ពីនេះ ពីនោះ
×![]()
ដោយ: ថ្មីៗ
បន្ទាប់ពីត្រូវដកហូតតំណែងជាអភិបាលខណ្ឌរួចមក សារុន បានទៅសម្ងំរស់នៅជាមួយភរិយារបស់គាត់នៅឯជាយក្រុង។ លោក សារុន វ័យ៤៣ឆ្នាំ ត្រូវរស់នៅក្រោមការ ចំណាយថវិការបស់ភរិយារបស់គាត់ តែគាត់មិនដែលអស់សង្ឃឹមក្នុងជីវិតម្តងណាឡើយ ក្នុងការតស៊ូរស់នៅប្រចាំថ្ងៃ។ 
សារុន តែងតែទៅហូបការហ្វេ មើលកម្មវិធីប្រដាល់ ឬបាល់ទាត់ ជាមួយអ្នកភូមិជាយក្រុងយ៉ាងស្ងប់ស្ងាត់ ប្រៀបបានជាមនុស្សសាមញ្ញម្នាក់។ ពេលខ្លះ សារុន អង្គុយស្តាប់យ៉ាងយកចិត្តទុកដាក់ចំពោះការវិភាគនយោបាយ និងមតិរិះគន់របស់អ្នកភូមិ។
ពេលខ្លះលោក សារុន ងក់ក្បាលហាក់បង្ហាញពីការយល់ស្របចំពោះការលើកឡើងរបស់អ្នកភូមិ។ លោក សារុន មិនដែលជំទាស់ ឬប្រមាថរាល់ការលើកឡើងនេះទេ ប៉ុន្តែជាទូទៅលោក សារុន តែងតែលើកយកគំនិតអ្នកភូមិទាំងនេះ មកពិចារណា និងពិភាក្សាជាមួយភរិយា ដ៏មានសម្រស់របស់លោក។ ភរិយារបស់លោក សារុន ក៏តែងតែគាំទ្រ និងលើកទឹកចិត្តលោក សារុន ផងដែរ ព្រោះខ្លាចលោក សារុន បាក់ទឹកចិត្ត ក្រោយពីធ្លាក់តំណែង ធ្វើឲ្យលោកសារុនរីករាយជានិច្ចទោះបីជាគ្មានអំណាចក្តី។
ព្រឹកថ្ងៃមួយ ខណៈពេលលោក សារុន កំពុងអង្គុយទទួលទានគុយទាវ កាហ្វេ ជាមួយ អ្នកភូមិដូចរាល់ដង ស្រាប់តែក្រុមនគរបាលព្រហ្មទណ្ឌមួយក្រុម ប្រដាប់ដោយអាវុធគ្រប់ដៃ រួមជាមួយព្រះរាជអាជ្ញាផងបានមកដល់ ហើយចាប់ខ្លួនលោក សារុន ម្តងទៀត។ លោកព្រះរាជអាជ្ញាបានប្រាប់លោក សារុន ថា លោក សារុន ត្រូវចាប់ខ្លួនពីបទប្រព្រឹត្តអំពើពុករលួយ កាលពីកំពុងមានអំណាច ហើយការចាប់ខ្លួននេះធ្វើឡើងតាមពាក្យបណ្តឹងរបស់អង្គភាពប្រឆាំងអំពើពុករលួយ ដែលទទួលពាក្យបណ្តឹងតពីស្ត្រីអ្នកជំនួញ ដែលមានខ្នងក្រាសម្នាក់។ លោក សារុន ត្រូវបានស្ត្រី វ័យជា៣០ឆ្នាំម្នាក់ប្តឹងទៅអង្គភាពប្រឆាំងអំពើពុករលួយ ពីបទជម្រិតទារប្រាក់មិនបានសម្រេច កាលពីឆ្នាំមុន នៅពេលស្ត្រីរូបនេះ ធ្វើលិខិតសុំសាងសង់លំនៅដ្ឋានលក្ខណៈជាភូមិគ្រឹះ នៅជាប់មាត់ច្រាំង និងដងផ្លូវ។
លោក សារុន ពុំបានតមាត់ ឬសួរនាំអ្វីទេ ព្រោះលោកជឿជាក់លើខ្លួនលោកថា លោកពុំបានធ្វើអ្វីខុស ម្យ៉ាងលោកមិនចង់និយាយអ្វីវែងឆ្ងាយ និងត្រូវទុកតួនាទីនេះឲ្យទៅមេធាវីរបស់លោក។ ឯក្រុមកងនគរបាល និងព្រះអាជ្ញា បាននាំខ្លួនលោកមកកាន់តុលាការ និងប្រគល់ភារកិច្ចនេះ ឲ្យទៅចៅក្រមស៊ើបសួរ សួរនាំលោកសារុនបន្ត។ នៅចំពោះមុខចៅក្រមស៊ើបសួរ លោក សារុន បាននិយាយដដែលៗថា លោកមិនបានធ្វ់អ្វីខុសទេ។ លោកជឿជាក់លើខ្លួនឯង ព្រោះការឡើងកាន់អំណាចរបស់លោក គឺមិនមែនកើតឡើងដោយសារការសូកប៉ាន់នោះទេ។ លោកសារុន បានទាមទារឲ្យលោកចៅក្រមដោះលែងខ្លួនជាបណ្តោះអាសន្ន និងរង់ចាំមេធាវីរបស់លោកមកឆ្លើយសំណួររបស់ចៅក្រម។
