អន្តរជាតិ
នយោបាយអន្តរជាតិ
×![]()
នៅខែមេសាខាងមុខ បងធំអាស៊ាន ឥណ្ឌូនេស៊ីនឹងចុះកិច្ចព្រមព្រៀងទិញយន្តហោះចម្បាំងប្រភេទ Su-35 របស់រុស្ស៊ីជាច្រើនគ្រឿងដើម្បីពង្រឹងកងទ័ពអាកាសរបស់ខ្លួន។ ប៉ុន្តែមន្ត្រីក្រសួងការពាររុស្ស៊ីបានបញ្ជាក់ថា ឥណ្ឌូនេស៊ីនឹងទទួល យន្តហោះចម្បាំងនេះនៅឆ្នាំ ២០១៨ ដោយសារក្រុមហ៊ុនផលិតយន្តហោះមិនទាន់តម្រូវការព្រោះមានប្រទេសច្រើនកុម្ម៉ង់ទិញ ។
រដ្ឋមន្ត្រីការពារជាតិឥណ្ឌូនេស៊ី Ryamizard Ryacudu បានអះអាងថា រដ្ឋាភិបាលក្រុមមូស្គូនិងរដ្ឋាភិបាលក្រុងហ្សាការតា ត្រៀមខ្លួនរួចរាល់ហើយដើម្បីចុះហត្ថលេខាលើកិច្ច ព្រមព្រៀងទិញយន្តហោះចម្បាំងស៊េរីថ្មីប្រភេទ Su-35 ចំនួន ១០គ្រឿង។ ការចុះហត្ថលេខានេះនឹងត្រូវរៀបចំឡើងនៅខែមេសាខាងមុខនេះ។
យន្តហោះចម្បាំង Su-35 នេះនឹងមកជំនួសយន្តហោះចម្បាំង F-5 Tigers ដែលកំពុងបម្រើការក្នុងកងទ័ពអាកាសឥណ្ឌូនេស៊ីបច្ចុប្បន្ន។ ហើយម្យ៉ាងយន្តហោះស៊េរីទំនើបចុងក្រោយរបស់រុស្ស៊ីនេះនឹងជួយបង្កើនសមត្ថភាពកងទ័ពនិងពង្រឹងការការពារបូរណភាពដែនដីរបស់ឥណ្ឌូនេស៊ីផងដែរ។
ប៉ុន្តែ ទោះជាមានការចុះកិច្ចព្រមព្រៀងក្នុងឆ្នាំនេះក៏ដោយ ឥណ្ឌូនេស៊ីអាចនឹងទទួលយន្តហោះនេះបនៅដើមឆ្នាំ ២០១៨ឯណោះ។
យោងតាម ក្រសួងការពារដែលស្រង់សម្តីដោយសារព័ត៌មានរុស្ស៊ី Sputnik ក្រុមហ៊ុនផលិតយន្តហោះ មិនអាចចែកចាយយន្តហោះចម្បាំងដែលឥណ្ឌូនេស៊ីកុម្ម៉ង់ទិញនោះមុនឆ្នាំ ២០១៨ ឡើយ ព្រោះបច្ចុប្បន្ននេះមានអតិថិជនច្រើនទាំងក្នុងនិងក្រៅប្រទេសនាំគ្នាបញ្ជាទិញយន្តហោះនេះ។
ក្រុមហ៊ុនផលិតអាវុធរុស្ស៊ីកំពុងមមាញឹកផលិតអាវុធដើម្បីបំពេញតម្រូវការប្រទេសជាច្រើននិងសម្រាប់កងទ័ពអាកាសរុស្ស៊ីដែរ។ ក្នុងរយៈពេល ៥ឆ្នាំទៅមុខ រុស្ស៊ីគ្រោងនឹងផលិតយន្តហោះនេះ ៥០គ្រឿងសម្រាប់កងទ័ពអាកាសរុស្ស៊ី និង២៤ គ្រឿងសម្រាប់កងទ័ពចិន ហើយឥណ្ឌូនេស៊ីនឹងទទួលបានយន្តហោះនេះ ២គ្រឿងក្នុងឆ្នាំ ២០១៨ ។
តាមពិតទៅ យន្តហោះ Su-35 ក្លាយជាយន្តហោះដែលពេញនិយមនិងទាក់ភ្នែកប្រទេសជាច្រើនក្នុងពិភពលោក។ ហើយវាកាន់តែពេញនិយមទៀត ក្រោយពេលរដ្ឋាភិបាលក្រេមឡាំងបញ្ជូនយន្តហោះប្រភេទនេះទៅកម្ចាត់ក្រុមដែស្ហនៅស៊ីរីកាលពីថ្មីៗនេះ។ យន្តហោះអាចហោះបានល្បឿន ២៤០០គីឡូម៉ែត្រក្នុងមួយម៉ោង ហើយវាត្រូវបានគេច្នៃចេញពីយន្តហោះចម្បាំង Su-27 ។ វាត្រូវបានបំពាក់ដោយប្រព័ន្ធទំនាក់ទំនងពិសេស ភ្ជាប់ដោយ រ៉ាដាទំនើប មានម៉ាស៊ីនស៊េរីថ្មី និងបំពាក់ដោយកាំភ្លើង ៣០មីល្លីម៉ែត្រ និងមានមីស៊ីលធំៗជាច្រើន និងគ្រាប់រ៉ុក្កែតជាច្រើនផង។
សូមបញ្ជាក់ថា ការនាំចូលយន្តហោះចម្បាំងរបស់ឥណ្ឌូនេស៊ី កើតឡើងស្របពេលដែលបងធំអាស៊ានមួយនេះចាប់ផ្តើមសាងសង់មូលដ្ឋានទ័ព នៅប្រជុំកោះ Natuna ដែលស្ថិតនៅ សមុទ្រចិនខាងត្បូង។តាមពិតទៅឥណ្ឌូនេស៊ីមិនមែនជាភាគីជម្លោះសមុទ្រចិនខាងត្បូងឡើយ ប៉ុន្តែផែនទីរូបអណ្តាត ឬផែនទី៩ ចំណុច របស់ចិននោះគ្របដណ្តប់លើកោះ Natuna ដែលឥណ្ឌូនេស៊ីចាត់ទុកជារបស់ខ្លួន៕
© រក្សាសិទ្ធិដោយ thmeythmey.com
«មជ្ឈការ»មានន័យខុសពី«វិមជ្ឈការ»ដូចម្តេច?
1 សប្តាហ៍
