, សាលសិលាមាស, អេសអូអេស, សាលាហ្សាម៉ាន់, សាលាអន្តរទី្វបអាមេរិកាំង, វិ.ច្បារអំពៅ, សាលាសុវណ្ណភូមិ, សាលាមេតូឌីស្ទ និងវិ.ព្រះស៊ីសុវត្ថិ ខណៈបាល់បោះនារីកម្រិតវិទ្យាល័យ មាន៣ក្រុមចូលរួមគឺសាលាហ្សាម៉ាន់, សាលាសុវណ្ណភូមិ និងសាលាអន្តរទ្វីបអាមេរិកកាំង។
ផ្នែកបាល់ទាត់យុវជនកម្រិតអនុវិទ្យាល័យមានក្រុមចូលរួមចំនួន៦ក្រុម គឺ អនុ.ចំរើនជាតិ, អនុ.ដង្កោ, សាលាជីវិតថ្មី, អនុ.ហ៊ុន សែន ព្រៃវែង និងអនុ.ត្រពាំងសាលា ចំណែកបាល់ទាត់នារីកម្រិតវិទ្យាល័យមានក្រុមចូលរួមប្រកួតចំនួន៤ គឺ វិ.ទួលប្រាសាទសែនសុខ, វិ.ជា ស៊ីម សាមគ្គី, វិ.ឥទ្ទ្រទេវី និងសាលាហ្សាម៉ាន់។
ចំណែកបាល់ទាត់យុវជនកម្រិតវិទ្យាល័យមាន១៦ក្រុមចូលរួម គឺ វិ.ព្រះស៊ីសុវត្ថិ, វិ.ហ៊ុន សែន ចាក់អង្រែ, វិ.ទួលប្រាសាទសែនសុខ, វិ.បឹងត្របែង, វិ.ជា ស៊ីម សាមគ្គី, វិ.ព្រែកកំពឹស, សាលាហ្សាម៉ាន់, វិ.ជា ស៊ីម បឹងកេងកង, វិ.សម្តេច ហ៊ុន សែន ភ្នំពេញថ្មី, វិ.ហ៊ុន សែន ជម្ពូវ័ន, វិ.បាក់ទូក, វិ.ជា ស៊ីម សន្ធរម៉ុក, វិ.ព្រះយុគន្ធរ, វិ.ហ៊ុន សែន ប៊ុន រ៉ានី ផ្សារដើមថ្កូវ, វិ.ឥន្ទ្រទេវី និងវិ.ច្បារអំពៅ។
ដោយឡែកវិញ្ញាសាអត្តពលកម្មកម្រិតអនុវិទ្យាល័យមានចំនួន២០ក្រុមចូលរួម(កើនចំនួន៥) ក្នុងនោះមាន អនុ.បាក់ខែង, អនុ.ត្រពាំងសាលា, អនុ.ដង្កោ, អនុ.វត្តនាគវ័ន, អនុ.អន្តរទ្វីប, អនុ.ហ៊ុន សែន ជន្លងម្លូ, អនុ.ព្រែករាំង, អនុ.ទួលស្លែង, អនុ.ចតុមុខ, អនុ.បឹងធំ, អនុ.ចំបង់មាស, អនុ.វត្តដំបូកខ្ពស់, អនុ.ពញាពន់, អនុ.កំបូល, អនុ.វត្តក្នុង, អនុ.ចំរើនផល, អនុ.ក្តីតាកុយ, អនុ.ព្រៃវែង, អនុ.សុធារស និងអនុ.ទឹកល្អក់។
ចំណែកកម្រិតវិទ្យាល័យមានក្រុមចូលរួមចំនួន១១ក្រុម (កើន១) ក្នុងនោះមាន វិទ្យាល័យ ជា ស៊ីម សន្ធរម៉ុក, វិ.បឹងត្របែក, វិ.ហ៊ុន សែន ប៊ុន រ៉ានី ផ្សារដើមថ្កូវ, វិ.ទួលទំពូង, វិ.ជា ស៊ីម បឹងកេងកង, វិ.ហ៊ុន សែន ជម្ពូវ័ន, សាលាអន្តរទ្វីប, សាលាហ្សាម៉ាន់, វិ.ហ៊ុន សែន ប៊ុន រ៉ានី វត្តភ្នំ, វិ.ព្រះយុគន្ធរ និងសាលា មេតូឌីស្ទកម្ពុជា។
