ល្បុក្កតោ អវត្តមានក្នុងបុណ្យទន្លេ ខណៈកីឡា២ប្រភេទត្រូវអភិវឌ្ឍន៍សម្រាប់កំពង់ចាម

កីឡាជាតិ

ជាតិ

ល្បុក្កតោ អវត្តមានក្នុងបុណ្យទន្លេ ខណៈកីឡា២ប្រភេទត្រូវអភិវឌ្ឍន៍សម្រាប់កំពង់ចាម

11, Mar 2016 , 3:15 pm

រូបភាព

ដោយ:

ក្នុងចំណោមកីឡា១១ប្រភេទដែលត្រូវបានគណៈកម្មាធិការជាតិអូឡាំពិកកម្ពុជា(NOCC) សម្រេចដាក់ឲ្យសម្តែង និងប្រកួតនាពិធីបុណ្យទន្លេលើកទី២ ឆ្នាំ២០១៦ ក្រោមប្រធានបទ«ទន្លេស្អាត សហគមន៍ល្អ» ក្នុងទីរួមខេត្តកំពង់ចាម គេសង្កេតឃើញមិនមានវត្តមានកីឡាល្បុក្កតោ នោះទេ ខណៈកីឡាពីរប្រភេទក្នុងចំណោមកីឡាដែលបានបង្ហាញខ្លួនក្នុងបុណ្យទន្លេឆ្នាំនេះ ត្រូវបានលោកអភិបាលខេត្តកំពង់ចាម លន់ លឹមថៃ ចាត់ទុកថា ជាកីឡាដែលត្រូវអភិវឌ្ឍន៍សម្រាប់ខេត្តកំពង់ចាម។

ទោះបីបុណ្យទន្លេលើកទី២នាខេត្តកំពង់ចាមឆ្នាំនេះមានកីឡា១១ប្រភេទចូលរួមក៏ដោយ ក៏ប៉ុន្តែគេសង្កេតឃើញមិនវត្តមានកីឡាល្បុក្កតោក្នុងកម្មវិធីនេះឡើយ។ ពាក់ព័ន្ធទៅនឹងបញ្ហានេះ លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាបានពន្យល់ក្នុ្ងងនាមជាប្រធានសហព័ន្ធកីឡាល្បុក្កតោថា ដោយតែសហព័ន្ធមួយនេះកំពុងមានការមមាញឹកខ្លាំង ក្នុងការហ្វឹកហាត់ត្រៀមសម្តែង ដើម្បីបញ្ជ្រាបក្បាច់គុនល្បុក្កតោក្នុងកម្មវិធីរបស់កងយោធពលនាថ្ងៃទី២០ ខែមិនា ខាងមុខនេះ។

លោកបានបញ្ជាក់ថា៖«សហព័ន្ធកីឡាល្បុក្កតោដែលមានខ្ញុំជាប្រធានមានភាពមមាញឹកខ្លាំង ឥឡូវនេះកំពុងតែត្រៀមធ្វើការសម្តែងដោយសហការជាមួយ ឯកឧត្តម ហ៊ុន ម៉ាណែត ដូច្នេះត្រូវធ្វើការច្រើន។ អញ្ចឹងហើយនៅថ្ងៃទី២០ ខែមិនា ត្រូវត្រៀមលក្ខណៈដើម្បីបង្ហាញ និងបញ្ជ្រាបក្បាច់ល្បុក្កតោ នៅក្នុងកម្មវិធីរបស់កងយោធពលខេមរភូមិន្ទ។ ហើយមួយទៀតនៅថ្ងៃទី២៥ ក៏មានការសម្តែងក្នុងការបិទកម្មវិធីផងដែរ អញ្ចឹងហើយខ្ញុំបានដាក់កម្មវិធីពេញអស់ហើយនៅទីក្រុងភ្នំពេញសម្រាប់ល្បុក្កតោ»។

ទោះបីជាមិនមានវត្តមានកីឡាល្បុក្កតោក្នុងកម្មវិធីបុណ្យទន្លេលើកទី២នៅក្នុងខេត្តកំពង់ចាម នេះក្តី ប៉ុន្តែខាងគណៈកម្មាធិការជាតិអូឡាំពិកកម្ពុជា(NOCC) បានដាក់ប្រភេទកីឡាដែលស្រដៀងទៅនឹងកីឡាល្បុក្កតោដែរ គឺកីឡាចំបាប់បូរាណ។«ទោះបីមិនបានដាក់ក្បាច់ល្បុក្កតោក្នុងកម្មវិធីនេះក្តី ប៉ុន្តែយើងបានយកចំបាប់បូរាណ ដែលជាប្រភេទក្បាច់ល្បុក្កតោមួយដែរ។ ហើយចំបាប់បូរាណមុននឹងគេប្រកួត គេមានការប្រកួតគុនគ្រូ មានការសម្តែងច្រើនដែរ ហេតុដូច្នេះហើយបានជាយើងយកវាមក ព្រោះល្បុក្កតោកំពុងមានការមមាញឹកនៅភ្នំពេញដូច្នេះហើយយើងមិនអាចយកមកបានទេ»។

