ប្រកួតបាល់ទះបុណ្យទន្លេ៖ក្រសួងមហាផ្ទៃលើកពាន ខណៈម្ចាស់ផ្ទះឈរនៅបាតតារាង

កីឡាជាតិ

ជាតិ

ប្រកួតបាល់ទះបុណ្យទន្លេ៖ក្រសួងមហាផ្ទៃលើកពាន ខណៈម្ចាស់ផ្ទះឈរនៅបាតតារាង

13, Mar 2016 , 2:41 pm

រូបភាព

ដោយ:

បន្ទាប់ពីប្រកួតយ៉ាងស្វិតស្វាញអស់រយៈពេលជាច្រើនថ្ងៃ ក្រុមបាលទះរបស់ក្រសួងមហាផ្ទៃ ដែលដឹកនាំដោយលោក ប៉ោ សារ៉ាត់ បានក្លាយជាម្ចាស់ជ័យលាភី ខណៈក្រុមម្ចាស់ផ្ទះសាលាខេត្តកំពង់ចាម ឈរក្នុងលំដាប់បាតតារាង។ ការប្រកួតបាល់ទះដើម្បីអបអរពិធីបុណ្យទន្លេលើកទី២ ឆ្នាំ២០១៦ នៅទីរួមខេត្តកំពង់ចាមនេះ ប្រព្រឹត្តទៅរយៈពេល៥ថ្ងៃ និងមាន៥ក្រុមចូលរួមប្រកួត។

ក្រុមបាល់ទះរបស់ក្រសួងមហាផ្ទៃ បានក្លាយជាម្ចាស់ជើងឯកប្រចាំកម្មវិធីប្រកួតដណ្តើមពានរង្វាន់បាល់ទះដើម្បីអបអរបុណ្យទន្លេលើកទី២ នាខេត្តកំពង់ចាម បន្ទាប់ពីក្រុមនេះ បានបំបាក់ក្រុមម្ចាស់ផ្ទះសាលាខេត្តកំពង់ចាម ៣សិត ទល់០ សិត កាលពីព្រឹកថ្ងៃទី ១៣ ខែមីនា នៅសាលាខេត្តកំពង់ចាម។ រីឯក្រុមសាលាខេត្តកំពង់ចាម បន្ទាប់ពីរងការបំបាក់របស់ក្រសួងមហាផ្ទៃ និងឆ្លងកាត់ការប្រកួត៤ប្រកួតចាញ់ទាំង៤ប្រកួត ធ្វើឲ្យក្រុមម្ចាស់ផ្ទះមួយនេះឈរក្នុងចំណាត់ថ្នាក់បាតតារាង ដោយទទួលបានចំណាត់ថ្នាក់លេខ៥ ក្នុងចំណោម៥ក្រុម។

ក្រុមក្រសួងមហាផ្ទៃដែលជាអតីតម្ចាស់ជើងឯកពានរង្វាន់បាល់ទះសម្តេច ហ៊ុន សែន កាលពីឆ្នាំ២០១៥ ទោះបីលទ្ធផលសម្រាប់ការប្រកួត៤ប្រកួត ឈ្នះ៣ និងចាញ់១ ស្មើក្រុមបាល់ទះរបស់អគ្គបញ្ជាការដ្ឋានអង្គរក្ស និងក្រុមវិសាខាក៏ដោយ ក៏ប៉ុន្តែក្រុមនេះទទួលបានពិន្ទុខ្ពស់ជាងគេ គឺ៩ពិន្ទុ (១.០៩១ ពិន្ទុគ្រាប់បាល់) ខណៈក្រុមបញ្ជាការដ្ឋានអង្គរក្ស៩ពិន្ទុ (១.០៤៩ ពិន្ទុគ្រាប់បាល់)។ ចំណែកក្រុមវិសាខាវិញ ទោះបីឈ្នះបីប្រកួតក៏ពិតមែន ប៉ុន្តែទទួលបានតែ៨ពិន្ទុប៉ុណ្ណោះ ជាហេតុធ្វើឲ្យក្រុមបាល់ទះរបស់ក្រសួងមហាផ្ទៃលើកពានតែម្តង។

លោក ប៉ោ សារ៉ាត់ គណៈប្រតិភូដឹកនាំក្រុមក្រសួងមហាផ្ទៃ មានអារម្មណ៍សប្បាយរីករាយ ចំពោះតំណែងជាម្ចាស់ជើងឯក សម្រាប់ការចូលរួមលើកដំបូងក្នុងពិធីបុណ្យទន្លេរបស់ខ្លួន និងបានប្តេជ្ញាថា នឹងគ្រង់តំណែងជើងឯកឲ្យបាន ប្រសិនបើបានចូលរួមប្រកួតក្នុងបុណ្យទន្លេលើកទី៣ នាឆ្នាំក្រោយ នៅខេត្តស្ទឹងត្រែង។

គួរបញ្ជាក់ថា សម្រាប់ការប្រកួតពានរង្វាន់បាល់ទះ ដើម្បីអបអរពីធីបុណ្យទន្លេលើកទី២ នាទីរួមខេត្តកំពង់ចាម ក្រុមបាល់ទះរបស់ក្រសួងមហាផ្ទៃបានក្លាយជាម្ចាស់ជើងឯក ខណៈក្រុមបញ្ជាការដ្ឋានអង្គរក្សជើងឯករង ឬឯក្រុមវិសាខាទទួលបានចំណាត់លេខ៣ ចំណែកក្រុមកងពលធំអន្តរាគមន៍លេខ៣ទទួលបានចំណាត់ថ្នាក់លេខ ៤ ដោយឡែកក្រុមម្ចាស់ផ្ទះសាលាខេត្តកំពង់ចាមទទួលចំណាត់ថ្នាក់លេខ៥ ៕