គួរបញ្ជាក់ថា សម្រាប់លទ្ធផលនៃការប្រកួតលើវិញ្ញាសាអត្តពលកម្មកម្រិតអនុវិទ្យាល័យកាលពីព្រឹកថ្ងៃទី៩ ខែមិនា នៅពហុកីឡដ្ឋានជាតិ វិញ្ញាសាដើរចម្ងាយ៥គីឡូម៉ែត្រយុវនារីចំណាត់ថ្នាក់លេខ១ បានទៅលើកីឡាការិនី យឹម ប៊ុណ្ណារី មកពីអនុ.ដង្កោ ខណៈលេខ២បានទៅ រឿន វីណា មកពី អនុ.ហ៊ុន សែន ជន្លង់ម្លូ និងលេខ៣បានទៅ បូ ស្រីធា មកពីអនុ.បាក់ខែង។ វិញ្ញាសាដើរចម្ងាយ៨គីឡូម៉ែត្រយុវជន ចំណាត់ថ្នាក់លេខ១ បានទៅ នាង ដារ៉ូត មកពីអនុ.បាក់ខែង ខណៈលេខ២បានទៅ ប៊ុត ចំរើន មកពីអនុ.ត្រពាំងសាលា និងលេខ៣បានទៅ កុយ ច័ន្ទតារា មកពីអនុ.ដង្កោ។
វិញ្ញាសារត់ចម្ងាយ៣គីឡូម៉ែត្រនារី ចំណាត់ថ្នាក់លេខ១បានទៅ អាត ស្រីឡែន របស់អនុ.ហ៊ុន សែន ជន្លង់ម្លូ ខណៈលេខ២បានទៅ ប៊ូ ស៊ុនណារី មកពីអនុត្រពាំងសាលា និងលេខ៣បានទៅ សាន់ វួចលាង មកពីអនុ.ព្រែករាំង។ វិញ្ញាសារត់ចម្ងាយ៥គីឡូម៉ែត្រយុវជន ចំណាត់ថ្នាក់លេខ១បានទៅ ឃ្លាំង បេប៊ុណ្ណារ៉ា មកពីអនុ.ត្រពាំងសាលា ខណៈលេខ២បានទៅ ទន សុភា មកពីអនុ.បាក់ខែង និងលេខ៣បានទៅ សោម សារ៉េត មកពីអនុ.ដង្កោ។
វិញ្ញាសាលោតកម្ពស់ផ្នែកយុវនារី ចំណាត់ថ្នាក់លេខ១បានទៅ រឿង កែវមនោរា របស់អនុ.ដង្កោ ខណៈលេខ២ ងិន ច័ន្ទវត្តី មកពីអនុ.ចតុមុខ និងលេខ៣ ឌី ស្រីណឿន មកពីអនុ.បាក់ខែង។ វិញ្ញាសាលោតកម្ពស់ផ្នែកយុវជន លេខ១បានទៅ ចាន់ ដារ៉ា មកពីអនុ.បាក់ខែង ខណៈលេខ២ សេង ម៉េងហៀង មកពីអនុ.ហ៊ុន សែន ចំបក់មាស និងលេខ៣ អ៊ុំ រ៉ាវី មកពីអនុ.ហ៊ុន សែន ជន្លង់ម្លូ។
វិញ្ញាសារត់ចម្ងាយ១០០ម៉ែត្រយុវជនចំណាត់ថ្នាក់លេខ១បានទៅ ពេជ្រ ជីវ៉ា មកពីអនុ.ចតុមុខ ខណៈលេខ២ ជា សុខឃៀង មកពីអនុ.ព្រែករាំង និងលេខ៣ លី វ៉ាន់ហ្សាក់ មកពីអនុ.ហ៊ុន សែន ជន្លង់ម្លូ។ វិញ្ញាសា១០០ម៉ែត្រនារី ចំណាត់ថ្នាក់លេខ១បានទៅ ម៉ែន សីហា មកពីអនុ.ទៀន ខណៈលេខ២ ផុន សុផានី មកពីអនុ.ហ៊ុន សែន ជន្លង់ម្លូ និងលេខ៣ ចាន់ សុវណ្ណស្រីណុច មកពីអនុ.ដង្កោ។
វិញ្ញាសាលោតចម្ងាយយុវនារីចំណាត់ថ្នាក់លេខ១បានទៅ វណ្ណថន បញ្ញាពេជ្រដាលីស មកពីអនុ.បាក់ខែង ខណៈលេខ២ សេង សុជាតា មកពីអនុ.ដង្កោ និងលេខ៣ ចៅ ស្រីម៉ី មកពីអនុវិទ្យាល័យជន្លង់ម្លូ៕
© រក្សាសិទ្ធិដោយ thmeythmey.com