ដោយឡែក លោក លន់ លឹមថៃ អភិបាលខេត្តកំពង់ចាម បានមានប្រសាស៍ថា ប្រភេទកីឡាដែលមានសក្តានុពលសម្រាប់ខេត្តកំពង់ចាម គឺកីឡាបាល់ទះ កីឡាហែលទឹក កីឡាវាយសី និងកីឡាប៉េតង់។ ទន្ទឹមនឹងនេះ លោកអភិបាល ក៏បានកត់សម្គាល់ឃើញថា កីឡារត់ប្រណាំង និងកីឡាប្រដាល់ ជាប្រភេទកីឡាដែលនៅមានភាពអន់ថយ និងត្រូវធ្វើការអភិវឌ្ឍបន្ថែម។

ពាន់ព័ន្ធទៅនឹងការអភិវឌ្ឍបន្ថែម ក៏ដូចជាពង្រីកប្រភេទកីឡាទាំងនេះ លោក លន់ លឹមថៃ បានបញ្ជាក់ថា៖«យើងនឹងខិតខំផ្សព្វផ្សាយនៅថ្នាក់មូលដ្ឋានដើម្បីឲ្យឪពុកម្តាយ អាណាព្យាបាល បងប្អូន ធ្វើយ៉ាងម៉េចពិនិត្យមើលពីចំណង់ចំណង់ចំណូលចិត្ត សមត្ថភាព ឬកាយសម្បទាកូនចៅរបស់ខ្លួន ថាតើវាសាកសមទៅនឹងប្រភេទកីឡាណាមួយ ដើម្បីបញ្ចុះបញ្ចូលឲ្យមានចំណង់ចំណូលចិត្ត។ ហើយទី២ តាមគ្រឹះស្ថានសិក្សានានា បញ្ហានេះពិតជាសំខាន់ណាស់ វាជាព្រភពធនធានថ្នាលដ៏សំខាន់ ព្រោះកីឡាករដែលពូកែទាល់តែមានថ្នាលដើម្បីបណ្តុះបណ្តាល ហើយការបណ្តុះបណ្តាលវាផ្តើមចេញពីថ្នាក់បឋមរហូតដល់ឧត្តមសិក្សា»។

នាពិធីបិទការប្រកួតរត់ប្រណាំងលក្ខណៈកម្សាន្ត៣គីឡូម៉ែត្រ និង៥គីឡូម៉ែត្រ ដែលមានអ្នកចូលរួមប្រកួតជាង ១,៧០០នាក់ នៅមុខទីស្នាក់ការទេសចរណ៍ខេត្តកំពង់ចាម លោក លន់ លឹមថៃ អភិបាលខេត្តកំពង់ចាម បានមានប្រសាសន៍ថា សម្រាប់វត្តមានរបស់កីឡាទាំង១១ប្រភេទក្នុងថ្ងៃបុណ្យទន្លេនេះជាសារមួយដែលអាចបំផុសទឹកចិត្តប្រជាពលរដ្ឋ ក៏ដូចជាយុវជន យុវនារីឲ្យកាន់តែមានការស្រលាញ់ចូលចិត្តកាន់តែខ្លាំង ជាពិសេសអាចឆ្លុះបញ្ចាំងពីភាពរីកចម្រើននៃវិស័យកីឡានៅកម្ពុជា ព្រោះកីឡានាំមកនូវសាមគ្គីភាព ភាតរភាព និងសុខភាពល្អ។ ហើយអ្វីដែលសំខាន់កីឡាអាចធ្វើយុវជន យុវនារី ឃ្លាតឆ្ងាយពីគ្រឿង និងដាស់ស្មារតីរបស់ពួកគេបោះបង់អ្វីដែលឥតប្រយោជន៍ ងាកមករកកីឡា។

គួរបញ្ជាក់ថា សម្រាប់ការប្រកួតរត់ប្រណាំងលក្ខណៈកំសាន្តកាលពីព្រឹកថ្ងៃទី១១ ខែមិនា នៅមុខទីស្នាក់ការទេសចរណ៍ ម្ចាស់ជើងឯកវិញ្ញាសារត់ចម្ងាយ៥គីឡូម៉ែត្រផ្នែកបុរសបានទៅកីឡាករ រ៉ាត់ សារិទ្ធ មកពីសាលាខេត្តកំពង់ចាម ខណៈលេខ២ និងលេខ៣ បានទៅ រស់ សំណាង និង ពៅ សាមុត មកពីអង្គការភាពញញឹមនៃកុមាររាជធានីភ្នំពេញ។ វិញ្ញាសា៥គីឡូម៉ែត្រផ្នែកនារីចំណាត់ថ្នាក់លេខ១ លេខ២ និងលេខ៣ បានទៅ មាស ធីវ៉ា, ឡាច គឹមសា និង តេង រតនា មកពីសាលាព្រះសីហនុ។

វិញ្ញាសា៣គីឡូម៉ែត្រផ្នែកបុរស បានទៅ ហាក់ គា មកពីអនុវិទ្យាល័យអនុវត្ត ខណៈលេខ២បានទៅ តូច មុំ មកពីសាកលវិទ្យាល័យកសិកម្ម និងលេខ៣ បានទៅ ម៉េង សៀវ ហ៊ុយ មកពីវិទ្យាល័យព្រះសីហនុ។ វិញ្ញាសា៣គីឡូម៉ែត្រផ្នែកនារី ចំណាត់ថ្នាក់លេខ១ បានទៅ ខៀវ ផល្លា មកពីវិទ្យាល័យទួលថ្ម ខណៈលេខ២ លី គឹមសួរ មកពីវិទ្យាល័យទួលថ្ម និងលេខ៣បានទៅ ផាន់ សុខគា មកពីវិទ្យាល័យជ្រោយថ្ម៕