អន្តរជាតិ
នាវាមុជទឹកជប៉ុន១គ្រឿងទស្សនកិច្ចហ្វីលីពីន ខណៈនាវាចម្បាំងពីរគ្រឿងទស្សនកិច្ចនៅវៀតណាម
× ជម្លោះសមុទ្រចិនខាងត្បូង កំពុងតែរុញច្រានឲ្យមានការប្រឈមមុខគ្នាកាន់តែខ្លាំងឡើងៗ ជាពិសេសនោះគឺរវាងរដ្ឋាភិបាលក្រុងវ៉ាស៊ិនតោន និងរដ្ឋាភិបាលក្រុងប៉េកាំងលើប្រតិបត្តិការនានាក្នុងតំបន់ជម្លោះ ដែលកំពុងតែវិវត្តទៅរកយោធូបនីយកម្មនៅក្នុងតំបន់ ។ ស្របពេលនៃភាពតានតឹងនេះ រដ្ឋាភិបាលក្រុង តូក្យូ ក៏គ្រោងធ្វើទស្សនកិច្ចតាមរយៈនាវាមុជទឹក និងនាវាចម្បាំងរបស់ខ្លួនមកកាន់ហ្វីលីពីន និងវៀតណាមផងដែរ។
នាវាមុជទឹកជប៉ុនមួយគ្រឿង នឹងធ្វើទស្សនកិច្ចទៅកាន់ហ្វីលីពីនជាលើកដំបូងក្នុងរយៈពេល១៥ឆ្នាំ។ ហើយ វត្តមាននាវាមុជទឹកនេះ ក៏នឹងត្រូវអមជាមួយនឹងនាវាចម្បាំងពីរគ្រឿង ដែលនឹងត្រូវធ្វើទស្សកិច្ចនៅវៀតណាម ដែលទស្សនកិច្ចទាំងនេះ ធ្វើឡើងក្នុងគោលបំណងដើម្បីគាំទ្រហ្វីលីពីន និងវៀតណាម ក្នុងការប្រឆាំងនឹងមហិច្ឆតារបស់ចិនក្នុងតំបន់ជម្លោះសមុទ្រចិនខាងត្បូង។
នាវាមុជទឹកដែលត្រូវបានប្រើប្រាស់សម្រាប់ហ្វឹកហ្វឺន នឹងទៅដល់ហ្វីលីពីននៅខែមេសាខាងមុខនេះ ហើយ នាវាចម្បាំងទាំងពីរគ្រឿងផ្សេងទៀត ក៏នឹងទៅដល់វៀតណាមនៅពេលបន្តបន្ទាប់គ្នានោះផងដែរ។ នេះបើយោងតាមភ្នាក់ងារព័ត៌មាន Reuters និងភ្នាក់ងារព័ត៌មានជាតិជប៉ុន ដែលបានដកស្រង់ការអះអាងរបស់មន្ត្រីម្នាក់ដែលស្និទ្ធនឹងរដ្ឋាភិបាលជប៉ុនដែលសុំមិនបញ្ចេញដែលបានបន្ថែមថា នេះគឺជាការផ្ញើសារមួយទៅកាន់ប្រទេសក្នុងតំបន់។
អ្នកនាំពាក្យក្រសួងការពារជាតិជប៉ុន សុំមិនបកស្រាយចំពោះទស្សនកិច្ចនាវាមុជទឹកនោះទេ ក៏ប៉ុន្តែ អ្នកនាំពាក្យនោះ បានបញ្ជាក់ថា កងទ័ពជើងទឹករបស់ជប៉ុន នឹងធ្វើដំណើរទស្សនកិច្ចដូចធម្មតានៅចន្លោះខែ មីនា និងមេសានេះ។ នេះបើយោងតាមភ្នាក់ងារ Reuters ដែលបានដកស្រង់សម្តីអ្នកនាំពាក្យនោះដែរ ថា គម្រោងផ្សេងៗ កំពុងស្ថិតនៅក្នុងនីតិវិធីនៃការពិភាក្សាដូច្នេះ មិនអាចផ្តល់ព័ត៌មានលម្អិតបាននោះទេ។
វា អាចជារឿងថ្មីមួយដែលបែ្លក បើសិនជាជប៉ុន ពិតជាធ្វើទស្សនកិច្ចនាវាមុជទឹកមកកាន់ហ្វីលីពីន និងនាវាចម្បាំងទៅវៀតណាមនោះ។ តែបើក្រឡេកមើលឲ្យស៊ីជម្រៅនោះ គេឃើញថាវាមិន មែនរឿងដែលគួរឲ្យភ្ញាក់ផ្អើលប៉ុន្មាននោះទេ ដ្បិតជប៉ុន ថ្មីៗនេះ ក៏បានផ្តល់នាវាល្បាតដល់ហ្វីលីពីន និង វៀតណាមដើម្បីប្រតិបត្តិការការពារដែនសមុទ្រដែលគេមើលឃើញដើម្បីប្រឆាំងនឹងសកម្មភាពរបស់ ចិនក្នុងតំបន់ជម្លោះសមុទ្រចិនខាងត្បូងនោះ។
អ្វីគួរកត់សម្គាល់ គម្រោងនៃទស្សនកិច្ចតាមដែនសមុទ្ររបស់ជប៉ុន លេចឡើងស្របពេលដែលស្ថាន ភាពសមុទ្រចិនខាងត្បូងកំពុងតែមានភាពតានតឹងស្រាប់ ពោលគឺស្របពេលអាមេរិកដែលជាសម្ព័ន្ធ មិត្តចាក់ទឹកមិនលិច កំពុងតែប្រតិបត្តិការក្នុងតំបន់នោះយ៉ាងសកម្ម។ ហើយនេះ ក៏អាចជាការគាំទ្រ មួយរបស់ជប៉ុនទៅកាន់ហ្វីលីពីន និងវៀតណាមដែលកំពុងតែប្រទាញប្រទង់ជាមួយនឹងចិនក្នុងបញ្ហា សមុទ្រចិនខាងត្បូងនោះ។ ជប៉ុន ក៏ធ្លាប់គ្រប់គ្រងតំបន់មួយចំនូន នៅក្នុងសមុទ្រចិនខាងត្បូងផងដែរនៅក្នុងអំឡុងសង្គ្រាមលោកលើកទី២៕
Tag:
សមុទ្រចិនខាងត្បូង
© រក្សាសិទ្ធិដោយ thmeythmey.com