បុណ្យទន្លេ៖ ក្រុមបាល់ទះបញ្ជាការដ្ឋានអង្គរក្សបំបាក់ក្រសួងមហាផ្ទៃដោយលទ្ធផល ៣-១

កីឡាជាតិ

ជាតិ

បុណ្យទន្លេ៖ ក្រុមបាល់ទះបញ្ជាការដ្ឋានអង្គរក្សបំបាក់ក្រសួងមហាផ្ទៃដោយលទ្ធផល ៣-១

12, Mar 2016 , 2:28 pm

រូបភាព

ដោយ:

ក្រុមបញ្ជាការដ្ឋានអង្គរក្ស បានបំបាក់ក្រុមក្រសួងមហាផ្ទៃ ក្នុងលទ្ធផល ៣សិត ទល់នឹង ១សិត នាការប្រកួតបាល់ទះដើម្បីអបអរពិធីបុណ្យទន្លេលើកទី២ ឆ្នាំ២០១៦ ក្រោមប្រធានបទ«ទន្លេស្អាត សហគមន៍ល្អ» នាទីរួមខេត្តកំពង់ចាម ដែលប្រព្រឹត្តទៅរយៈពេល៣ថ្ងៃចាប់ពីថ្ងៃទី១១ ដល់ថ្ងៃទី១៣ ខែមីនា។

មនុស្សជាង១ពាន់នាក់បានចូលរួមទស្សនាការប្រកួតបាល់ទះ ដើម្បីអបអរថ្ងៃទី២ នៃពិធីបុណ្យទន្លេលើកទី២ ឆ្នាំ២០១៦ ក្រោមប្រធានបទ«ទន្លេស្អាត សហគមន៍ល្អ» នៅទីរួមខេត្តកំពង់ចាម រវាងក្រុមបញ្ជាការដ្ឋានអង្គរក្ស និងក្រុមក្រសួងមហាផ្ទៃ នាសាលាខេត្តកំពង់ចាម កាលព្រឹកថ្ងៃទី១២ ខែមីនា នេះ។ បន្ទាប់ពីធ្វើការប្រកួតយ៉ាងស្វិតស្វាញអស់រយៈពេលមួយព្រឹកពេញ ក្រុមបញ្ជាការដ្ឋានអង្គរក្ស បានបំបាក់ក្រុមក្រសួងមហាផ្ទៃ ក្នុងលទ្ធផល ៣សិត ទល់នឹង ១សិត សម្រាប់ការប្រកួត៤សិតរបស់ខ្លួន។

ទោះបីជាយ៉ាងនេះក្តីក្រុមបញ្ជាការដ្ឋានអង្គរក្ស បានបាត់បង់ឱកាសជាមា្ចស់ជ័យលាភីទៅហើយ ដោយសារជាលទ្ធផលសម្រាប់ការប្រកួត៤លើករបស់ក្រុមនេះទទួលជ័យជំនះ២លើក និងចាញ់២លើក។ ខណៈក្រុមក្រសួងមហាផ្ទៃ ទោះបីជារងការបំបាក់ពីក្រុមបញ្ជាការដ្ឋានអង្គរក្សក៏ដោយ ក៏ប៉ុន្តែក្រុមនេះនៅតែមានឱកាសក្នុងការទទួលជ័យលាភី ព្រោះសម្រាប់ការប្រកួត៣លើក ក្រុមនេះទទួលជ័យជំនះ២លើកនិងចាញ់១លើក ហើយក្រុមនេះនឹងធ្វើការប្រកួតលើកទី៤ ជាមួយក្រុមសាលាខេត្តកំពង់ចាដើម្បីកាត់ក្តីសម្រាប់ជ័យជំនះរបស់ខ្លួន។

គួរបញ្ជាក់ថា ការប្រកួតបាល់ទះដើម្បីអបអរពិធីបុណ្យទន្លេលើកទី២ ឆ្នាំ២០១៦ នាទីរួមខេត្តកំពង់ចាមមានក្រុមចូលរួមប្រកួតចំនួន៥ក្រុមគឺក្រុមបញ្ជាការដ្ឋានអង្គរក្ស ក្រុមក្រសួងមហាផ្ទៃ ក្រុមវិសាខារបស់ខេត្តព្រៃវែង ក្រុមកងពលធំអន្តរាគមន៍លេខ៣ និងក្រុមសាលាខេត្តកំពង់ចាម។ ប៉ុន្តែក្រុមដែលមានឱកាសក្នុងការទទួលជ័យលាភីមានតែ៣ក្រុមប៉ុណ្ណោះគឺក្រុមក្រសួងមហាផ្ទៃ ក្រុមវិសាខា និងក្រុមកងពលធំអន្តរាគមន៍លេខ៣ ខណៈក្រុមបញ្ជាការដ្ឋានអង្គរក្ស និងម្ចាស់ផ្ទះសាលាខេត្តកំពង់ចាម ទោះបីនៅសល់ការប្រកួតមួយជើងទៀតក៏ដោយ ប៉ុន្តែក្រុមនេះបានធ្លាក់ពីជ័យលាភីទៅហើយ៕