លោកចៅ ក្រមស៊ើសួរ មិនបានយល់ស្របតាមការលើកឡើងរបស់លោក សារុន ឡើយ ហើយលោកចៅក្រម បានសម្រេចចិត្តឃុំខ្លួនលោកសារុននៅពន្ធនាគារជាបណ្តោះអាសន្ន។
បន្ទាប់ពីចៅក្រមស៊ើបសួរ ប្រកាសឃុំខ្លួន លោក សារុន គ្មានតក់ស្លុតបន្តិចឡើយ ព្រោះលោកមិនបានធ្វើអ្វី តាមការចោទប្រកាន់នេះទេ។ លោក សារុន បែរជាអស់សំណើចចំពោះការចោទប្រកាន់របស់លោកចៅក្រមទៅវិញ ប៉ុន្តែ លោកនៅតែជឿជាក់ថា នៅពេលមេធាវីលោកមកដល់ លោកនឹងត្រូវបានធានាឲ្យនៅក្រៅឃុំបាន។
មិនយូរប៉ុន្មាន មេធាវីរបស់លោកបានមក ដល់ហើយបានដាក់ពាក្យសុំធានាលោក សារុន ឲ្យនៅក្រៅឃុំ ព្រោះ សារុន ពុំបានប្រព្រឹត្តអំពើ ពុករលួយ ដូចក្នុងពាក្យបណ្តឹងនោះឡើយ។ លោកមេធាវីលើកឡើងថា ការប្តឹងលោក សារុន ធ្វើឡើង គឺដោយសារគំនុំគុំគួន និងឈ្នានីសប៉ុណ្ណោះ ពុំមែនជារឿងពិតឡើយ។ មេធាវីលោក សារុន បានអះអាងទៀតថា លោក សារុន ជាមនុស្សស្អាតស្អំ និងស្មោះត្រង់ម្នាក់។ បើសិនជា លោក សារុន ពិតជាបានប្រព្រឹត្តកំហុស ដូចការលើកឡើងរបស់អង្គភាពប្រឆាំងអំពើពុករលួយ ឬដូចការចោទប្រកាន់របស់ចៅក្រមមែន ម្ល៉េះ លោក សារុន មិននៅសម្ងំឲ្យគេមកចាប់ខ្លួន ដោយស្រួលនោះទេ។
ទោះបីយ៉ាងនេះក្តី ក៏លោកចៅក្រម នៅតែមិនអនុញ្ញាតឲ្យលោក សារុន នៅក្រៅឃុំដែរ ហើយបានសម្រេចបញ្ជូនសំណុំរឿងនេះ ទៅចៅក្រមជំនុំជម្រះ ដើម្បីជំនុំជម្រះ។
មិនយូរប៉ុន្មាន ថ្ងៃជំនុំជម្រះបានមកដល់។ ដោយឈរនៅក្នុងរង្វង់ក្រចកសេះ ក្នុងសាលជំនុំជម្រះ ដែលគ្មានម៉ាស៊ីនត្រជាក់ និងអវត្តមានដើមបណ្តឹង លោក សារុន បានប្រាប់ទៅចៅក្រមជំនុំជម្រះទាំងបីនាក់ ដោយគ្មានតក់ស្លុតថា ខ្ញុំសូមជម្រាបលោកតុលាការថា អ្វីដែលគេចោទ ប្រកាន់នេះ គឺជាការមួយបង្កាច់បង្ខូចឈ្មោះខ្ញុំទេ។ ខ្ញុំមិនបានធ្វើទង្វើគ្មានសីលធម៌ស្មើនឹងទោសក្បត់ជាតិនេះទេ ប៉ុន្តែអ្វី ដែលខ្ញុំធ្វើ គឺដោយសារខ្ញុំស្រលាញ់ជាតិរបស់ខ្ញុំ ស្មោះត្រង់ចំពោះជាតិរបស់ខ្ញុំ ជាពិសេសខ្ញុំត្រូវការឲ្យខណ្ឌរបស់ក្លាយជាខណ្ឌគម្រូ ក្នុងការអភិវឌ្ឍ ប្រកបដោយបរិស្ថាន និងផាសុកភាព។ ខ្ញុំមិនត្រូវការឲ្យខណ្ឌរបស់ខ្ញុំ ដូចខណ្ឌនានា ដែលគ្មានសណ្តាប់ធ្នាប់ គ្មានរបៀបរបប ក្នុងការរស់នៅទេ។
