ជប៉ុនបង្កើនជំនួយឲ្យប្រទេសអាស៊ី ស្របពេលដែលចិនកំពុងវាតទីនៅសមុទ្រចិនខាងត្បូង

អន្តរជាតិ

នយោបាយអន្តរជាតិ

ជប៉ុនបង្កើនជំនួយឲ្យប្រទេសអាស៊ី ស្របពេលដែលចិនកំពុងវាតទីនៅសមុទ្រចិនខាងត្បូង

10, Mar 2016 , 11:21 am

រូបភាព

ដោយ: តន ចាន់រិទ្ធារ៉ា

រដ្ឋាភិបាលជប៉ុននឹងបង្កើនជំនួយរបស់ខ្លួនទៅឲ្យប្រទេសអាស៊ី ជាពិសេសរដ្ឋជាសមាជិកអាស៊ាន ខណៈពេលដែលមហាយក្សកំពុងបន្តវាតទីនៅដែនសមុទ្រចិនខាងត្បូង។ នេះបើយោងតាមរបាយការណ៍ជំនួយបរទេសប្រចាំឆ្នាំ ដែលទទួលបានដោយសារព័ត៌មានជប៉ុន Kyodo។

របាយការណ៍ថ្មីបំផុតរបស់ក្រសួងការបរទេសជប៉ុនស្ដីពីជំនួយអភិឌ្ឍន៍ផ្លូវការ (ODA) បង្ហាញពីគោលបំណងរបស់ជប៉ុនក្នុងការរក្សាតួនាទីរបស់ខ្លួនក្នុងសមុទ្រដ៏សំខាន់ ដែលរួមទាំងតំបន់អាស៊ីអាគ្នេយ៍។ របាយការណ៍ដែលនឹងត្រូវបញ្ជូនទៅគណៈរដ្ឋមន្ត្រីនៅថ្ងៃសុក្រខាងមុខ ចាត់ទុកតំបន់អាស៊ានជាប្លុកដែលមានសារៈសំខាន់ទាំងផ្នែកសេដ្ឋកិច្ចនិងផ្នែកនយោបាយ។

បើតាមឯកសារខាងលើ ជប៉ុនមានគោលដៅជំរុញតម្លៃសកលដែលផ្អែកលើច្បាប់នៅក្នុងតំបន់អាស៊ីខាងកើត ដូច្នេះហើយ ជប៉ុននឹងជួយគាំទ្រកិច្ចខិតខំប្រឹងប្រែងរបស់ប្រទេសទាំងនោះ ក្នុងការពង្រឹងសន្តិសុខសមុទ្រ និងការកសាងហេដ្ឋារចនាសម្ព័ន្ធ។ ជាមួយគ្នានេះ ជប៉ុនក៏មានបំណងជំរុញឲ្យមានហេដ្ឋារចនាសម្ព័ន្ធមានគុណភាពខ្ពស់ ដែលនេះនឹងធ្វើឲ្យតំបន់អាស៊ីក្លាយជាមជ្ឈមណ្ឌលនៃកំណើនសេដ្ឋកិច្ចពិភពលោក និងជួយបង្កើតការងារ ព្រមទាំងផ្ដល់បច្ចេកវិទ្យាដល់ប្រជាជនក្នុងស្រុកផងដែរ។

បន្ថែមលើនេះ ជប៉ុនក៏គ្រោងនឹងពង្រីកការចំណាយលើជំនួយរបស់ខ្លូនលើការកសាងហេដ្ឋារចនាសម្ព័ន្ធ ដោយគិតទាំងបរិមាណនិងគុណភាពពីជំនួយទាំងនេះ។ នៅឆ្នាំ២០២០ ជប៉ុនជាមួយនឹងធនាគារអភិវឌ្ឍអាស៊ី នឹងពង្រីការការវិនិយោគនៅតំបន់អាស៊ីឲ្យដល់១១០ពាន់លានដុល្លារ។

សូមបញ្ជាក់ដែរថា កាលពីឆ្នាំមុន ជាលើកដំបូងដែលជប៉ុនបានកែសម្រួលច្បាប់ស្ដីពីសហប្រតិបត្តិការអភិវឌ្ឍន៍ តាំងពីឆ្នាំ២០០៣។ ការកែសម្រួលនេះបានគូសបញ្ជាក់ពីគោលជំហររបស់ជប៉ុនក្នុងការប្រើប្រាស់ជំនួយដើម្បីការពារផលប្រយោជន៍របស់ខ្លួន ស្របពេលដែលបរិបទពិភពលោកកំពុងតែផ្លាស់ប្ដូរ។

នៅក្រោមច្បាប់ដែលកែសម្រួលនេះ ជំនួយរបស់ជប៉ុនអាចប្រើបានសម្រាប់គាំទ្រកងកម្លាំងបរទេសក្នុងប្រតិបត្តិការមិនប្រយុទ្ធ ដូចជាជំនួយពេលមានគ្រោះធម្មជាតិ ការកសាងហេដ្ឋារចនាសម្ព័ន្ធ និងការល្បាតឆ្នេរសមុទ្រជាដើម។ កន្លងមក ជំំនួយទៅបរទេសរបស់ជប៉ុន ផ្ដោតតែលើការគម្រោងសាងសង់ផ្លូវថ្នល់ និងការកាត់បន្ថយភាពក្រីក្រនៅប្រទេសទទួលជំនួ៕