អន្តរជាតិ
នយោបាយអន្តរជាតិ
អូបាម៉ា និយាយឌឺថាបើ ដូណាល់ ត្រាំ ជាប់ឆ្នោតលោកប្តូរលំនៅទៅកាណាដា
× លោក បារ៉ាក់ អូបាម៉ា បានថ្លែងថាក្នុងន័យកំប្លែងថា លោកនិងប្រជាជនអាមេរិកច្រើនទៀតនឹងចាកចេញទៅរស់នៅកាណាដា បើសិនជា លោក ដូណាល់ ត្រាំ ជាប់ឆ្នោតជាប្រធានាធិបតីមែន។ លោកលើកឡើងបែបនេះក្នុងសន្និសីទព័ត៌មានរួមគ្នាជាមួយនាយករដ្ឋមន្ត្រីកាណាដា លោក Justine Trudeau សប្តាហ៍មុន។
ក្នុងសន្និសីទកាសែតរួមគ្នាជាមួយនាយករដ្ឋមន្ត្រីកាណាដា លោក បារ៉ាក់ អូបាម៉ា ឆ្លៀតនិយាយកំប្លែងលេងថា ប្រជាជនអាមេរិកច្រើនរួមទាំងលោកផងនឹងប្តូរលំនៅទៅកាណាដា បើសិន ជាបេក្ខជននាំមុខបក្សសាធារណរដ្ឋ ដូណា ត្រាំ ជាប់ឆ្នោតមែន។ ប៉ុន្តែលោកសង្ឃឹមថា វានឹងមិនមានរឿងអ្វីកើតឡើង ទោះជាអ្នកណាជាប់ឆ្នោតក្តី។
ឆ្លើយតបសំណួរទាក់ទិនផលប៉ះពាល់អនាគតទំនាក់ទំនងអាមេរិកនិងកាណាដា កាលណាបើបេក្ខជនបក្សសាធារណរដ្ឋដូចជា ដូណាល់ត្រាំជាប់ឆ្នោត លោក អូបាម៉ា បានលើកឡើងថា៖« រាល់លើកឲ្យតែយើងមានការបោះឆ្នោតប្រធានាធិបតី មិត្តរបស់យើងនៅទិសខាងជើង (កាណាដា) តែងតែប្រុងប្រៀបដើម្បីទទួលប្រជាជនអាមេរិកដ៏ច្រើនសន្ធឹក។
លោកក៏ឆ្លៀតនិយាយលេងបន្ថែមថា៖«សូមមិត្តកាណាដាត្រៀមខ្លួនដើម្បីទទួលប្រជាជនអាមេរិកច្រើនសន្ធឹកសន្ធាប់ដែលប្តូរលំនៅទៅរស់នៅកាណាដា នៅពេលដែលបេក្ខជនបក្សផ្សេងទៀតជាប់ឆ្នោត»។
ប៉ុន្តែយ៉ាងណាក៏ដោយ យោងតាមទីភ្នាក់ងារព័ត៌មាន Reuters នាយករដ្ឋមន្ត្រីវ័យក្មេងរូបស្រស់កាណាដា មិនរំពឹងទេថា មានប្រជាជនអាមេរិកច្រើនសន្ធឹកនឹងដណ្តើមគ្នាចូលទៅរស់នៅទឹកដីកាណាដា និងមានផលប៉ះពាល់ទំនាក់ទំនងទ្វេភាគីរវាងអាមេរិនិងកាណាដាឡើយ ទោះជាអ្នកណាឈ្នះឆ្នោតក៏ដោយ។
លោកក៏រំពឹងមុតមាំផងដែរថា នៅពេលខាងមុខមេដឹកនាំអាមេរិកថ្មីដែលមកជំនួសតំណែងលោក បារ៉ាក់ អូបាម៉ា នឹងបន្តការលើកកម្ពស់ទំនាក់ទំនងជាមួយកាណាដាឲ្យកាន់តែប្រសើរនិងស៊ីជម្រៅកាន់តែខ្លាំង។
ចាប់តាំងពី បេក្ខជនបក្សសាធារណរដ្ឋ និងជាសេដ្ឋអចលនទ្រព្យ ដូណាល់ ត្រាំ បានសំឡេងគាំទ្រកាន់តែច្រើន គេកត់សម្គាល់ថា ចំនួនប្រជាជនអាមេរិកកាន់តែច្រើនដែលប្រើប្រាស់អ៊ីនធឺណែតដើម្បីស្វែងយល់និងសួរសំណួរនានាពាក់ព័ន្ធពីការទៅរស់នៅប្រទេសកាណាដា៕
Tag:
ដូណាល់ ត្រាំ
បារ៉ាក់ អូបាម៉ា
Justin Trudeau
© រក្សាសិទ្ធិដោយ thmeythmey.com