កីឡាជាតិ
ជាតិ
កីឡា១១ប្រភេទ បង្ហាញខ្លួនក្នុងបុណ្យទន្លេ ខណៈយប់ដំបូងមានមនុស្សរាប់ម៉ឺននាក់
× កំពង់ចាម៖ កីឡា១១ប្រភេទនឹងលើកយកមកប្រកួតនៅក្នុងពិធីបុណ្យទន្លេលើកទី២ ដែលប្រព្រឹត្តទៅរយៈពេល៣ថ្ងៃ គឺចាប់ពីថ្ងៃទី១១ ដល់ថ្ងៃទី១៣ ខែមីនា ឆ្នាំ២០១៦នេះ។ ពិធីបុណ្យទន្លេលើកទី២ឆ្នាំនេះ នឹងប្រព្រឹត្តនៅទីរួមខេត្តកំពង់ចាម ក្រោមប្រធានបទ«ទន្លេស្អាត សហគមន៍ល្អ»។ ខណៈយប់ថ្ងៃទី១០ មីនា ទោះបីមិនមែនជាថ្ងៃចាប់ផ្តើមនៃពិធីបុណ្យទន្លេក៏ដោយ ប៉ុន្តែ គេសង្កេតឃើញមានការចូលរួមពីមនុស្សរាប់ម៉ឺននាក់។
កីឡាចំនួន១១ប្រភេទ ការប្រគំតន្ត្រី និងស្តង់ជាច្រើនបានរៀបចំរួចជាស្រេច ដើម្បីស្វាគមន៍ពិធីបុណ្យទន្លេលើកទី២ ដែលប្រារព្ធធ្វើឡើងរយៈពេល៣ថ្ងៃនៅទីរួមខេត្តកំពង់ចាម។ ទន្ទឹមនឹងនេះ នៅយប់ថ្ងៃទី១០ មីនា មានពលរដ្ឋជាច្រើន បានសម្រុកមកចូលរួមរាប់ម៉ឺននាក់ ដែលធ្វើឲ្យពិធីបុណ្យនេះ កាន់តែមានភាពអធិកអធម។
ក្នុងរយៈពេល៣ថ្ងៃ នៃពិធីបុណ្យទន្លេនេះ គណៈកម្មាជាតិអូឡាំពិកកម្ពុជា បាននាំយកកីឡាចំនួន១១ប្រភេទមកចូលរួម មានដូចជា៖ ការប្រកួតរត់ប្រណាំងកំសាន្ត ការប្រកួតបាល់ទះ ការប្រកួតហែលទឹក កីឡាចំបាប់បុរាណ កីឡាទូកក្តោង ប្រកួតកីឡាអុកចត្រង្គ ប្រដាល់គុនខ្មែរ កីឡាសម្តែងលើទឹក អុំទូកប្រពៃណីខ្នាតតូច ឆ័ត្រយោង និងសីស្លាប-សីដក់។
គួរបញ្ជាក់ថា កន្លងមក ពិធីបុណ្យនេះ គឺបានប្រារព្ធធ្វើឡើងនៅខេត្តក្រចេះ ហើយបន្ទាប់ពីមានគាំទ្រពីពលរដ្ឋជាច្រើននោះ ក្រសួងទេសចរណ៍ និងគណៈកម្មាធិការជាតិអូឡាំពិកកម្ពុជា(NOCC) សហការជាមួយអាជ្ញាធរខេត្តកំពង់ចាម បានរៀបចំពិធីបុណ្យទន្លេជាលើកទី២ ក្រោមប្រធានបទ«ទន្លេស្អាត សហគមន៍ល្អ» ស្ថិតនៅទីរួមខេត្តកំពង់ចាម។ ពិធីបុណ្យនេះ មានគោលបំណងដើម្បីទាក់ទាញភ្ញៀវទេសចរជាតិ និងអន្តរជាតិ ឲ្យចូលមកកំសាន្តនៅកម្ពុជាឲ្យបានច្រើន និងបង្កភាពសប្បាយរីករាយជូនពលរដ្ឋនៅក្នុងខេត្តកំពង់ចាម និងពលរដ្ឋទូទាំងប្រទេស៕
© រក្សាសិទ្ធិដោយ thmeythmey.com