ជាតិ
កម្ពុជា-កូរ៉េឯកភាពគ្នាបង្កើតទំហំពាណិជ្ជកម្មដល់២ពាន់លានដុល្លារនៅឆ្នាំ២០២០
× ក្នុងកិច្ចប្រជុំភាគីកម្ពុជា-កូរ៉េ កាលពីថ្ងៃទី៩ មីនា ឆ្នាំ២០១៦ ដែលដឹកនាំដោយលោម លោក ឡុង វិសាលោ រដ្ឋលេខាធិការក្រសួងការបរទេស ភាគីកម្ពុជា និងកូរ៉េបានឯកភាពគ្នាលើចំណុចមួយចំនួន រួមមាន ការបង្កើនទំហំពាណិជ្ជកម្ម ការផ្តល់ជំនួយឥតសំណងដល់កម្ពុជា និងការបង្កើនកូតាពលករកម្ពុជា ទៅធ្វើការនៅប្រទេសកូរ៉េ។
សេចក្តីជូនព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ បានឲ្យដឹងថា កម្ពុជា-កូរ៉េ បានឯកភាពគ្នាលើចំណុចសំខាន់ៗមួយចំនួន ដែលរួមមាន ភាគីទាំងពីរនឹងបង្កើនពាណិជ្ជកម្មនឹងគ្នា រហូតដល់២ពាន់លានដុល្លារក្នុងឆ្នាំ២០២០ខាងមុខ។ ក្នុងនោះ ភាគីកូរ៉េ បានឯកភាព នឹងផ្តល់ជំនួយអភិវឌ្ឍន៍ផ្លូវការ ចំនួន៥១លានដុល្លារ (ឥតសំណង) ដល់កម្ពុជាក្នុងឆ្នាំ២០១៦ រួមនិងកម្ចីសម្បទានចំនួន ៣០០លានដុល្លារ សម្រាប់ឆ្នាំ២០១៥-២០១៨ ។ ប្រាក់ចម្ចីសម្បទាននឹងផ្តោតលើវិស័យចំនួន៤ រួមមាន ការអភិវឌ្ឍវិស័យកសិកម្ម ការអភិវឌ្ឍន៍ធនធានមនុស្ស ហេដ្ឋារចនាសម្ព័ន្ធដឹកជញ្ជូន និងវិស័យសុខភាពសាធារណ។
បើតាមសេចក្តីប្រកាសព័ត៌មានដដែល កម្ពុជា-កូរ៉េ ក៏បានឯកភាពគ្នាបង្កើតកូតាពលករកម្ពុជា ទៅធ្វើការនៅប្រទេសកូរ៉េផងដែរ។ យោងតាមក្រសួងការបរទេស និងសហប្រត្តិបត្តិអន្តរជាតិ ក្នុងវិស័យឧស្សាហកម្មកូរ៉េបានបង្កើតកូតា ពី៥១០០នាក់ ក្នុងឆ្នាំ២០១៥ ដល់៦៤០០នាក់ ក្នុងឆ្នាំ២០១៦ ៕
Tag:
កម្ពុជា-កូរ៉េ
ពាណិជ្ជកម្ម
© រក្សាសិទ្ធិដោយ thmeythmey.com