អន្តរជាតិ
ហ្វីលីពីន សុំជួលយន្តហោះចម្បាំងជប៉ុនជួយសម្រួលនាវាល្បាតប្រឆាំងចិននៅសមុទ្រចិនខាងត្បូង
× ភាពតានតឹងក្នុងតំបន់ជម្លោះសមុទ្រចិនខាងត្បូង បានជំរុញឲ្យហ្វីលីពីនត្រូវផ្លាស់ប្តូរយុទ្ធសាស្ត្រនៃការពង្រឹង និងបង្កើនវិស័យការពារជាតិពីការប្រឆាំងនិងទប់ស្កាត់ក្រុមឧទ្ទាម មកផ្តោតសំខាន់លើការការពារ ដែនអធិបតេយ្យ ពោលគឺប្រឆាំងនឹងការវាតទីរបស់ចិន ក្នុងតំបន់ជម្លោះសមុទ្រចិនខាងត្បូងវិញ។ ដើម្បីបង្កើនសមត្ថភាពការល្បាតនៅក្នុងតំបន់ជម្លោះ រដ្ឋាភិបាលក្រុងម៉ានីល ប្រកាសសុំជួលយន្តហោះចម្បាំងបន្ថែមពីជប៉ុនក្នុងការសម្រួលការល្បាតរបស់នាវាល្បាតនៅតំបន់នោះ។
លោកប្រធានាធិបតីហ្វីលីពីន ប៊ែរនីណូ អាហ្គីណូ (Benigno Aquino) នៅថ្ងៃទី០៩ ខែមីនា ម្សិលមិញ បានប្រកាសថា ហ្វីលីពីន ត្រៀមចុះកិច្ចព្រមព្រៀងដើម្បីជួលយន្តហោះចម្បាំង៥គ្រឿងពីជប៉ុនដើម្បី សម្រួលប្រតិបត្តិការ ការពារ និងប្រឆាំងនឹងសកម្មភាពរបស់ចិននៅក្នុងតំបន់ជម្លោះសមុទ្រចិនខាងត្បូង។ ការអះអាងនេះ ធ្វើឡើងក្នុងឱកាសនៃការផ្តល់សុន្ទរកថានាមូលដ្ឋានកងទ័ពអាកាសក្បែររដ្ឋធានី ម៉ានីល។
លោក ប៊ែរនីណូ បានអះអាងថាកិច្ចព្រមព្រៀងនៃការជួលយន្តហោះចម្បាំងរបស់ជប៉ុនប្រភេទ TC-90គឺជាផ្នែកមួយនៃគោលនយោបាយក្នុងការការពារអធិបតេយ្យហ្វីលីពីន និងពិសេសនោះ ដើម្បីជួយសម្រួល និងបន្ថែមសមត្ថភាពនាវាល្បាតរបស់ហ្វីលីពីនដែលកំពុងតែប្រតិបត្តិការការពារសមុទ្រខាងលិចដែលជាផ្នែកមួយនៃសមុទ្រចិនខាងត្បូងនោះ។ នេះបើយោងតាមភ្នាក់ងារព័ត៌មាន Reuters ដែលបានស្រង់សម្តីដែលលោកថា កាលបរិច្ឆេទពិតប្រាកដនៃការមកដល់នៃយន្តហោះចម្បាំងនោះ មិនទាន់កំណត់ច្បាស់លាស់នោះទេ។
អ្នកនាំពាក្យក្រសួងការពារជាតិហ្វីលីពីន លោក Restituto Padilla បានបញ្ជាក់បន្ថែមថា កិច្ចព្រមព្រៀង ជួលយន្តហោះរបស់ជប៉ុន ត្រៀមនឹងបញ្ចប់ហើយ តែ លោកថា តម្លៃជួល និងពេលកំណត់នៃការជួល នោះមិនទាន់បានកំណត់នៅឡើយនោះទេ។
សូមបញ្ជាក់ផងដែរថា បញ្ហាសមុទ្រចិនខាងត្បូង គឺជាជម្លោះដែនអធិបតេយ្យរវាងព្រុយណេ ម៉ាឡេស៊ី ហ្វីលីពីន វៀតណាម និងចិន។ អវត្តមានក្នុងការស្វែងរកដំណោះស្រាយរួមគ្នារវាងភាគីពាក់ព័ន្ធ បាន ធ្វើឲ្យជម្លោះនេះ ឈានទៅដល់ការប្រឈមមុខទាំងផ្នែកការទូត និងការបង្ហាញសាច់ដុំផ្នែកយោធាជាពិសេសនោះ នៅពេលដែលចិន បាននិងបន្តវាតទីក្នុងតំបន់ជម្លោះដោយឯកតោភាគីក្រោមហេតុផលនៃការកើនឡើងនៃតម្រូវការរបស់ ប្រជាជនភ្ជាប់ជាមួយនឹងអំណេះអំណាងប្រវត្តិសាស្ត្រនៃការកាន់កាប់សមុទ្រចិនខាងត្បូងផងដែរនោះ។
ការវិវត្តនៃជម្លោះនេះហើយ ធ្វើឲ្យរដ្ឋាភិបាលហ្វីលីពីន បានបន្តបង្កើនកញ្ចប់ថវិកាជាតិទៅលើវិស័យការពារជាតិ។ អ្វីគួរកត់សម្គាល់នោះរដ្ឋាភិបាលហ្វីលីពីន បានផ្លាស់ប្តូរយុទ្ធសាស្ត្ររបស់ខ្លួនបន្តិចពោលគឺពីការផ្តោតសំខាន់ក្នុងការប្រយុទ្ធប្រឆាំងក្រុមឧទ្ទាមក្នុងស្រុក ទៅជាការពង្រឹងសមត្ថភាពការពារដែនអធិបតេយ្យ ដែលកំពុងតែប្រទាញប្រទង់ជាមួយនឹងចិននោះ៕
© រក្សាសិទ្ធិដោយ thmeythmey.com