ស្តាប់ការពន្យល់របស់លោកសារុនហើយ ប្រធានចៅក្រមជំនុំជម្រះ បានសួរលោកសារុនបន្ត ថា លោកថា លោកជាមនុស្សស្មោះត្រង់ និងស្រលាញ់ប្រជាជន ស្រលាញ់ការអភិវឌ្ឍ ចុះហេតុអ្វី បានជាប្រជាពលរដ្ឋ គ្រាន់តែសុំសង់លំនៅដ្ឋាន លោកបែរជាមិនអនុញ្ញាត ហើយបែរជាទាមទារឲ្យគេបង់ប្រាក់ឲ្យខ្លួនចំនួនបីម៉ឺនដុល្លារបន្ថែមទៀត។ ចំពោះរឿងនេះ តើលោកដោះសារយ៉ាងម៉េចដែរ?។
លោក សារុន ដែលមើលទៅនៅតែរឹងប៉ឹង បានបញ្ចេញស្នាមញញឹមបន្តិច រួចងាកមកមើលភរិយា និងមេធាវីរបស់លោក ដែលកំពុងអង្គុយនៅក្នុងសវនាការ មុននឹងឆ្លើយទៅកាន់ចៅក្រម។ លោក សារុន ពោលថា រឿងនេះហើយ ដែលខ្ញុំកំពុងតែចង់សួរទៅលោកចៅក្រមវិញថា តើលោកមានឯកសារច្បាស់ទេថា ខ្ញុំបានជម្រិតទារប្រាក់ពីពលរដ្ឋដ៏កម្សត់របស់ខ្ញុំ?។ តើលោកជឿទេថា គ្រាន់តែសាងសង់លំនៅដ្ឋាន ត្រូវតែបង់ប្រាក់រហូតបីម៉ឺនដុល្លារ?។
លោក សារុន និយាយដល់ត្រឹមនេះ ចៅក្រមមើលមុខគ្នា ឯលោក សារុន បន្តចម្លើយថា៖« ខ្ញុំសូម ជម្រាបលោកចៅក្រមទាំងបីថា មូលហេតុដែលខ្ញុំមិនអនុញ្ញាតឲ្យម្ចាស់លំនៅដ្ឋាននោះសាងសង់នៅទីកន្លែងនោះគឺដោយសារ ម្ចាស់លំនៅដ្ឋាន មិនបានបំពេញតាមតម្រូវការ ដែលខាងខណ្ឌទាមទារដូចជា ខាងមុខលំនៅដ្ឋាន ត្រូវតែមានឃឿន ឬចិញ្ចើមផ្លូវ យ៉ាងតិចពីរម៉ែត្រកន្លះ ទៅបីម៉ែត្រ ទីពីរ មិនត្រូវសាងសង់ខ្ពស់ជាងគេហួសហេតុ និងទីបី ត្រូវសាងសង់ ដោយទុកចំ ណីទន្លេ យ៉ាងតិចដប់ម៉ែត្រដែរ។ ប៉ុន្តែសំនើខាងយើង ត្រូវបានម្ចាស់លំនៅដ្ឋាច្រានចោល និងនៅតែទាមទារសាងសង់ចូលមកលើចិញ្ចើមថ្នាល់ថែមទៀត។ ចំណុចនេះ ខ្ញុំសុំឲ្យលោក ចៅក្រមពិចារណា ប្រសិនបើលោកចៅក្រមជាខ្ញុំ តើលោកចៅក្រមយល់យ៉ាងណា?។ គេអាង មានបងប្អូនជាមន្ត្រីធំ គេគំរាមខ្ញុំ ថាគេត្រូវតែសង់លំនៅដ្ឋាននេះឲ្យបាន ហើយខ្ញុំនៅតែហាមជាដាច់ខាតថា មិនអនុញ្ញាត។ ដូច្នេះ តម្រូវការរបស់ខណ្ឌខ្ញុំ គឺត្រូវគាត់រំខាន។ ខ្ញុំមិនបានខ្លាច អំណាចមន្ត្រីណាម្នាក់ ដែលប្រព្រឹត្តខុសតួនាទីទេ។ ដូចខ្ញុំបាននិយាយតាំងពីថ្ងៃឃាត់ខ្លួនមក ម្ល៉េះថា ខ្ញុំត្រូវការរៀបចំសណ្តាប់ធ្នាប់របៀបរៀបរយក្នុងខណ្ឌរបស់ខ្ញុំ។ ខ្ញុំមិនត្រូវការឲ្យខណ្ឌរបស់ខ្ញុំ នៅរញ៉េរញ៉ៃទៀតទេ។ តែបំណងល្អរបស់ខ្ញុំ ទីបំផុត គឺបែបនេះ»។
ស្តាប់ការរៀបរាប់ដ៏ក្បោះក្បាយ និងម៉ឺងម៉ាត់របស់លោកសារុន ចៅក្រមទាំងបី ក៏ប្រកាសបិទ សវនាការ និងសុំលើកពេលទៅប្រកាសសាលក្រមនៅមួយសប្តាហ៍ក្រោយទៀត។
ដោយ សំរែ
(នៅមានត)
© រក្សាសិទ្ធិដោយ thmeythmey.com
